କରାଚୀ,୨।୧୧(ପି.ଟି.): ପାକିସ୍ତାନ କ୍ରିକେଟ ବୋର୍ଡ (ପିସିବି) କ୍ରିକେଟ ଦକ୍ଷିଣ ଆଫ୍ରିକା (ସିଏସ୍ଏ)କୁ ତା’ର ଜାତୀୟ ଦଳକୁ ଆସନ୍ତା ମାର୍ଚ୍ଚରେ ଟି୨୦ ସିରିଜ୍ ପାଇଁ ପଠାଇବାକୁ ପ୍ରସ୍ତାବ ଦେଇଛି। ଏ ନେଇ ପିସିବି କାର୍ଯ୍ୟକାରୀ ମୁଖ୍ୟ ଅଫିସର ଓ୍ବାସିମ୍ ଖାଁ ଶନିବାର କହିଛନ୍ତି। ଲାହୋରଠାରେ ଅନୁଷ୍ଠିତ ଖବରଦାତା ସମ୍ମିଳନୀରେ ସେ କହିଛନ୍ତି ଯେ, ଆମେ ଶ୍ରୀଲଙ୍କା ବୋର୍ଡଠାରୁ ସକାରାତ୍ମକ ପ୍ରତ୍ୟୁତ୍ତର ପାଇଛୁ। ପାକିସ୍ତାନକୁ ପୁଣିଥରେ ଅନ୍ତର୍ଜାତୀୟ କ୍ରିକେଟ ଫେରିଆସିଛି। ଶ୍ରୀଲଙ୍କା ଦଳ ଏଠାରେ ଦିନିକିଆ ଓ ଟି୨୦ ସିରିଜ୍ ଖଳି ଆମକୁ ସହାୟତା ଦେଇଛି। ସେମାନେ ରାଓ୍ବଲପିଣ୍ଡି ଓ କରାଚୀଠାରେ ଡିସେମ୍ବରରେ ହେବାକୁ ଥିବା ଦୁଇ ଟେଷ୍ଟ ପାଇଁ ଶକ୍ତିଶାଳୀ ଦଳ ପଠାଇବା ଲାଗି ପ୍ରତିଶ୍ରୁତି ଦେଇଛନ୍ତି। ଆସନ୍ତା ସପ୍ତାହରେ ଏ ନେଇ ଚୂଡ଼ାନ୍ତ ନିଷ୍ପତ୍ତି ନେବେ। କ୍ରିକେଟ ଦକ୍ଷିଣ ଆଫ୍ରିକା ସହ ପିସିବି ଅଫିସିଆଲଙ୍କ ଆଲୋଚନା ଚାଲିଛି। ଏହି ଟି୨୦ ସିରିଜ୍ ପାକିସ୍ତାନରେ ଆୟୋଜନ ହେବ ବୋଲି ଆମେ ଆଶା କରୁଛୁ। ଏହା ଦ୍ୱାରା ଟି୨୦ ବିଶ୍ୱକପ୍ ପୂର୍ବରୁ ଉଭୟ ଦଳ ପ୍ରସ୍ତୁତ ହୋଇପାରିବେ।