ଜୋହାନ୍ସବର୍ଗ,୫ା୮- ଦକ୍ଷିଣ ଆଫ୍ରିକା ଦଳର ମୁଖ୍ୟ କୋଚ୍ ଓଟିସ ଗିବସନଙ୍କ ସମେତ ପୂରା କୋଚିଂ ଟିମ୍ ଓ ମ୍ୟାନେଜମେଣ୍ଟ ଷ୍ଟାଫଙ୍କୁ ବିଦା କରିଥିବା କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ) ରବିବାର ଘୋଷଣା କରିଛି। ନିକଟରେ ଶେଷ ହୋଇଥିବା ବିଶ୍ୱକପ୍ରେ ଦକ୍ଷିଣ ଆଫ୍ରିକା ଦଳ ୭ମ ସ୍ଥାନରେ ରହି ଅଭିଯାନ ଶେଷ କରିବା ପରେ ଗତ ସପ୍ତାହରେ ବସିଥିବା କାର୍ଯ୍ୟକାରୀ ସଦସ୍ୟଙ୍କ ବୈଠକରେ ଏହି ନିଷ୍ପତ୍ତି ନିଆଯାଇଛି। ଦଳ ତା’ର ପରବର୍ତ୍ତୀ ସିଜନ ଭାରତ ଗସ୍ତରୁ ଆରମ୍ଭ କରିବ। ଭାରତରେ ଦକ୍ଷିଣ ଆଫ୍ରିକା ୩ ଟେଷ୍ଟ ଖେଳିବ, ଯାହାକି ନୂଆ ବିଶ୍ୱ ଟେଷ୍ଟ ଚାମ୍ପିୟନଶିପର ଅଂଶବିଶେଷ। ଏକ ବିଜ୍ଞପ୍ତିରେ ସିଏସ୍ଏ ପକ୍ଷରୁ କୁହାଯାଇଛି, ଫୁଟ୍ବଲ ଷ୍ଟାଇଲରେ ଦଳ ପାଇଁ ମ୍ୟାନେଜର ନିଯୁକ୍ତ କରାଯିବ। ସେ ସମସ୍ତ ଫର୍ମାଟରେ ଜାତୀୟ ଦଳର ଦାୟିତ୍ୱ ସମ୍ଭାଳିବେ। ତାଙ୍କ ବ୍ୟତୀତ କୋଚିଂ ଷ୍ଟାଫ, ମେଡିକାଲ ଓ ପ୍ରଶାସନିକ ବ୍ୟକ୍ତିଙ୍କୁ ମଧ୍ୟ ନିଯୁକ୍ତ କରାଯିବ। ଟିମ୍ ମ୍ୟାନେଜର ସିଧାସଳଖ ଡିରେକ୍ଟର ଅଫ୍ କ୍ରିକେଟକୁ ରିପୋର୍ଟ କରିବେ। ଏହି ନୂଆ ପଦ ଲାଗି ନିର୍ବାଚନ ହେବା ପର୍ଯ୍ୟନ୍ତ ପୂର୍ବତନ ଖେଳାଳି କୋରି ଭାନ ଜିଲ ଡିରେକ୍ଟର ଅଫ୍ କ୍ରିକେଟ ପଦରେ ରହିବେ। ଭାରତ ଗସ୍ତ ପୂର୍ବରୁ ଭାନ ଜିଲ ଓ ସିଏସ୍ଏ କାର୍ଯ୍ୟକାରୀ ମୁଖ୍ୟ ଥବଙ୍ଗ ମୋରେ ଦଳ ଲାଗି ଅନ୍ତରୀଣ ମ୍ୟାନେଜମେଣ୍ଟ ଟିମ୍ ଓ ଚୟନ କମିଟି ନିଯୁକ୍ତ କରିବେ ବୋଲି କୁହାଯାଇଛି।
