ଆନନ୍ଦପୁର,୧୭।୬(ସ୍ବ.ପ୍ର.): ଆନନ୍ଦପୁର ଓ ଘସିପୁରା ଅଞ୍ଚଳରେ ଥିବା ବିଭିନ୍ନ ଜଗନ୍ନାଥ ମନ୍ଦିରରେ ସ୍ନାନପୂର୍ଣ୍ଣିମା ନୀତି ମହା ଆଡମ୍ବରରେ ପାଳନ ହେଉଛି। ପବିତ୍ର ସ୍ନାନପୂର୍ଣ୍ଣିମା ଉପଲକ୍ଷେ ଆନନ୍ଦପୁରର ଆରାଧ୍ୟ ଦେବତା ଦାରୁବ୍ରହ୍ମ ଶ୍ରୀଶ୍ରୀଦଧିବାମନ ଜୀଉ, ଶ୍ରୀ ବଳଭଦ୍ର, ଦେବୀ ସୁଭଦ୍ରା, ଶ୍ରୀ ସୁଦର୍ଶନ ମାନବୀୟ ଲୀଳା ସ୍ବରୂପ ଜନ୍ମ ଦିବସରେ ରତ୍ନ ସିଂହାସନରୁ ଓହ୍ଲାଇ ସ୍ନାନମଣ୍ଡପରେ ସର୍ବସମ୍ମୁଖରେ ୧୦୮ କୁମ୍ଭ କେଶର କର୍ପୂର ଚୁଆ ଚନ୍ଦନ ମିଶ୍ରିତ ସୁବାସିତ ଜଳରେ ସ୍ନାନ କରିଛନ୍ତି। ଏଥିପାଇଁ ପ୍ରାତଃ ସମୟରେ ଚତୁର୍ଦ୍ଧାମୂର୍ତ୍ତିଙ୍କୁ ମନ୍ଦିରର ପୂଜାପଣ୍ଡା ଏବଂ ସୁଆରମାନେ ପହଣ୍ଡି କରାଇ ସ୍ନାନମଣ୍ଡପକୁ ଆଣିଥିଲେ। ରୀତିନୀତି ଅନୁଯାୟୀ ଅଧିବାସ କରାଯାଇଥିବା ସୁବାସିତ ଜଳରେ ସ୍ନାନ କରାଯାଇ ନୂତନବସ୍ତ୍ର ପରିଧାନ ପୂର୍ବକ ଷୋଡ଼ଶ ଉପଚାରରେ ପୂଜା କରାଯାଇ ଶୀତଳ ଭୋଗ ସମର୍ପଣ କରାଯାଇଥିଲା। ପରେ ଗଜାନନ ବେଶରେ ସଜ୍ଜିତ କରାଯାଇ ସର୍ବସାଧାରଣଙ୍କ ଦର୍ଶନ ପାଇଁ ଛଡାଯାଇଥିଲା। ସନ୍ଧ୍ୟା ଆଳତି ପରେ ଚତୁର୍ଦ୍ଧାମୂର୍ତ୍ତିଙ୍କୁ ଅଣସର ପିଣ୍ଡିକୁ ପହଣ୍ଡି ମାଧ୍ୟମରେ ନିଆଯାଇ ୧୫ଦିନ କାଳ ଗୁପ୍ତ ସେବା ପୂଜା କରାଯିବ ବୋଲି ମନ୍ଦିରର ପୂଜାପଣ୍ଡା ସୂଚନା ଦେଇଛନ୍ତି।
