ନୂଆଦିଲ୍ଲୀ,୨୯।୪ (ପି.ଟି.): ଦ୍ୱିତୀୟଥର ପାଇଁ ଥୋମାସ ଓ ଉବର କପ୍ ଫାଇନାଲ୍ସକୁ ଘୁଞ୍ଚାଯାଇଛି। କୋଭିଡ୍-୧୯ ମହାମାରୀ କାରଣରୁ ଏହି ଦୁଇ ଗୁରୁତ୍ୱପୂର୍ଣ୍ଣ ଟୁର୍ନାମେଣ୍ଟକୁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଛି ବୋଲି ବ୍ୟାଡମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ଘୋଷଣା କରିଛି। ଏବେ ଏହି ଦୁଇଟି ଟିମ୍ ଚାମ୍ପିୟନଶିପ୍ ଡେନ୍ମାର୍କର ଆରହସରେ ଅକ୍ଟୋବର ୩ ଓ ୧୧ ତାରିଖ ମଧ୍ୟରେ ଆୟୋଜନ ହେବ ବୋଲି ବିଡବ୍ଲ୍ୟୁଏଫ୍ କହିଛି।
ପ୍ରଥମ ଏହି ଟୁର୍ନାମେଣ୍ଟ ମେ ୧୬ରୁ ୨୪ ତାରିଖରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ମାର୍ଚ୍ଚ ୨୦ ତାରିଖରେ ଏହାକୁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଥିଲା ଓ ଏହି ଟୁର୍ନାମେଣ୍ଟକୁ ଅଗଷ୍ଟ ୧୫ରୁ ୨୩ ତାରିଖ ମଧ୍ୟରେ ଆୟୋଜନ କରାଯିବ ବୋଲି ସେତେବେଳେ ଘୋଷଣା କରାଯାଇଥିଲା। କରୋନା ଭାଇରସ ସଂକ୍ରମଣ ତଥା ମହାମାରୀ କାରଣରୁ ଏହି ଟୁର୍ନାମେଣ୍ଟଗୁଡିକୁ ସେପ୍ଟେମ୍ବର ପୂର୍ବରୁ ଆୟୋଜନ କରିବା ସମ୍ଭବ ନୁହଁ ବୋଲି ବିଡବ୍ଲ୍ୟୁଏଫ୍ କହିଛି।
ଇତିମଧ୍ୟରେ ଡେନ୍ମାର୍କ ସରକାର ଅଗଷ୍ଟ ପର୍ଯ୍ୟନ୍ତ ସର୍ବସାଧାରଣ ବହୁ ସଂଖ୍ୟାରେ ଏକାଠି ହେବା ପ୍ରକ୍ରିୟାକୁ ବାରଣ କରିଛନ୍ତି। ଫଳରେ ଅଗଷ୍ଟରେ ଏହି ଟୁର୍ନାମେଣ୍ଟ ଆୟୋଜନ କରିବା ଅସମ୍ଭବ ହୋଇପଡିଛି। ତେଣୁ ବିଡବ୍ଲ୍ୟୁଏଫ୍, ବ୍ୟାଡମିଣ୍ଟନ ଡେନମାର୍କ, ଟୁର୍ନାମେଣ୍ଟ ଆୟୋଜକ, ସ୍ପୋଟର୍ସ ଇଭେଣ୍ଟ ଡେନମାର୍କ ଓ ସ୍ଥାନୀୟ ଆରହୁସ ସରକାର ମିଳିତ ଭାବେ ଅକ୍ଟୋବରକୁ ଏହି ଟୁର୍ନାମେଣ୍ଟ ଘୁଞ୍ଚାଇବାକୁ ନିଷ୍ପତ୍ତି ନେଇଛନ୍ତି। ଆଥ୍ଲେଟ, ଷ୍ଟାଫ୍, ଭଲ୍ୟୁଣ୍ଟିୟର୍ସ, ଜଜ୍ ଓ ପୂରା ବ୍ୟାଡମିଣ୍ଟନ ସମୁଦାୟର ସ୍ବାସ୍ଥ୍ୟ ଓ ନିରାପତ୍ତାକୁ ଆମେ ପ୍ରାଥମିକତା ଦେଉଛୁ ବୋଲି ବିଡବ୍ଲ୍ୟୁଏଫ୍ ସାଧାରଣ ସମ୍ପାଦକ ଜେନେରାଲ ଥୋମାସ ଲୁଣ୍ଡ କହିଛନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟଏଚ୍ଓ), ସ୍ବାସ୍ଥ୍ୟ ବିଶେଷଜ୍ଞମାନଙ୍କ ସହ ପରାମର୍ଶ କରି ଆମେ ଏହି ନିଷ୍ପତ୍ତି ନେଇଛୁ । ଅକ୍ଟୋବରରେ ଏହି ଚାମ୍ପିୟନଶିପ୍ ଭଲରେ ଆୟୋଜନ ହେବ ବୋଲି ସେ ଆଶାପ୍ରକାଶ କରିଛନ୍ତି। ଉଲ୍ଲେଖଥାଉ କି, ପୂର୍ବରୁ ବିଡବ୍ଳ୍ୟୁଏଫ୍ ଅଲଇଂଲଣ୍ଡ ଚାମ୍ପିୟନଶିପ ସମେତ ଏକାଧିକ ହାଇପ୍ରୋଫାଇଲ ଟୁର୍ନାମେଣ୍ଟ ଏହି ମହାମାରୀ କାରଣରୁ ସ୍ଥଗିତ ରହିଛି। ଅଲ ଇଂଲଣ୍ଡ ଚାମ୍ପିୟନଶିପ୍ ମାର୍ଚ୍ଚ ୧୧ରୁ ୧୫ ତାରିଖ ମଧ୍ୟରେ ଖେଳାଯିବାର କାର୍ଯ୍ୟକ୍ରମ ଥିଲା।