କେସିଙ୍ଗା,୧୯।୩ (ଡି.ଏନ୍.ଏ.)- କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧୀନ ବାଲସି ଗାଁ ଜଗନ୍ନାଥ ଗୁଡ଼ି ପାସେ ତିଆର ହେଉଥିବାର ଗୋଷ୍ଠୀକେନ୍ଦ୍ର କାମ୍ ଡେରି ହେଉଥିବାର ଗାଁବାସୀ ଅଭିଯୋଗ କରିଛନ୍।
ସୂଚନା ଅନ୍ସାରେ ୨୦୧୮-୧୯ ବଛରରେ କେସିଙ୍ଗା ବ୍ଲକ ତରଫୁ ଆମଗାଁ ଆମ ବିକାଶ ଯୋଜନାରେ ବାଲସି ଗାଁ ଜଗନ୍ନାଥ ଗୁଡ଼ି ପାସେ ଗୁଟେ ଗୋଷ୍ଠୀକେନ୍ଦ୍ର ତିଆର ଲାଗି ୭ ଲାଖ୍ ଟଁକା ମଂଜୁର ହେଇଥିଲା। କାମ୍ ଦେଖ୍ରେଖ ଲାଗି ବିଭାଗୀୟ କନିଷ୍ଠ ଯନ୍ତ୍ରୀକୁଁ ଦାଇତିଅ ଦିଆଯାଇଛେ। ସେନ୍ତା ସୂଚନା ଫଲକରେ କାମ୍ ଆରମ୍ ୨୦୧୯ ଫେବୃୟାରୀ ୧୧ ତାରିଖ ଲେଖା ଥିଲାବେଲେ ଶେଷ ତାରିଖ ଲେଖା ନଁାଇଁନ। ଫଲକ ହିସାବେ କାମ୍ ଆରମ୍ ହେବାର ଆଏଜ୍କେ ବଛ୍ରେ ଉପରେ ବିତିଯାଇଛେ। ଇଥିରଲାଗି ୧ ଲାଖ୍ ୭୮ ହଜାର ଟଁକା ଖରଚ୍ ହେଇ ଆଏଜ୍ ବି ଗୋଷ୍ଠୀକେନ୍ଦ୍ରଟା ଦରଖଁଡିଆ ହେଇ ପଡ଼ିଛେ। ଗୋଷ୍ଠୀକେନ୍ଦ୍ରଟା ତିଆର ହେଲେ ଗଁାର ସଭାସମିତି, ସାମାଜିକ କାଯ୍, ଭଜନ କୀରତନ୍ ହେଇପାରତା ବଲି ଗାଁବାସୀ କହିଛନ୍। ଇ ବାବ୍ଦେ କେସିଙ୍ଗା ପଁଚେତ୍ ସମିତିର କନିଷ୍ଠ ଯନ୍ତ୍ରୀ ଦିଲୀପ କୁମାର ପୁଟେଲକୁଁ ପଚ୍ରାଲାରୁ ଗାଁରେ ଦୁଇ ଦଲିଆ ହେଇ ଗଲିଗୁଲମାଲ ହେଉଛନ୍। ସେଥିରଲାଗି କାମ୍ ସାରବାରେ ଡେରି ହେଉଛେ। ହେଲେ ଆଏବା ମାସ୍ଠାନୁ ଯେନ୍ଥେଇ ହେଲେ କାମ୍ ଆରମ୍ କରାଯିବା ବଲି ସେ କହିଥିଲେ।