ଅନୁଗୋଳ ଅଫିସ,୧୭ା୫ – ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟ କରୁଥିବା ହେଲ୍ପଡେସ୍କ ମ୍ୟାନେଜର ଓ ଭଲ୍ୟୁଣ୍ଟରମାନଙ୍କୁ ଚାକିରିରୁ ଛଟେଇ କରାଯାଇଛି। ଏପରି କି ୭ମାସ ହେବ ସେମାନଙ୍କୁ ଦରମା ମଧ୍ୟ ପ୍ରଦାନ କରାଯାଇ ନ ଥିବା ଶନିବାର ଜିଲାପାଳଙ୍କ ନିକଟରେ ଅଭିଯୋଗ ହୋଇଛି।
ଛଟେଇ ହୋଇଥିବା ସମ୍ପୃକ୍ତ କର୍ମଚାରୀମାନେ ଅଭିଯୋଗ କରିଛନ୍ତି ଯେ, ଏକ ଠିକା ସଂସ୍ଥା ଅଧୀନରେ ସେମାନେ ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟ କରୁଥିଲେ। ଇତିମଧ୍ୟରେ ଚୁକ୍ତି ଅବଧି ଶେଷ ହୋଇଯାଇଥିବାରୁ ଅନ୍ୟ ଏକ ଠିକା ସଂସ୍ଥା ମେଡିକାଲରେ କାର୍ଯ୍ୟ ପାଇଥିଲା। କିନ୍ତୁ ପୁରୁଣା ଠିକା ସଂସ୍ଥା କର୍ମଚାରୀମାନଙ୍କ ବକେୟା ଟଙ୍କା ପଇଠ ନ କରି ଚାଲିଯାଇଥିଲା। ନୂଆ ଠିକା ସଂସ୍ଥା ନିକଟରେ ଆବେଦନ କରିବା ପରେ ସେମାନଙ୍କୁ ଚୟନ କରାଯାଇଥିଲା। ହେଲେ ମୁଣ୍ଡ ପିଛା ୪୫ ହଜାର ଟଙ୍କା ଦେବାକୁ ମେଡିକାଲ ମ୍ୟାନେଜର ଦାବି କରିଥିଲେ। ଏପରି କି ନୂଆ କରି ଠିକା ନେଇଥିବା ସଂସ୍ଥା ମଧ୍ୟ ଅନ୍ୟ କେତେଜଣଙ୍କ ନିକଟରୁ ଅର୍ଥ ନେଇ ନିଯୁକ୍ତି ଦେଇଥିବା ମେଘନାଦ ସାହୁ, ନରସିଂହ ମହାପାତ୍ର, ବିଜୟ କୁମାର ନାୟକ, ନରେଶ ଚନ୍ଦ୍ର ସାହୁ, ସାଗରିକା ସାହୁ, ମୋନାଲିସା ପୃଷ୍ଟି, ଜ୍ୟୋତିର୍ମୟୀ ନାୟକ, ଅଜିତ ସାହୁ, ଶାନ୍ତନୁ ଦାସ, ଅଙ୍ଗଦ ସାହୁ ପ୍ରମୁଖ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ଦୀର୍ଘ ଦିନ ହେବ ଦରମା ପାଇ ନ ଥିବାରୁ ସେମାନଙ୍କ ପରିବାରର ଅସୁବିଧାରେ ଥିବା କର୍ମଚାରୀମାନେ କହିଛନ୍ତି। ଅର୍ଥ ମାଗିବା ସମ୍ପର୍କରେ ମେଡିକାଲ ମ୍ୟାନେଜର କହିଛନ୍ତି, ଅଭିଯୋଗ ଭିତ୍ତିହୀନ। କାହାକୁ କାର୍ଯ୍ୟରେ ଯୋଗ ଦେବା ପାଇଁ ଟଙ୍କା ମାଗି ନାହିଁ। ଅନ୍ୟପକ୍ଷରେ ନୂଆ ଠିକା ସଂସ୍ଥା ମାଲିକ କହିଛନ୍ତି, ୧୦ ଜଣ କର୍ମଚାରୀଙ୍କୁ ସମୟ ଦିଆଯାଇଥିଲା। କିନ୍ତୁ ସେମାନେ କାର୍ଯ୍ୟରେ ଯୋଗ ନ ଦେବାରୁ ଅନ୍ୟମାନଙ୍କୁ ନିୟୋଜିତ କରାଯାଇଛି। କାହାରି ନିକଟରୁ ଅର୍ଥ ନିଆଯାଇ ନାହିଁ ବୋଲି ଠିକା ସଂସ୍ଥା ମାଲିକ ପ୍ରକାଶ କରିଛନ୍ତି।