ନୂଆଦିଲ୍ଲୀ,୧୨।୯ (ପି.ଟି.)- ଆସନ୍ତାମାସ ଠାରୁ ଆରମ୍ଭ ହେବାକୁ ଯାଉଥିବା ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ ପାଇଁ ଗୁରୁବାର ଭାରତୀୟ ଘୋଷଣା ହେବ। ଚୟନକର୍ତ୍ତାମାନେ ବୈଠକରେ ବସି ଏହି ୩ ମ୍ୟାଚ୍ ବିଶିଷ୍ଟ ସିରିଜ ପାଇଁ ଦଳ ଚୟନ କରିବେ। ଦୁର୍ବଳ ଫର୍ମ ଦେଇ ଗତି କରୁଥିବା ଲୋକେଶ ରାହୁଲ ଏବେ ରୋହିତ ଶର୍ମାଙ୍କ ପାଇଁ ସୁଯୋଗ ସୃଷ୍ଟି କରିଛି।
ଗତ ଓ୍ବେଷ୍ଟଇଣ୍ଡିଜ ବିପକ୍ଷ ଟେଷ୍ଟ ସିରିଜରେ ଦିନିକିଆ ଉପ-ଅଧିନାୟକ ରୋହିତ ଶର୍ମା ଖେଳିବାର ସୁଯୋଗ ପାଇ ନ ଥିଲେ। ହନୁମା ବିହାରୀ ଓ ଆଜିଙ୍କ୍ୟ ରାହାନେ ଯଥାକ୍ରମେ ୫ ଓ ୬ ନମ୍ବରରେ ନିଜର ସ୍ଥାନ ପକ୍କା କରିବା ପରେ ରୋହିତଙ୍କୁ ଓପନର ହିସାବରେ ଦଳରେ ସାମିଲ କରିବାର ସମ୍ଭାବନା ସୃଷ୍ଟି ହୋଇଛି। ରୋହିତ ଶେଷଥର ପାଇଁ ୨୦୧୮ରେ ଅଷ୍ଟ୍ରେଲିଆ ବିପକ୍ଷରେ ଟେଷ୍ଟ ଖେଳିଥିଲେ। ଟେଷ୍ଟ ସ୍ପୋଶଲିଷ୍ଟ କୁହାଯାଉଥିବା ଚେତେଶ୍ୱର ପୂଜାରା ୩, ଅଧିନାୟକ ବିରାଟ କୋହଲି ୪ ନମ୍ବରରେ ବ୍ୟାଟିଂ କରିବେ। ବୀରେନ୍ଦ୍ର ସେହ୍ବାଗଙ୍କ ଉଦାହରଣକୁ ଦୃଷ୍ଟିରେ ରଖି ବିସ୍ଫୋରକ ରୋହିତଙ୍କୁ ସୁଯୋଗ ଦେବା ପାଇଁ କୋଚ୍ ଶାସ୍ତ୍ରୀ ଓ କୋହଲି ନିଷ୍ପତ୍ତି ନେଇପାରନ୍ତି। ସେହିପରି ଘରୋଇ କ୍ରିକେଟରେ ଦମ୍ଦାର ପ୍ରଦର୍ଶନ କରିଥିବା ବେଙ୍ଗଲ ଓପନର ଅଭିମନ୍ୟୁ ଈଶ୍ୱରନଙ୍କୁ ରିଜର୍ଭ ଓପନର ହିସାବରେ ସ୍ଥାନ ମିଳିପାରେ। ତେବେ ରାହୁଲଙ୍କୁ ବାଦ୍ ଦିଆଗଲେ ଈଶ୍ୱରନଙ୍କୁ ସୁଯୋଗ ମିଳିପାରେ। ସେହିପରି ଗୁଜୁରାଟ ଓପନର ପ୍ରିୟଙ୍କ ପଞ୍ଚାଲ ଓ ପଞ୍ଜାବ ଓପନର ଶୁବମନ ଗିଲଙ୍କ ନେଇ ମଧ୍ୟ ଚୟନକର୍ତ୍ତା ବିଚାର କରିପାରନ୍ତି। ରାହୁଲ ଗତ ୩୦ଟି ଟେଷ୍ଟ ଇନିଂସରେ ୬୬୪ ରନ ସଂଗ୍ରହ କରି କରି ଖରାପ୍ ଫର୍ମ ଦେଇ ଗତି କରୁଛନ୍ତି। ମୟଙ୍କ ଅଗ୍ରଓ୍ବାଲ ସ୍ଥାନ ବଜାୟ ରଖିବା ଏକ ପ୍ରକାର ନିଶ୍ଚିତ ମନେହେଉଛି। ଦ୍ୱିତୀୟ ଓପନର ସ୍ଥାନ ପାଇଁ ରୋହିତ ଓ ଈଶ୍ୱରନଙ୍କୁ ସାମିଲ କରାଯିବାର ଯଥେଷ୍ଟ ସମ୍ଭାବନା ରହିଛି।
