ଅନୁଗୋଳ ସହର, ୭।୨ – ଅନୁଗୋଳ ସହର ହୁଲୁରିସିଂହାଠାରେ ନିର୍ମାଣ ହେଉଥିବା ଏକ ଆପାର୍ଟମେଣ୍ଟକୁ ନେଇ ଅଭିଯୋଗ ଆସିବା ପରେ ତାଳଚେର-ଅନୁଗୋଳ-ମେରାମଣ୍ଡଳି ଉନ୍ନୟନ କର୍ତ୍ତୃପକ୍ଷ (ତାମଡା)ଙ୍କ ପକ୍ଷରୁ ପ୍ରଥମେ ଜିଲାପାଳଙ୍କୁ ରିପୋର୍ଟ ପ୍ରଦାନ କରାଯାଇଥିଲା। ଗୁରୁବାର ଏ ନେଇ ଅନୁଗୋଳ ଥାନାରେ ଏକ ଏତଲା ମଧ୍ୟ ଦିଆଯାଇଛି।
ତାମଡା ସେକ୍ରେଟାରି ତଥା ଡେପୁଟି କଲେକ୍ଟର ବୈତୁରା ଦୀପ୍ ଚିଠି ନଂ.୧୪୨/୨୦ରେ ଅନୁଗୋଳ ଥାନାରେ ଅଭିଯୋଗ କରିଛନ୍ତି ଯେ, ବେଆଇନ ଆପାର୍ଟମେଣ୍ଟ ନିର୍ମାଣ କାର୍ଯ୍ୟକୁ ସମ୍ପୂର୍ଣ୍ଣ ବା ସାମୂହିକ ଭାବେ ବନ୍ଦ କରିବା ପାଇଁ ଓଡ଼ିଶା ପାୱାର କନଫର୍ମ ଅଣ୍ଡର ସବ୍ସେକ୍ସନ (ଆଇ) ଅଫ୍ ସେକ୍ସନ ୯୨ ଅଫ୍ ଓଡିଏ ଆକ୍ଟ ୧୯୮୨ ଅନୁଯାୟୀ ରେସିଡେଣ୍ଟାଲ ଆପାର୍ଟମେଣ୍ଟର ଏମ୍ଡିଙ୍କୁ ଡିସେମ୍ବର ୨୭ରେ ନଂ.୩୨୯୫ରେ ନୋଟିସ୍ ଦିଆଯାଇଥିଲା। ନୋଟିସ୍ ଦେବା ସତ୍ତ୍ବେ ସେ ନିର୍ଦ୍ଦେଶକୁ ଅବମାନନା କରି ବେଆଇନ କାର୍ଯ୍ୟ ଚାଲୁ ରଖିଛନ୍ତି। ଓଡ଼ିଶା ଅଣ୍ଡର ସବ୍ସେକ୍ସନ (ଆଇ) ଅଫ୍ ସେକ୍ସନ ୯୨ ଅଫ୍ ଓଡିଏ ଆକ୍ଟ ୧୯୮୨ ଆଇନ ବଳରେ ତାମଡା ପକ୍ଷରୁ କାର୍ଯ୍ୟ ବନ୍ଦ କରିବା ପାଇଁ ଚାହୁଁଛୁ। ତେଣୁ ପୋଲିସ ସେଠାରେ ଉପସ୍ଥିତ ରହି ବେଆଇନ ଆପାର୍ଟମେଣ୍ଟ ନିର୍ମାଣ କାର୍ଯ୍ୟ ବନ୍ଦ କରିବା ସହିତ ନିର୍ମାଣ କାର୍ଯ୍ୟ କରୁଥିବା ଲୋକମାନଙ୍କୁ ବାହାରକୁ ଆଣିବା ଜରୁରୀ ବୋଲି ଅଭିଯୋଗରେ ଦର୍ଶାଯାଇଛି। ଏ ବିଷୟରେ ତାମଡା ସେକ୍ରେଟାରି ଦୀପ୍ କହିଛନ୍ତି, ବେଆଇନ ଆପାର୍ଟମେଣ୍ଟ ନିର୍ମାଣ ପାଇଁ ଥାନାରେ ଅଭିଯୋଗ କରାଯାଇଛି। ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି କହିଛନ୍ତି, ବେଆଇନ ଆପାର୍ଟମେଣ୍ଟ ନିର୍ମାଣ ନେଇ ଅଭିଯୋଗ ଆସିଛି। ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।