ନୟାଗଡ଼ ଅଫିସ/ନୂଆଗାଁ,୧୧ା୧୦ (ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ବ୍ଲକ ପାରାଢିପି ପଞ୍ଚାୟତ ଥୁଆବାରି ଗ୍ରାମରେ ଗୁରୁବାର ଶହୀଦ ଦିବସ ପାଳିତ ହୋଇ ଯାଇଛି। ଗ୍ରାମବାସୀଙ୍କ ନେତୃତ୍ୱରେ ହୋଇଥିବା ଏହି କାର୍ଯ୍ୟକ୍ରମରେ ନୂଆଗାଁ ବିଡ଼ିଓ ଶିରିୟାଲ ପଟେଲ ଯୋଗଦେଇ ଶହୀଦ୍ମାନଙ୍କ ଉପରେ ବକ୍ତବ୍ୟ ରଖିଥିଲେ। ଗ୍ରାମବାସୀ ଦର୍ଶାଇଥିଲେ, ଥୁଆବାରି ଗ୍ରାମର ଆନନ୍ଦ ଚନ୍ଦ୍ର ସ୍ବାଇଁଙ୍କ ନେତୃତ୍ୱରେ ଜିଲାର ହଜାର ହଜାର ତଫସିଲଭୁକ୍ତ ଜାତି ଓ ଜନଜାତିର ବ୍ୟକ୍ତିମାନେ ସ୍ବାଧୀନତା ଆନ୍ଦୋଳନରେ ସାମିଲ ହୋଇଥିଲେ। ସ୍ବାଧୀନତା ସଂଗ୍ରାମୀମାନେ ଇଂରେଜମାନେ ରହୁଥିବା ବରକୋଳା ଡାକବଙ୍ଗଳା ଘେରାଉ କରିବା ସହିତ ବଙ୍ଗଳାକୁ ନିଆଁ ଲଗାଇ ଦେଇଥିଲେ। ଟେଲିଫୋନ୍ ତାର କାଟି ପୋଲିସକୁ ମାଡ଼ ମାରିବା ସହ ନୂଆଗାଁ ଥାନାରେ ନିଆଁ ଲଗାଇ ଦେଇଥିଲେ। ଠିକ୍ ଏହି ସମୟରେ ତତ୍କାଳୀନ ଦାରୋଗା ବେଣୁଧର ପଟ୍ଟନାୟକଙ୍କ ନିର୍ଦ୍ଦେଶରେ ନେତା ଆନନ୍ଦ ଚନ୍ଦ୍ର ସ୍ବାଇଁଙ୍କ ଉପରକୁ ଗୁଳି ଚାଳନା କରାଯାଇଥିଲା। ହେଲେ ଗୁଳିର ଶିକାର ହୋଇଥିଲେ କୁଶିବିଡ଼ା ଗ୍ରାମର ଶହୀଦ କଷ୍ଟି ଡ଼ାକୁଆ। ତାଙ୍କ ମୃତ୍ୟୁରେ ବିପ୍ଲବୀମାନେ ଭାଙ୍ଗି ନ ପଡି ବିପ୍ଲବ କରିଥିଲେ। ଗାଁର ଭାଗବତ ସ୍ବାଇଁ, ଆନନ୍ଦ ଚନ୍ଦ୍ର ସ୍ବାଇଁ, ପ୍ରହଲ୍ଲାଦ ସ୍ବାଇଁ ଓ ରାମ ସ୍ବାଇଁଙ୍କ ମୁଣ୍ଡ ବିନିମୟରେ ସରକାର ଘୋଷଣା କରିଥିଲେ ୫ଶହ ଲେଖାଏ ମୁଦ୍ରା। ଇଂରେଜମାନଙ୍କ ବିରୋଧରେ ଲଢେଇ କରି ଦେଶକୁ ରକ୍ଷା କରିଥିବା ଏହି ବୀରସନ୍ତାନଙ୍କ ୭୭ତମ ବଳିଦାନ ଦିବସ ପ୍ରତିବର୍ଷ ତାଙ୍କ ଜନ୍ମ ମାଟିରେ ପାଳିତ ହୋଇଆସୁଛି। ଦେଶ ସ୍ବାଧୀନତାର ଅନେକ ବର୍ଷ ବିତିଯାଇଥିଲେ ବି ଥୁଆବାରି ସେହିଭଳି ଅବହେଳିତ ହୋଇ ରହିଛି। ଆଜିର ଦିବସରେ ଥୁଆବାରିକୁ ଆଦର୍ଶ ଗ୍ରାମ ଭାବେ ଘୋଷଣା କରିବାକୁ ଜିଲା ପ୍ରଶାସନ ଓ ବ୍ଲକ ପ୍ରଶାସନ ନିକଟରେ ଗ୍ରାମବାସୀ ନିବେଦନ କରିଥିଲେ। ନୂଆଗାଁ ପୋଲିସ ପକ୍ଷରୁ ଶହୀଦମାନଙ୍କୁ ତୋପ ସଲାମୀ ଦିଆଯାଇଥିଲା। ଗ୍ରାମବାସୀଙ୍କ ପକ୍ଷରୁ ନିମନ୍ତ୍ରିତ କରାଯାଇଥିଲେ ମଧ୍ୟ ଜିଲାସ୍ତରୀୟ ଅଧିକାରୀ ନ ଆସିବାକୁ ନେଇ ସେମାନଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିଲା।