ମୌନପୁରୀ,୨୬।୭: ଉତ୍ତର ପ୍ରଦେଶର ମୌନପୁରୀରେ ଏବେ ଅସହାୟ ମାତାପିତା ନିଜ ସନ୍ତାନଙ୍କ ଚିକିତ୍ସା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ଯୋଗି ଆଦିତ୍ୟ ନାଥଙ୍କ ନିକଟକୁ ପତ୍ର ଲେଖିଛନ୍ତି। ତାହା ପୁଣି ରକ୍ତରେ। ଶିଶୁମାନେ ଥାଲାସେମିଆରେ ପୀଡିତ ଥିବା ବେଳେ ରକ୍ତ ଓ ଅର୍ଥର ଅଭାବ ଦର୍ଶାଇ ଏହି ଚିଠି ଲେଖାଯାଇଛି। କିଶାନି ଅଞ୍ଚଳର ବୀର ସିଂ ନାମକ ବ୍ୟକ୍ତିଙ୍କର କରିଷ୍ମା(୮) ଓ ଦିବ୍ୟାଂଶୁ(୬) ଦୁଇ ପିଲାଙ୍କୁ ୨ ବର୍ଷ ହେବା ପରେ ସେମାନେ ଥାଲାସେମିଆରେ ପୀଡିତ ବୋଲି ଜଣାପଡିଥିଲା। ସେବେଠାରୁ ଏପର୍ଯ୍ୟନ୍ତ ବୀର ସିଂ ତାଙ୍କର ଚିକିତ୍ସା ପାଇଁ ତାଙ୍କ ନିକଟରେ ଥିବା ୪ ଏକର ଜମି ବିକ୍ରି କରି ସାରିଲେଣି। ଏଥିପାଇଁ ସେ ଏପର୍ଯ୍ୟନ୍ତ ପାଖାପାଖି ୧୧ ଲକ୍ଷ ଟଙ୍କା ଖର୍ଚ୍ଚ କରି ସାରିଥିବା ବେଳେ ଶିଶୁ ୨ ଜଣ ଏବେ ବି ଠିକ୍ ହୋଇ ନାହାଁନ୍ତି। ଏହାପରେ ତାଙ୍କର ତୃତୀୟ ସନ୍ତାନ ମଧ୍ୟ ଜନ୍ମରୁ ଥାଲାସେମିଆରେ ପୀଡିତ ବୋଲି ଜଣାପଡିବା ପରେ ଏହି ଦମ୍ପତି ଭାଙ୍ଗି ପଡିଛନ୍ତି। ଡାକ୍ତର ଏବେ ଏମାନଙ୍କ ଅପରେଶନ ପାଇଁ ପ୍ରାୟ ୨୨ ଲକ୍ଷ ଟଙ୍କା ଆବଶ୍ୟକ ବୋଲି କହିଥିବା ବେଳେ ଏତେ ପରିମାଣର ଟଙ୍କା ଯୋଗାଡ କରିବାକୁ ଅକ୍ଷମ ଥିବା ବୀର ସିଂ ଓ ତାଙ୍କ ସ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସାହାଯ୍ୟ ପାଇଁ ରକ୍ତରେ ଚିଠି ଲେଖି ପଠାଇଛନ୍ତି।