ମେଲବୋର୍ନ,୩୦।୧୨(ପି.ଟି)- ଅଷ୍ଟ୍ରେଲିଆ ପୂର୍ବତନ ଅଧିନାୟକ ରିକି ପଣ୍ଟିଂ ଦଶନ୍ଧିର ଟେଷ୍ଟ ଦଳ ଚୟନ କରିଛନ୍ତି। ତାଙ୍କର ଏହି ଦଳରେ ସେ ଭାରତୀୟ ଅଧିନାୟକ ବିରାଟ କୋହଲିଙ୍କୁ ନେତୃତ୍ୱ ପ୍ରଦାନ କରିଛନ୍ତି। ଏହି ଦଳରେ ୪ଜଣ ଇଂଲଣ୍ଡ କ୍ରିକେଟରଙ୍କୁ ମଧ୍ୟ ସେ ସ୍ଥାନ ଦେଇଛନ୍ତି। ତେବେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଟେଷ୍ଟ ର଼୍ୟାଙ୍କିଙ୍ଗ୍ରେ ଭାରତ ୧ ନମ୍ବର ସ୍ଥାନରେ ରହିଥିଲେ ମଧ୍ୟ କୋହଲିଙ୍କୁ ବାଦ୍ ଦେଲେ ସେ ଦଳରେ ଅନ୍ୟ କୌଣସି ଭାରତୀୟ ଖେଳାଳିଙ୍କୁ ନେଇ ନାହାନ୍ତି।
ଏହି ଦଳରେ ସାମିଲ ହୋଇଥିବା ଇଂଲଣ୍ଡ ଖେଳାଳିମାନେ ହେଲେ ଅଲରାଉଣ୍ଡର ବେନ୍ ଷ୍ଟୋକ୍ସ, ବ୍ୟାଟ୍ସମ୍ୟାନ ଆଲିଷ୍ଟର କୁକ ଓ ଦୁଇ ଦ୍ରୁତ ବୋଲର ଷ୍ଟୁଆର୍ଟ ବ୍ରଡ ଓ ଜେମ୍ସ ଆଣ୍ଡରସନ। ସେହିପରି ଅଷ୍ଟ୍ରେଲିଆ ଖେଳାଳିମାନଙ୍କ ମଧ୍ୟରେ ଅଭିଜ୍ଞ ଷ୍ଟିଭ୍ ସ୍ମିଥ୍, ଓପନର ଡେଭିଡ ଓ୍ବାର୍ନର ଓ ସ୍ପିନର ନାଥନ ଲିୟନଙ୍କୁ ସେ ଦଳରେ ସାମିଲ କରିଛନ୍ତି। ଏବେ ସମସ୍ତେ ଦଶନ୍ଧିର ଦଳ ଚୟନ କରୁଛନ୍ତି। ତେଣୁ ମୁଁ ବି ଏଥିରେ ସାମିଲ ହେବି ବୋଲି ପଣ୍ଟିଂ ତାଙ୍କ ଟୁଇଟର ହ୍ୟାଣ୍ଡଲରେ ଉଲ୍ଲେଖ କରିଛନ୍ତି।
ଉଲ୍ଲେଖଥାଉ କି, କୋହଲି ଏପର୍ଯ୍ୟନ୍ତ ୭୦ଟି ଅନ୍ତର୍ଜାତୀୟ ଶତକ ହାସଲ କରିଛନ୍ତି। ତେବେ ୭୧ଟି ଶତକ ହାସଲ କରି ପଣ୍ଟିଂ ଓ ୧୦୦ଟି ଅନ୍ତର୍ଜାତୀୟ ଶତକ ହାସଲ କରି ସଚିନ ତେନ୍ଦୁଲକର ତାଙ୍କ ଉପରକୁ ରହିଛନ୍ତି। କ୍ରିକେଟର ୩ଟି ଯାକ ଫର୍ମାଟରେ କୋହଲିଙ୍କ ହାରାହାରି ରନ୍ ସଂଗ୍ରହ ୫୦ରୁ ଊର୍ଦ୍ଧ୍ୱ ରହିଛି। ସର୍ବାଧିକ ରନ୍ ସଂଗ୍ରହ ତାଲିକାରେ କୋହଲି ୨୧,୪୪୪ ରନ ସଂଗ୍ରହ କରି ତୃତୀୟ ସ୍ଥାନରେ ରହିଛନ୍ତି। ସଚିନ ୩୪,୩୫୭ ଓ ପଣ୍ଟିଂ ୨୭,୪୮୩ ରନ ସଂଗ୍ରହ କରି ଯଥାକ୍ରମେ ପ୍ରଥମ ଓ ଦ୍ୱିତୀୟ ସ୍ଥାନରେ ରହିଛନ୍ତି। ୨୦୧୯ରେ କୋହଲି ମଧ୍ୟ ସର୍ବାଧିକ ରନ ସଂଗ୍ରହ କରିଛନ୍ତି। ଆଇସିସି ଟେଷ୍ଟ ଓ ଦିନିକିଆ ର଼୍ୟାଙ୍କିଙ୍ଗ୍ରେ କୋହଲି ୧ ନମ୍ବର ସ୍ଥାନରେ ରହିଛନ୍ତି। କ୍ରିକେଟ ଅଷ୍ଟ୍ରେଲିଆ ନିଉଜ୍ ଓ୍ବେବ୍ ସାଇଟ୍ରେ ପ୍ରକାଶିତ ହୋଇଥିବା ଦଶନ୍ଧିର ଟେଷ୍ଟ ଏକାଦଶରେ ମଧ୍ୟ କୋହଲିଙ୍କୁ ନେତୃତ୍ୱ ପ୍ରଦାନ କରାଯାଇଛି।
ପଣ୍ଟିଂଙ୍କ ଟେଷ୍ଟ ଦଳ: ବିରାଟ କୋହଲି (ଅଧିନାୟକ), ଡେଭିଡ ଓ୍ବାର୍ନର, ଆଲିଷ୍ଟର କୁକ, କେନ୍ ଓ୍ବିଲିୟମସନ, ଷ୍ଟିଭ୍ ସ୍ମିଥ୍, କୁମାର ସାଙ୍ଗକରା (ଉଇକେଟ କିପର), ବେନ୍ ଷ୍ଟୋକ୍ସ, ଡେଲ ଷ୍ଟେଇନ୍, ନାଥନ ଲିୟନ, ଷ୍ଟୁଆର୍ଟ ବ୍ରଡ ଓ ଜେମ୍ସ ଆଣ୍ଡରସନ।
