କଲମପୁର, ୨୯।୮, (ଡି.ଏନ୍.ଏ.): କେନ୍ଦ୍ର ଆର ରାଏଜ୍ ସରକାର ଦାଦନ ସମସିଆ ଉପରେ ଲଗାମ୍ କସବାର ଲାଗି ଅନେକ୍ ଯୋଜନା କାଯ୍କାରୀ କରୁଛନ୍। ହେଲେ ଯୋଜନାର କେହେନ୍ସି ନାଇଁ କେହେନ୍ସି ଜାଗାରେ ପୁଲ୍ ପଡ଼ିଯାଉଛେ। ଯେନ୍ଥିରଲାଗି ଓଡ଼ିଶାରୁ ଦାଦନ ସମସିଆର ଅଁତ୍ ନାଇଁ ହେବାର। ବେଶି କରି ପଶ୍ଚିମ ଓଡ଼ିଶାରୁ ଫିବଛର ହଜାର ହଜାର ସଂଖ୍ୟାରେ ଗରିବ୍ ଦୁଖି ପେଟ୍ପାଟନାର ଲାଗି ଗଁା, ପରିବାର ଛାଡ଼ି ବାହାର ରାଏଜ୍କେ ଦାଦନ ଖଟି ଯାଉଛନ୍। ହେଲେ ସେଠାନୁ ସେମାନେ ଭଲେ ଭଲେ ଫିରବାବେ ବଲି କିଛି ମାନେ ନଁାଇଁନ। ଇ ଦାଦନ ସମସିଆର ଲାଗି ଅନେକ ପରିବାର ଲିହିବିହି ହେଇଯାଉଛେ, ନୂଅଁା ବିହାରି ଝି’ ବିଧବା ସାଜୁଛେ, ଛୁଆପିଲା ବାପ୍ ଛେଉଁଡ୍ ହେଉଛନ୍, ବୁଢ଼ାବୁଢ଼ି ମା’ବାପ୍ ପୁଓକେ ଝୁରି ଝୁରି ଖିଆପିଆ ଛାଡ଼ି ଜୀବନ୍ ହାରି ଦେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କଲମପୁର ବ୍ଲକ କସାବାହି ଗଁାରେ।
ସୂଚନା ଅନ୍ସାରେ କସାବାହି ଗଁାର ବାସିନ୍ଦା ହେଉଛନ୍ ଗୀତାଲି ହରିଜନ। ଆପ୍ନେ ଦିବାକର ହରିଜନ(୩୫) ଚଲତି ମାସର ୩ ତାରିଖ୍ ଗୁଜୁରାଟ ଦାଦନ ଖଟବାକେ ଗଲାବେଲେ ବାଟେ ସୁରତର ବରଦୋଲି ରେଲ୍ ଷ୍ଟେଶନରେ ଦୁରଘଟନାର ଶିକାର ହେଇ ଆରପାରକେ ଚାଲିଯାଇଥିଲେ। ଟଁକା ପଏସା ଅଭାବୁ ପରିବାର, ଲାଗେଲେସର ଦିବାକରକଁର ମଲା ମୁହୁଁ ବି ଦେଖି ନାଇଁପାରଲେ। ଶେଷେ ରେଲ୍ ବିଭାଗ ସେଠାନେ ଦିବାକରକଁର ଶବ ସତ୍କାର କରିଥିଲା। ଏହେଦେ ବିଧବା ଗୀତାଲିକଁର ପରିବାରରେ ବିଧବା ବୁଢ଼ି ଶାଶ୍ ମିନମିୟା(୩୫), ଝି’ ହେମପୁଷ୍ପା(୬) ଆର ପୁଓ ଅଗ୍ନିକ(୩) ରହିଛନ୍। ଘରର ଝନେ ବଲି ରୁଜ୍ଗାରିଆ ମୁନୁଷ୍କେ ହରେଇ ପରିବାରଟା ଭାଂଗିପଡ଼ିଛେ। ପରିବାରଟା କେନ୍ଥେଇ ଚଲବା, ପିଲାଛୁଆକର ଭବିଷତ୍ କାଣା ହେବା ଇ ସବୁ ଚିନ୍ତାରେ ଦୁଇ ଶାଶ୍ ବହ ହରମେଶା ଆଏଁଖ୍ରୁ ଲହ ଝରଉଛନ୍, ଚର୍ହିକୁତି ତାହାକୁ ଅଁଧାର ଦିଶୁଛେ। ଏନ୍ତା ପରିସ୍ଥିତିରେ ଗୀତାଲିକଁର ଉପରେ ପରିବାରର ସବୁ ବୋଝ୍ ରହିଛେ। ଇଆଡ଼େ ଶାଶ୍ ପାଉଥିତ୍ବାର ବିଧବା ଭତା ଆର ରାଶନ କାର୍ଡରେ ମିଲୁଥିବାର ଚାଉଲରେ ପରିବାର ମାସେ ଚଲବାର ସମ୍ଭବ ନୁହେ। ଏନ୍ତାଥି ଦୁଇ ଶାଶ୍ ବହର ଲାଗି କୁଲି ମଜୁରି କରି କୁଟୁମ୍ ପୁଷ୍ବାର ଛଡ଼ା ଉନିଆ ବାଟ୍ ନଁାଇଁନ। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ଗୁଟେ ପୁରନା କାଲିଆ ଭଂଗା ଦଦ୍ରା ମାଏଟ୍ କୁରିଆରେ ମୁଡ଼ ଗୁଁଜିଛନ୍। ଏନ୍ତା ପରିସ୍ଥିତିରେ ଦୁଇ ଶାଶ୍ ବହ ସବୁ ପରକାର ସରକାରୀ ସାହାଯ୍ ଯୁଗେଇ ଦେବାକେ ଗଣମାଧ୍ୟମ ଜରିଆରେ ଜିଲା ଆର ଥାନୀୟ ପରଶାନକେ ଗୁହାରି କରିଛନ୍। ଇ ଅସାହା ପରିବାରକେ ଯେତେ ଜଲଦି ହେବା ସରକାରୀ ସାହାଯ୍ ଯୁଗେଇ ଦେବାକେ ଗଁାବାସୀ ବି ଦାବି କରିଛନ୍।