ରାୟଗଡା ଅଫିସ୍, ୧୮ା୬- ଦାଦନ ଖଟିବାକୁ ଯାଉଥିବା ବେଳେ ମଙ୍ଗଳବାର ୮ଜଣ ନାବାଳକ ଉଦ୍ଧାର ହୋଇଛନ୍ତି । ଚାଇଲ୍ଡ ଲାଇନ୍ ସଦସ୍ୟ ଏମ୍.କ୍ରିଷ୍ଣାରାଓ, ଲକ୍ଷ୍ମଣ ଶବର, ରଣଜିତ ମାଝୀ ଏବଂ ରାକ୍ଷୀ ପ୍ରଧାନ ଷ୍ଟେଶନ୍ରେ ଚେକଆଉଟ ପାଇଁ ଯାଇଥିଲେ । ଏହି ସମୟରେ ୧ନମ୍ବର ପ୍ଲାଟଫର୍ମରେ ୮ଜଣ ନାବାଳକଙ୍କୁ ଦେଖିବା ପରେ ସେମାନଙ୍କ ସହ ଆଲୋଚନା କରିଥିଲେ । ସେମାନଙ୍କ ମଧ୍ୟରୁ ୫ଜଣ ରାୟଗଡା ଜିଲାର ହୋଇଥିବା ବେଳେ ଅନ୍ୟ ୩ଜଣଙ୍କ ମଧ୍ୟରୁ ଜଣେ କୋରାପୁଟ ଓ ୨ଜଣ କଳାହାଣ୍ଡି ଜିଲାର ବୋଲି ଜାଣିବାକୁ ପାଇଥିଲେ । ତେବେ କେହିଜଣେ ରାୟଗଡା ଜିଲାର ୫ଜଣଙ୍କୁ ଭାଇଜାଗସ୍ଥିତ ଏମ୍ସିସି ପାଣି କାରଖାନାରେ କାମ କରିବାକୁ ନେଇଯାଉଥିବା ବେଳେ ଅନ୍ୟ ୩ଜଣ ବିଜୟଓ୍ବାଡାଠାରେ ଚିଙ୍ଗୁଡି ଫାର୍ମରେ କାମ କରିବାକୁ ଯାଉଥିବା ଚାଇଲ୍ଡ ଲାଇନ୍ ଆଗରେ ପ୍ରକାଶ କରିଥିଲେ । ପରେ ଜିଆର୍ପିକୁ ସୂଚନା ଦେଇ ସମସ୍ତ ପିଲାଙ୍କୁ ଉଦ୍ଧାର କରାଯାଇଥିବା ଚାଇଲ୍ଡ ଲାଇନ୍ ସଂଯୋଜକ କେ.ନିଳିମା କହିଛନ୍ତି । ଏହି ଶିଶୁ ମାନଙ୍କୁ ଶିଶୁ ମଙ୍ଗଳ କମିଟି ସମ୍ମୁଖରେ ହାଜର କରାଯିବା ପରେ କାଉନସେଲିଂ କରି ପରିବାର ସଦସ୍ୟଙ୍କୁ ହସ୍ତାନ୍ତର କରାଯିବ ବୋଲି ଚାଇଲ୍ଡ ଲାଇନ୍ କର୍ତ୍ତୃପକ୍ଷ କହିଛନ୍ତି ।