ଲାଠୋର, ୧୦ା୯ (ଡି.ଏନ୍.ଏ.):
ବଲାଙ୍ଗୀର ଜିଲାରେ ଦିନାକେତେ ହେଲା ଲଘୁଚାପ ପରଭାବରେ ଭରଷା ଲାଗି ରହିଛେ। ବରଷା ପାଏନ୍ରେ ଅନେକ୍ ପରିବାରର ଘରଦୁଆର ଭାଂଗି ବେସାହାରା ହେଇଯାଇଛନ୍। ସେନ୍ତା ଅନେକ ଲୁକ୍କର ଘର ଭିତରେ ଅଁାଠେ ପାଏନ୍ ପଶି ସବୁ ଜିନିଷପାତି, ଧାନ୍ଚାଉଲ ଖରାପ ହେଇଯାଇଛେ। ହେଲେ ଇ ଦିଗେ ପରଶାସନ ତତ୍ପର ନାଇଁଥିବାର ଲୋକ୍ ଅଭିଯୋଗ କରିଛନ୍।
ସୂଚନା ଅନ୍ସାରେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପଁଚେତ୍ ସଦର ଗଁାର ମହାଦେବ ମନ୍ଦିର ପଡ଼ାର ତେଜରାମ ଶବରକଁର ଘର ପୂରାପୂରି ଭାଂଗି ଯାଇଛେ। ଏନ୍ତାଥି ପରିବାର ଲୋକ୍ ବେସାହାରା ହେଇଯାଇଛନ୍। ତେଜରାମକଁର ପରିବାର କହେଲେ ମାଏକିନା ପୁଷ୍ପାଞ୍ଜଳି, ଦୁଇ ପୁଓ ଧନଞ୍ଜୟ, ଖଗେଶ୍ୱର ଆର ବୁରୁଧ୍ ବାପ୍କେ ନେଇ ସଁସାର। ବାପ୍ଅଜା ଅମଲରୁ ୧ ଏକର ୫୦ ଡେସିମିଲ ଜମି ରହିଛେ। ସବୁ ଜମି ଚାଷ୍ କଲାଲେଖେଁ ନୁହେ। ଗଲା ୩ ବଛର ହେଲା ପଏସା କଉଡ଼ ଅଭାବୁ ତେଜରାମ ଚାଷ୍ବାସ ନାଇଁ କରିପାରି। ଏନ୍ତାଥି ସେ କୁଲିମଜୁରି କରି କୁଟୁମ ପୁଷୁଛନ୍। ଟଁକା ପଏସା ଅଭାବୁ ସେ ଆଏଜ୍ତକ ଭଲ ଘରଖଁଡ଼େ ତିଆରି ନାଇଁପାରି। କୁଟୁମବସିଆ ଗୁଟେ ଖପର ଘରେ ରହୁଥିଲେ। ହେଲେ ଇ ଲଘୁଚାପ ବରଷାରେ ତାକର ଘରଟା ପୂରା ମାଡ଼ି ବସିଛେ। ଏନ୍ତାଥି ପରିବାରଟା ନିଅଁାସି ପାଲଟିଯାଇଛେ। ତେଜରାମ ଉପେ ଶୂଇନ୍ ହେଇ କୁଟୁମକେ ଶାଶ୍ ଘରେ ଛାଡ଼ିଦେଇଛନ୍। ସେ ନିଜେ ଇନେ ସେନେ ରହି କୁଲିମଜୁରି କରୁଛନ୍। ସେନ୍ତା ମାଲପଡ଼ା ପଁଚେତ୍ ଅଧୀନ ଜଲପାଙ୍କେଲ ଗଁାର ସୁମତି ସୁନା, ହେର୍ଣ୍ଣା ସୁନା, ବିନୋଦ ସୁନା ଆର ମଣି ସୁନାକଁର ଘରେ ପାଏନ୍ ପଶି ବେହାଲ କରି ପକେଇଛେ। ଇ ଗରିବ ପରିବାରମାନେ ପରହର କାମ୍ବୁତା କରବାର ସଂଗେ ବିହାବରପନ୍, ଉଛବ୍ରେ ବଜାବଜେଇ ପେଟ୍ ପାଲୁଛନ୍। ପକାଘର ଇ ପରିବାରମାନକର ଲାଗି ଆଏଜ୍ ବି ସାତ୍ସପନ ହେଇ ରହିଛେ। ଆଏଜ୍କେ ୩୦ ବଛର ହେଲା ଇ ଗରିବ୍ ପରିବାରମାନେ ମାଏଟ୍ ଖପରଘରଟେ ଲେଖେଁ କରି ମୁଡ଼ ଗୁଁଜିଛନ୍। ହେଲେ ଇ ଝରି ବରଷାରେ ଘରମାନକର ଅବସ୍ତା ଏନ୍ତା ହେଇଛେ ଯେ, ଘରେ କାହିଁ ଶୁଖା ଜାଗାଟେ ନଁାଇଁନ। ଅନେକ୍ ପରିବାରର କଁାଥିମାନ ପାଏନ୍ ଖାଇ ବିପଦ୍ ଅବସ୍ତାରେ ରହିଛେ। କେତେବେଲେ କଁାଥିମାନ ମାଡ଼ି ବସ୍ବା କିଛି କହି ନାଇଁହୁଏ। ଭଏରେ ଅନେକ୍ ପରିବାର ନିଜର କୁଟୁମ୍ମାନକୁ ଲାଗେଲେସର ଘରମାନକୁ ପଠେଇ ଦେଇଥିବାର କହିଛନ୍। ସରକାରକଁର ପ୍ରଧାନମନ୍ତ୍ରୀ ଆବାସ, ଇନ୍ଦିରା ଆବାସ, ବିଜୁ ପକ୍କାଘର ଯୋଜନାରେ ସାମିଲ ହେବାର ଲାଗି ଇ ଗରିବ୍ ପରିବାରମାନେ ପଁଚେତ୍ନୁ ବ୍ଲକ ତକ୍ ଦଉଡି ଦଉଡି ନିରାଶ ହେଇଛନ୍। ଏନ୍ତା ପରିସ୍ଥିତିରେ ଜିଲା ପରଶାସନ ଇ ଗରିବ୍ ପରିବାରମାନକର ଉପରେ ଦୁରୁଷ୍ଟି ଦେଇ ଘରଭଂଗା ସଂଗେ ସରକାରୀ ଯୋଜନାରେ ପକାଘର ଖଁଡ଼େ ଲେଖେଁ ଯୁଗେଇ ଦେବାକେ ଦାବି ହେଉଛେ।