କରାଚୀ,୨୦।୬(ପି.ଟି.)- ଦଳର ପ୍ରଦର୍ଶନକୁ ନେଇ ପାକିସ୍ତାନ କ୍ରିକେଟ ବୋର୍ଡ (ପିସିବି) ଏବେ ବେଶ୍ ଗୁରୁତ୍ୱ ଦେବା ଆରମ୍ଭ କରିଛି। ଜାତୀୟ ଦଳ ସହ ସପୋର୍ଟ ଷ୍ଟାଫ୍, ହେଡ୍ କୋଚ୍ ମିକି ଆର୍ଥରଙ୍କ ପ୍ରଦର୍ଶନକୁ ନେଇ ପିସିବି ଏବେ ତର୍ଜମା କରିବ। ବିଶ୍ୱକପ୍ ପରେ ଗତ ୩ ବର୍ଷର ପ୍ରଦର୍ଶନକୁ ନେଇ ପିସିବି ବଡ଼ଧରଣ ସମୀକ୍ଷା କରିବ। ବୁଧବାର ଲାହୋରରେ ପିସିବିର ବୋର୍ଡ ଅଫ୍ ଗଭର୍ନରମାନେ ବୈଠକରେ ବସି ଚଳିତ ବିଶ୍ୱକପ୍ ପ୍ରଦର୍ଶନ ନେଇ ମଧ୍ୟ ସମୀକ୍ଷା କରାଯିବ ବୋଲି ନିଷ୍ପତ୍ତି ନେଇଛନ୍ତି। ବିଶ୍ୱକପ୍ରେ ପାକିସ୍ତାନର ପ୍ରଦର୍ଶନ ଆଶାନୁରୂପ ହୋଇପାରି ନାହିଁ। ବିଶ୍ୱକପ୍ରେ ପାକିସ୍ତାନ ଏପର୍ଯ୍ୟନ୍ତ ୫ଟି ମ୍ୟାଚ୍ ଖେଳି କେବଳ ଗୋଟିଏ ବିଜୟ ହାସଲ କରିଛି। ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତଠାରୁ ପରାସ୍ତ ହେବା ଦ୍ୱାର ପାକିସ୍ତାନ ପ୍ରଶଂସକ ଓ କ୍ରିକେଟ ପ୍ରଶାସକ ନିରାଶ ହୋଇଛନ୍ତି। ପାକିସ୍ତାନ ଦଳ ସବୁ ମହଲରୁ ସମାଲୋଚନାର ଶିକାର ହୋଇଛି। ଦଳର ସବୁ ଫର୍ମାଟର ପ୍ରଦର୍ଶନ ନେଇ ଏହି ବୈଠକରେ ଆଲୋଚନା ହୋଇଥିଲା। ତେବେ ପାକିସ୍ତାନ ପ୍ରତ୍ୟାବର୍ତ୍ତନ କରି ବାକିଥିବା ୪ଟି ମ୍ୟାଚ୍ରେ ଦମ୍ଦାର ପ୍ରଦର୍ଶନ କରି ବିଜୟୀ ହେବ ବୋଲି ବୈଠକରେ ଆଶା ପ୍ରକାଶ କରାଯାଇଛି। ଦଳର ପ୍ରଦର୍ଶନକୁ ନେଇ ତର୍ଜମା କରାଯିବା ପରେ ବୋର୍ଡ ଅଧ୍ୟକ୍ଷଙ୍କୁ ରିପୋର୍ଟ ପ୍ରଦାନ କରାଯିବ ବୋଲି କୁହାଯାଇଛି। ଯଦି ପାକିସ୍ତାନ ବିଶ୍ୱକପ୍ରେ ଆଶାନୁରୂପ ପ୍ରଦର୍ଶନ କରି ନ ପାରେ ତେବେ ଦଳ ସମେତ ଅଧିନାୟକ, ହେଡ କୋଚଙ୍କ ସମେତ ଟିମ୍ ମ୍ୟାନେଜମେଣ୍ଟରେ ଆମୂଳଚୂଳ ପରିବର୍ତ୍ତନ କରାଯିବ। ଆସନ୍ତା ମାସ ହେଡ୍ କୋଚ୍ଙ୍କ କାର୍ଯ୍ୟକାଳ ଶେଷ ହେବାକୁ ଯାଉଛି।