ପୁରୁଣାକଟକ,୧୭।୧୦(ଡି.ଏନ୍.ଏ.)- ବୌଦ୍ଧ ଜିଲା ହରଭଙ୍ଗା ବ୍ଲକ ପୁରୁଣାକଟକ ପଁଚେତ୍ ଅଧୀନ କମଳପୁର ଗଁାର ଭିକୁ ହଂସ(୩୪)। ସେ ବାଙ୍ଗାଲୋରକେ ଦାଦନ୍ ଖଟିଯାଇ ଶୋଭା ଲିମିଟେଡ୍ କମ୍ପାନୀରେ ମାର୍ବଲ ଶ୍ରମିକ ହିସାବେ କାମ୍ କରୁଥିଲାବେଲେ କେହେନ୍ସି କାରନ୍ରୁ ଅଗଷ୍ଟ ୧ ତାରିଖ୍ରେ ତାକର ମୁର୍ତୁ ହେଇଥିଲା। ପରିବାର ଲୋକ୍ ପୁରୁଣାକଟକ ପୁଲିସ ଆର ଜିଲା ପରଶାସନକେ ଜନାଲା ଉତାରୁ ପରଶାସନର ସାହାଯ୍ରେ ଭିକୁକଁର ଶବ ଗଁାକେ ଆସିଥିଲା। ଭିକୁ କାମ୍ କରୁଥିବାର କମ୍ପାନୀ କତୁରପକ୍ଷ ଶୁଧିକାଯ୍ ଆର ତାକର ବିଧବା ମାଏକିନା ରଶ୍ମୀ, ୨ ବଛରର ଝି’ ଲିପ୍ସାକଁର ଚଲବାର ଲାଗି ୧୫ ଦିନ୍ ଭିତରେ ୫ ଲାଖ୍ ଟଁକା ପଠେଇ ଦେମୁ କହି ସବୁ କାଗଜପତର, ପାସବହି ନମ୍ବର ନେଇଥିଲେ। ହେଲେ ଆଏଜ୍କେ ପାଖାପାଖି ୨ ମାସ ବିତିଯାଇଥିଲେ ବି କମ୍ପାନୀ କତୁରପକ୍ଷ ଟଁକା ଦେବାର ତ ଦୂରର କଥା ତାହାକୁ ଯୋଗାଯୋଗ କଲେ ବି ଉତର ନାଇଁ ମିଲବାର ବଲି ରଶ୍ମୀ କହିଛନ୍। ଘରର ଝନେ ବଲି ରୁଜଗାରିଆ ଲୋକ୍ ଥିଲେ ଭିକୁ। ତାକର ଚାଲିଗଲା ଉତାରୁ ମା’ଝି’ ବଡ଼ା ଗୁଲ୍ଗୁଲା ହେଇ ଦିନ୍ ବିତଉଛନ୍। ଏନ୍ତା ପରିସ୍ଥିତିରେ ବି ମା’ଝି’ କମ୍ପାନୀ ଆର ସରକାରୀ ସାହାଯ୍ ପାଏବାରୁ ବଁଚିତ୍ ହେଇ ରହିଛନ୍। ଭିକୁ ଚାଲିଯିବାର ୨ ମାସ ବିତିଯାଇଥିଲେ ବି ରଶ୍ମୀ ବିଧବା ଭତା, ହରିଶ୍ଚନ୍ଦ୍ର ଯୋଜନାର ଟଁକା କି ସରକାରୀ ଯୋଜନାରେ ଆବାସ ଘର ଖଁଡ଼େ ପାଇ ନାଇଁପାରି। ଏନ୍ତାଥି ମା’ଝି ୮୦ ବଛ୍ରିଆ ଶଶୁରକଁର ଭରସାରେ ଗୁଟେ ଭଂଗା ଘରେ ପଲିଥିନ୍ ଢ଼ାପି ରହୁଛନ୍। ପରିବାର ଲୋକ ହରଭଙ୍ଗା ବିଡିଓକୁଁ ସରକାରୀ ସାହାଯ୍ ଲାଗି ୨ ଥର ଗୁହାରି କରି ନିରାଶ ହେଇଥିବାର କହିଛନ୍। ଇ ବାବ୍ଦେ ମତାମତ ଲାଗି ହରଭଙ୍ଗା ବିଡିଓ ରବିନ୍ଦ୍ରନାଥ ଶତପଥୀକୁଁ ଯୋଗାଯୋଗ କରାଯାଇଥିଲେ ବି ତାକର ମତାମତ ନାଇଁ ମିଲିପାରି। ଜିଲାପାଳ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ଗଁାବାସୀ ଦାବି କରିଛନ୍।