ଦାରିଙ୍ଗବାଡ଼ି,୮।୮(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ କାର୍ଯ୍ୟରତ ବିଭିନ୍ନ ବର୍ଗର ୧ ହଜାରରୁ ଊର୍ଦ୍ଧ୍ୱ ଶିକ୍ଷକଙ୍କ ଦରମା ମିଳୁ ନ ଥିବା ନେଇ ଅସନ୍ତୋଷ ପ୍ରକାଶ ପାଇଛି। ବିଇଓ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁସାରେ, ୩୨୪ ଜଣ ଜେଡିପି ଶିକ୍ଷକଙ୍କ ସମେତ ୧୫୬ ପ୍ରାଥମିକ ଶିକ୍ଷକ, ୪୪ ମଧ୍ୟଇଂରାଜୀ ଏବଂ ଜୁଲାଇରେ ରେଗୁଲାର ହୋଇଥିବା ୨୫ଜଣ ଶିକ୍ଷକଙ୍କ ସମେତ ଅନ୍ୟ ୪ ଶହରୁ ଊର୍ଦ୍ଧ୍ୱ ଶିକ୍ଷକ ରହିଛନ୍ତି। ସେମାନଙ୍କ ମଧ୍ୟରୁ ୫୪୯ ଜଣଙ୍କ ଦରମା ସବ୍ ଟ୍ରେଜେରୀରୁ ବିଲ୍ ପାସ୍ କରାଯାଇ ଦରମା ମଞ୍ଜୁର କରାଯାଇଛି। ତେବେ ଅଦ୍ୟାବଧି ସେମାନଙ୍କ ଦରମା ମିଳି ନ ଥିବା ନେଇ ଅଭିଯୋଗ ହୋଇଛି। ଦରମା ବିଲ୍ ଟ୍ରେଜେରୀକୁ ପଠାଯାଇଥିବା କୁହାଯାଉଥିଲେ ସୁଦ୍ଧା ଦରମା କାହିଁକି ମିଳୁନି ବୋଲି ଶିକ୍ଷକ ସଂଘ ପ୍ରଶ୍ନ କରିଛି। ଅନ୍ୟପକ୍ଷରେ ବିଇଓ ବ୍ରହ୍ମାନନ୍ଦ ରାଉତ ପ୍ରତିକ୍ରିୟା ରଖି କହିଛନ୍ତି, ତାଙ୍କ ନିକଟରେ ୬ କୋଟି ୯୦ ଲକ୍ଷ ଟଙ୍କା ଦରମା ଦେବାକୁ ଆର୍ଥିକ ଅନୁଦାନ ରାଶି ରହିଛି କିନ୍ତୁ କୌଣସି ଟେକ୍ନିକାଲ ସମସ୍ୟା ପାଇଁ ଟ୍ରେଜେରୀ କାର୍ଯ୍ୟାଳୟରେ ଏହା ଅଟକି ରହିଛି ା ୧ ତାରିଖରୁ ଡାଇରେକ୍ଟରଙ୍କ କାର୍ଯ୍ୟାଳୟରୁ ସବ୍ଟ୍ରେଜରୀକୁ ଶିକ୍ଷକଙ୍କ ଦରମା ପ୍ରଦାନ ପାଇଁ ଆର୍ଥିକ ଅନୁଦାନ ଆସିସାରିଛି ବୋଲି ସେ କହିଛନ୍ତି । ତେଣୁ ୬ ତାରିଖରେ ବିଇଓଙ୍କ କାର୍ଯ୍ୟାଳୟରୁ ବିଲ୍ କରି ଟ୍ରେଜେରୀ ପଠାଯାଇଥିବା କାଯର୍ର୍ୟାଳୟର ବରିଷ୍ଠ କିରାଣି ଚିତ୍ତରଞ୍ଜନ ସିଂ କହିଛନ୍ତି। ଏହାକୁ ବିଇଓ ରାଉତ ସ୍ବୀକାର କରିବା ସହ ଶୀଘ୍ର ତାଙ୍କ ଦରମା ମିଳିଯିବ ଏବଂ ବଳକା ୪ଶହରୁ ଊର୍ଦ୍ଧ୍ୱ ବିଭିନ୍ନ ବର୍ଗର ଶିକ୍ଷକଙ୍କୁ ସର୍ବଶିକ୍ଷା ଅଭିଯାନର ଜିଲା କାର୍ଯ୍ୟାଳୟରୁ ଆର୍ଥିକ ଅନୁଦାନ ଆସିଲେ ଦରମା ମିଳିବ ବୋଲି କହିଛନ୍ତି। ତେବେ ବିଇଓ କାର୍ଯ୍ୟାଳୟର ବିଇଓ ଏବଂ ଅନ୍ୟ କର୍ମଚାରୀଙ୍କ ଦକ୍ଷତା ଉପରେ ଶିକ୍ଷକ ସଂଘ ପ୍ରଶ୍ନ କରିଛି। ବିଇଓ କାର୍ଯ୍ୟାଳୟରେ ଏଭଳି ଶିକ୍ଷକଙ୍କ ପ୍ରତି ଅଣଦେଖା ପ୍ରତିବାଦରେ ଆଗାମୀ ଦିନରେ ଆନ୍ଦୋଳନ ପାଇଁ ଶିକ୍ଷକମାନେ ଚେତାବନୀ ଦେଇଛନ୍ତି। ଏନେଇ ବିଇଓ ରାଉତ କହିଛନ୍ତି ଯେ, ବରିଷ୍ଠ କିରାଣିଙ୍କୁ ଭୁବନେଶ୍ୱର ପଠାଯାଇଛି।କେଉଁଠି ସମସ୍ୟା ରହିଛି ତାହା ଜଣାପଡ଼ିବ। ଏନେଇ ସବ୍ ଟ୍ରେଜେରୀର ଅଧିକାରୀ ରଜନୀକାନ୍ତ ଭୋଇଙ୍କ ସହ ଯୋଗାଯୋଗ କରାଯିବାରୁ ଆର୍ଥିକ ଅନୁଦାନ ଆସିନାହିଁ। ଯାହା ଆସିଥିଲା ତାହା ଗତ ମଙ୍ଗଳବାର ଏବଂ ଶୁକ୍ରବାର କିଛି ବିଲ୍ ପାସ କରାଯାଇଛି।
ସୂଚନାଯୋଗ୍ୟ, ସବ୍ଟ୍ରେଜେରୀ କାର୍ଯ୍ୟାଳୟ ସହ ବିଇଓ କାର୍ଯ୍ୟାଳୟର ମତାମତରେ କୌଣସି ତାଳମେଳ ରହୁନଥିବାରୁ ଶିକ୍ଷକମାନଙ୍କ ଦରମା ମିଳିବା ନେଇ ଅନିଶ୍ଚିତତା ଦେଖାଯାଇଛି। ଫଳରେ ଅସନ୍ତୋଷ ବୃଦ୍ଧି ପାଇବା ସହ ଶିକ୍ଷକ ସଂଘ ଏବଂ ବିଇଓଙ୍କ କାର୍ଯ୍ୟ ମଧ୍ୟରେ ତିକ୍ତତା ବୃଦ୍ଧିପାଉଛି।