ବ୍ରହ୍ମପୁର ଅଫିସ,୨୬ା୧୧-ସିପିଏମ୍ ବ୍ରହ୍ମପୁର ଆଞ୍ଚଳିକ କମିଟି ପକ୍ଷରୁ ସୋମବାର ଉପଜିଲାପାଳଙ୍କ ଅଫିସ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି ନିୟନ୍ତ୍ରଣ କରିବାରେ କେନ୍ଦ୍ର ସରକାରଙ୍କ ବିଫଳତା ପ୍ରତିବାଦରେ ଏହି ଆନ୍ଦୋଳନ ସୂତ୍ରପାତ ହୋଇଥିଲା। କମିଟି ସମ୍ପାଦକ ଯୁଧିଷ୍ଠିର ବେହେରା ଏହାର ନେତୃତ୍ୱ ନେଇଥିଲେ। ଗଞ୍ଜାମ ଜିଲା କମିଟି ସମ୍ପାଦକ କୈଳାସ ଷଡ଼ଙ୍ଗୀଙ୍କ ସମେତ ବିଦ୍ୟାଧର ଜେନା, କିଶୋର ମିଶ୍ର ଓ ବସନ୍ତ ନନ୍ଦ ପ୍ରମୁଖ ଆୟୋଜିତ ପ୍ରତିବାଦ ସମାବେଶରେ କେନ୍ଦ୍ରର ଜନମାରଣ ନୀତି ବିରୋଧରେ ବର୍ଷିଥିଲେ। ୨୦୧୪ ସାଧାରଣ ନିର୍ବାଚନ ବେଳେ ଭାଜପା ନେତୃତ୍ୱାଧୀନ ଏନ୍ଡିଏ ସରକାର ଦେଇଥିବା ପ୍ରତିଶ୍ରୁତି କାର୍ଯ୍ୟକାରୀ ନ କରି କେବଳ ପୁଞ୍ଜିପତି ତୋଷଣ ନୀତି ଚଳାଇଥିବା ବାମପନ୍ଥୀ ନେତାମାନେ ତୀବ୍ର ସମାଲୋଚନା କରିଥିଲେ। ମହଜୁଦକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ କରାଯାଉ ନ ଥିବାରୁ ମନଇଚ୍ଛା ଦରବୃଦ୍ଧି କରାଯାଉଥିବା ଅଭିଯୋଗ ହୋଇଥିଲା। ଆନ୍ଦୋଳନ ସ୍ଥଳରେ କୁହାଯାଇଥିଲା କେନ୍ଦ୍ର ସରକାର ଗଣତାନ୍ତ୍ରିକ ବ୍ୟବସ୍ଥାକୁ ଦଳିମକଚି ସାଧାରଣ ଜନତାଙ୍କୁ କଲବଲ କରୁଛନ୍ତି। ଏବେ ପିଆଜର ମୂଲ୍ୟବୃଦ୍ଧି ଗରିବ, ଖଟିଖିଆ ଓ ସବୁବର୍ଗର ଲୋକଙ୍କୁ କନ୍ଦାଉଛି । ସରକାର ପିଆଜ ଚାଷୀଙ୍କୁ ସହାୟକ ମୂଲ୍ୟ ଦେଇଥିଲେ ଏଭଳି ଘଟଣା ଘଟି ନ ଥାନ୍ତା ବୋଲି ନେତାମାନେ କଟାକ୍ଷ କରିଥିଲେ। ସରକାରୀ ଖୁଚୁରା ବିକ୍ରି କେନ୍ଦ୍ରରେ ସ୍ବଳ୍ପ ମୂଲ୍ୟରେ ଆଳୁ, ପିଆଜ ଯୋଗାଇବା ଏବଂ ପିଆଜ ଚାଷୀଙ୍କୁ ସମସ୍ତ ସୁବିଧା ଯୋଗାଇବାକୁ ଦାବି କରାଯାଇଥିଲା। ସମାବେଶରେ ଅନ୍ୟମାନଙ୍କ ମଧ୍ୟରେ ଶିବ ପ୍ରସାଦ ମହାପାତ୍ର, ବାବୁଲା ନାୟକ, ହରି ନାହାକ, ଚିଟି ବାବୁ, ରଞ୍ଜନ ପାତ୍ର, ଊର୍ମିଳା ଜେନା, ବିଷ୍ଣୁପ୍ରିୟା ସାହୁ, ପଞ୍ଚାନନ ଜେନା, ଆଦିତ୍ୟ ପାଣିଗ୍ରାହୀ ପ୍ରମୁଖ ଭାଷଣ ପ୍ରସଙ୍ଗରେ ରାଜ୍ୟ ସରକାର ଦରଦାମ କମାଇବାରେ ଚୁପ ରହିଥିବା ଅଭିଯୋଗ କରିଥିଲେ ।
ଅବସରରେ ସିପିଏମ୍ର ଏକ ପ୍ରତିନିଧି ଦଳ ଜିଲାପାଳ ଓ ଉପଜିଲାପାଳଙ୍କୁ ଭେଟି ଆଦିବାସୀଙ୍କୁ ଜଙ୍ଗଲ ଜମି ଅଧିକାର ଦେବା, ଆଙ୍କୁଲି ରେଲୱେ ଓଭରବ୍ରିଜ ନିର୍ମାଣ କାର୍ଯ୍ୟ ତୁରନ୍ତ ସମ୍ପୂର୍ଣ୍ଣ କରିବା ପାଇଁ ଦାବି କରିଥିଲେ। ଦରବୃଦ୍ଧି ନିୟନ୍ତ୍ରଣ ପାଇଁ ଜିଲାପାଳ ହସ୍ତକ୍ଷେପ କରିବା ପାଇଁ ଗୁରୁତ୍ୱ ଦିଆଯାଇଥିଲା।