ଲାଠୋର, ୧୧ା୯ (ଡି.ଏନ୍.ଏ.): ଗଲା କେତେଦିନ ଧରି ହେଇଥିବାର ଲଘୁଚାପ ବରଷାରେ ବଲାଙ୍ଗୀର ଜିଲାରେ ବହୁତ୍ ଲୁକ୍କର କ୍ଷୟକ୍ଷତି ହେଇଛେ। ସେନ୍ତା ଜିଲାର ଖପ୍ରାଖୋଲ ବ୍ଲକ ଲାଠୋର ଗଁାର ଆରଝନେ ଗରିବ୍କଁର ଘର ବରଷା ପାଏନ୍ରେ ଭାଂଗି ଯାଇଥିବାର ଜନାଯାଇଛେ।
ସୂଚନା ଅନ୍ସାରେ ଲାଠୋର ଗଁାର ତଲିପଡ଼ାରେ ସ୍ବର୍ଗତ ମଧୁସୂଦନ ଖର୍ସେଲ। ମାଏକିନା ପୁନେ, ଝି’ ଯଶୋବନ୍ତି ଆର ପୁଓ କୁବେରକୁଁ ନେଇ ତାକର ସୁଖର ସଁସାର ଥିଲା। ସଁପତି କହେଲେ ଏକ୍ରେ ଜମି ରହିଛେ। ଯେନ୍ ଏକ୍ରେ ଜମି ଅଛେ ସେଟା ବି ଚାଷ୍ବାସ କରବାର ବତ୍ରେ ନଁାଇଁନ। ସେଥିରଲାଗି ମଧୁସୂଦନ କୁଲିମଜୁରି କରବାର ସଂଗେ ଦାଦନ ଯାଇ କୁଟୁମ୍ ପୁଷୁଥିଲେ। ଅଭାବ ଅନାଟନ ଲାଗି ସେ ଜୀବନ୍ରେ ଭଲ ଘରଖଁଡ଼େ କରି ନାଇଁପାରି। ଆଏଜ୍କେ ୨୧ ବଛର ତଲେ ମଧୁସୂଦନ କୁଟୁମବସିଆ ଦାଦନ ଯାଇଥିଲେ। ସେଠାନେ ମାଏକିନା ପୁନି ନିଖୋଜ ହେଇଗଲେ, ତାକର ପତା ନାଇଁ ମିଲ୍ଲା। ମନ୍ଦୁଖ କରି ପରିବାର ଲୋକ ଗଁାକେ ଫିରିଥିଲେ। ଇ ଘଟନାର ବଛ୍ରେ ଉତାରୁ ମଧୁସୂଦନ ବି ଆରପାରକେ ଚାଲିଗଲେ। ଏନ୍ତାଥି ଦୁଇ ଭାଇବହେନ୍ ଅନାଥ ହେଇଗଲେ। ପଛେ କୁବେର ନିଜେ କୁଲିମଜୁରି, ଦାଦନ ଯାଇ ବହେନ୍କେ ବିହାଚୁରା କଲେ। ହେଲେ ଆଏଜତକ୍ କୁବେର ବି ଭଲ ଘରଖଁଡ଼େ ନାଇଁ କରିପାରି। ସେ ବାପ୍ ଅମଲୁଥିବାର ଦଦ୍ରା ଖପର ଘରେ ରହୁଛନ୍। ହେଲେ ଦିନାକେ ତଲେ ହେଇଥିବାର ଲଘୁଚାପ ବରଷା ତାହାକୁ ବାସହୀନ କରିଦେଇଛେ। ପୁରନାକାଲିଆ ଘରଟା ବରଷାଥି ଭାଂଗି ଯାଇଛେ। ଏହେଦେ କୁବେର ନିଜର ବଡ଼ବାପା ଘରେ ଆଶ୍ରେ ନେଇଛନ୍। କୁଲିମଜୁରି କରି ନିଜର ପେଟ୍ ପାଲୁଛନ୍। ଇଆଡ଼େ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି କୁବେର ଆବେଦନ କରି ନିରାଶ ହେଇଛନ୍। କୁବେର ଲାଠୋର ରାଜସ୍ବ ନିରୀକ୍ଷକଁର ଅଫିସରୁ ଘରଭଂଗା ସାହାଯ୍ ବାବ୍ଦେ ପଲିଥିନ୍ ଖଁଡ଼େ ପାଇଛନ୍। ଏତ୍କିରେ ବିଭାଗ ବି ତାର ଦାଇତିଅ ସାରିଦେଇଛେ। ଜିଲା ପରଶାସନ ଇ ମା’ବାପ୍ ଛେଉଁଡ଼ ଗରିବ୍ ଯୁବକ୍କେ ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ପଡ଼ାବାସୀ ଦାବି କରିଛନ୍।