ବିରିଡ଼ି,୧୪ା୮(ଡି.ଏନ.ଏ.): ଦଳେଇଘାଇଠାରେ ବୁଧବାର ବନ୍ୟାଜଳ ବିପଦ ସଙ୍କେତଠାରୁ ୪ଫୁଟ୍ ୯ଇଞ୍ଚ୍ ତଳେ ପ୍ରବାହିତ ହେଉଛି। ଅର୍ଥାତ୍ ସନ୍ଧ୍ୟାରେ ୫୨ ଫୁଟ୍ ୩ ଇଞ୍ଚ ରହିଛି। ଏଣୁ ଆଗକୁ ବନ୍ୟାଜଳ ବଢ଼ିବା ଆଶଙ୍କା କରାଯାଉଛି। ଏଥିପାଇଁ ଜଳସମ୍ପଦ ବିଭାଗ ଅଭିଜ୍ଞ ଅଧୀକ୍ଷଣଯନ୍ତ୍ରୀ ବିଜୟ କୁମାର ସାମଲଙ୍କୁ ଜଳସମ୍ପଦ ବିଭାଗ ଦଳେଇଘାଇ ସମେତ ଜଗତ୍ସିଂହପୁର ଡିଭିଜନରେ ଯେପରି ବନ୍ୟା ନ ହେବ ସେଥିପ୍ରତି ନଜର ରଖିବାକୁ ପଠାଇଛନ୍ତି। ଅଧୀକ୍ଷଣ ଯନ୍ତ୍ରୀ ସାମଲ ଦଳେଇ ଘାଇ ଗେଜ ପାଖରେ ପହଞ୍ଚି ବନ୍ୟାଜଳକୁ ଅନୁଧ୍ୟାନ କରିଥିଲେ। ଏଥିସହିତ ସେ ଜଗତ୍ସିଂହପୁର ନିର୍ବାହୀଯନ୍ତ୍ରୀ ଉମାକାନ୍ତ ମହାନ୍ତି ଓ ବିଲୁଆଖାଇ କେନାଲ ସବ୍ଡିଭିଜନର ସହକାରୀ ନିର୍ବାହୀଯନ୍ତ୍ରୀ ଦଳପତି ମଣ୍ଡଳଙ୍କୁ ସଜାଗ ରହିବା ପାଇଁ କହିଛନ୍ତି। ଦଳେଇଘାଇଠାରେ ବିପଦ ସଙ୍କେତ ୫୭ଫୁଟ ରହିଛି। ଏହି ଘାଇ ୧୯୫୫ ଓ ୧୯୮୨ ମସିହାରେ ବନ୍ଧ ଭାଙ୍ଗି ସାରା ଜିଲାକୁ ବନ୍ୟା ପ୍ଳାବିତ କରିଥିଲା। ଯଦି ପୁନର୍ବାର ବନ୍ୟାହୁଏ ତେବେ ସାରାଜିଲା ବନ୍ୟା ପ୍ଳାବିତ ହୋଇଯିବ। ଏଥିପାଇଁ ବୁଧବାର ରାତିରେ ଦଳେଇଘାଇ ନଦୀବନ୍ଧରେ ପହରା ବ୍ୟବସ୍ତା କରାଯାଇଛି ବୋଲି ସହକାରୀ ନିର୍ବାହୀ ଯନ୍ତ୍ରୀ ମଣ୍ଡଳ କହିଛନ୍ତି। ତେବେ ଦଳେଇଘାଇ ସେକ୍ଶନ୍ରେ ୧୫ ହଜାର, ବାଲିଆରେ ୧୫ ହଜାର ଓ ୨୨ ମୌଜାରେ ୧୦ ହଜାର ଖାଲି ବସ୍ତା ରଖାଯିବା ସହ କେବଳ ୧ ହଜାର ୭୫ ଘନମିଟର ବାଲି ମହଜୁଦ ଥିବା ଯନ୍ତ୍ରୀ ମଣ୍ଡଳ ସୂଚନା ଦେଇଛନ୍ତି।