ବୋଲିଂରେ ଫିଟ୍ ନ ଥିବାରୁ ଭୁବନେଶ୍ୱର କୁମାରଙ୍କୁ ସ୍ଥାନ ନ ମିଳିପାରେ। ଯଦି ହାର୍ଦ୍ଦିକ ପାଣ୍ଡ୍ୟା ଦଳକୁ ଫେରନ୍ତି ତାହାଲେ ନବଦୀପ ସଇନି ବ୍ୟାକ୍ ଅଫ୍ ଦ୍ରୁତ ବୋଲର ଭାବେ ଦଳରେ ସାମିଲ ହୋଇପାରନ୍ତି। ଯୁବ ଉଇକେଟ କିପର ବ୍ୟାଟ୍ସମ୍ୟାନ ରିଷଭ ପନ୍ତ ପ୍ରଥମ ପସନ୍ଦ ହୋଇଥିଲେ ମଧ୍ୟ ଅଭିଜ୍ଞ ରିଦ୍ଧିମାନ ଶାହ ମଧ୍ୟ ଦଳରେ ସ୍ଥାନ ପାଇବା ସମ୍ଭାବନା ରହିଛି। ୩ ସ୍ପିନର ରବୀନ୍ଦ୍ର ଜାଡେଜା, କୁଲଦୀପ ଯାଦବ ଓ ରବିଚନ୍ଦ୍ରନ ଅଶ୍ୱିନ ଦଳରେ ସାମିଲ ହେବା ନିଶ୍ଚିତ। ସେହିପରି ଦ୍ରୁତ ବୋଲିଂରେ ଯଶପ୍ରୀତ ବୁମ୍ରା, ମହମ୍ମଦ ସାମି ଓ ଈଶାନ୍ତ ଶର୍ମା ସାମିଲ ହେବା ନିଶ୍ଚିତ। ଯଦି ମହମ୍ମଦ ସାମିଙ୍କୁ ବିଶ୍ରାମ ଦିଆଯାଏ ତା,ହେଲେ ଉମେଶ ଯାଦବଙ୍କୁ ସୁଯୋଗ ମିଳିବ।
ସମ୍ଭାବ୍ୟ ଦଳ:
ଓପନର: ମୟଙ୍କ ଅଗ୍ରଓ୍ବାଲ, ରୋହିତ ଶର୍ମା।
ମିଡଲ ଅର୍ଡର: ଚେତେଶ୍ୱର ପୂଜାରା, ବିରାଟ କୋହଲି, ଅଜିଙ୍କ୍ୟ ରାହାନେ, ହନୁମା ବିହାରୀ।
ଅଲରାଉଣ୍ଡର: ହାର୍ଦ୍ଦିକ ପାଣ୍ଡ୍ୟା।
ଉଇକେଟକିପର: ରିଷଭ ପନ୍ତ, ରିଦ୍ଧିମାନ ଶାହ।
ଦ୍ରୁତ ବୋଲର: ଯଶପ୍ରୀତ ବୁମ୍ରା, ଈଶାନ୍ତ ଶର୍ମା, ମହମ୍ମଦ ସାମି/ ଉମେଶ ଯାଦବ।
ସ୍ପିନର: ରବିଚନ୍ଦ୍ରନ ଅଶ୍ୱିନ୍, ରବୀନ୍ଦ୍ର ଜାଡେଜା, କୁଲଦୀପ ଯାଦବ।
ନଜରରେ ରହିଛନ୍ତି: ଅଭିମନ୍ୟୁ ଈଶ୍ୱରନ (ତୃତୀୟ ଓପନର), ପ୍ରିୟଙ୍କ ପଞ୍ଚାଲ (ତୃତୀୟ ଓପନ), ନବଦୀପ ସଇନି (ରିଜର୍ଭ ଦ୍ରୁତ ବୋଲର), କୋନା ଶ୍ରୀକର ଭରଦ (ଦ୍ୱିତୀୟ ଉଇକେଟକିପର)।