ସିନାପାଲି,୨।୩ (ଡି.ଏନ୍.ଏ.)- ପରିବାରକେ ଦାନା ଯୁଗାବାର ଲାଗି ପୁଓ ଦାଦନ୍ ଖଟିଯାଇଛେ। ସେ ଘରୁ ଯିବାର ଆଏଜ୍କେ ୬ ମାସ୍ ବିତିଗଲାନ। ଯାଇଛେ ଯେ ଆର ଫିରବାର ନାଇଁ। ତାର କିଛି ଖୋଜ୍ଖବର ନାଇଁ, ଫୋନ୍ କଲେ ନାଇଁ ଲାଗ୍ବାର। ମୋର ଗୁଟେବଲି ପୁଓ। ଏହେଦେ ମୁଇଁ କାଣା କରମି। ମୋତେ ଚାର୍ହିକୁତି ଅଁଧାର ଦିଶୁଛେ। ଦାଦନ ଦଲାଲକେ ପଚ୍ରାଲେ ସେ କିଛି ନାଇଁ କହେବାର। ଏନ୍ତା ଗୁଲ୍ଗୁଲା ହେଇ କାଁଦି କାଁଦି ନିଜର ଦୁଖ୍ ବଖାନିଛନ୍ ନୂଆପଡ଼ା ଜିଲା ସିନାପାଲି ବ୍ଲକ ଟିମନପୁର ପଁଚେତ୍ ଗୋବିନ୍ଦପୁର ଗଁାର ଅଗସ୍ତି ବନ୍ଦିଛୋର।
ସୂଚନା ହିସାବେ ଗୋବିନ୍ଦପୁର ଗଁାର ଅଗସ୍ତି ବନ୍ଦିଛୋରକଁର ପୁଓ ନିରାକାର ବନ୍ଦିଛୋର(୧୭)। ପରିବାରଟା ନିହାତି ଗରିବ୍ ହେଇଥିଲାବେଲେ ନଁାକେ ଜମିବାଡ଼ି ଟିକେ ଅଛେ। ହେଲେ ପରିବାରଟା ଆଏଜ୍ ବି ଅନେକ ସରକାରୀ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍। ଗଲା ବଛର ସେପ୍ଟେମ୍ବର ମାସେ ନୂଆପଡ଼ା ଜିଲା କୋଟାମାଲ ଗଁାର ଦାଦନ ଦଲାଲ ବାସୁ ବାଗ ନିରାକାରକୁଁ ଗୁଜୁରାଟର ସୁରେନ୍ଦ୍ରନଗର ରେଲଓ୍ବେ ପଟ୍ଟିରେ କାମ୍ କରବାର ଲାଗି ଘରୁ ନେଇଥିଲେ। ସେଠାନେ ସେ ନିରାକାରକୁଁ ମାସିକ ୯ ହଜାର ଟଁକା ଦେବାର ସଂଗେ ମାସକିଆ ଖରଚ୍ ୨ଶହ ଟଁକା ଦେବାର ବାବ୍ଦେ ତାକର ଘରେ କଥା ଦେଇଥିଲେ। ସେ ଘରୁ ଗଲା ଉତାରୁ ୨ ମାସ ତକ୍ ପରିବାର ସଂଗେ ଫୋନରେ କଥାବାରତା ହେଉଥିଲେ। ହେଲେ ଆଏଜ୍କେ ୪ ମାସ୍ ହେଲା ନିରାକାରକଁର ସଂଗେ ପରିବାର ଲୋକ୍ ଫୋନରେ ଯୋଗାଯୋଗ କରି ନାଇଁ ପାରବାର। ଏନ୍ତାକି ଇ ବାବ୍ଦେ ନିରାକାରକୁଁ ନେଇଥିବାର ଦଲାଲକେ ପଚ୍ରାଲେ ବି ସେ କିଛି ନାଇଁ କହେବାର। ଯେନ୍ଥିରଲାଗି ପରିବାର ଲୋକ ଆଶଁକାରେ ରହିଛନ୍। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ପୁଓ ଘରର ଥିତି ସଲଖାବାକେ ଦାଦନ ଖଟି ଯାଇଥିଲେ। ହେଲେ ଆଏଜ୍ତକ ସେ ଘରକେ ନାଇଁ ଫିରି। ଏନ୍ତାଥି ପରିବାର ଲୋକ୍ ଆଏଜ୍ ବି ଆଶ୍ ଆର ଆଶଁକାରେ ପୁଓର ଫିରବାର ବାଟ୍କେ ଚାହିଁ ରହିଛନ୍। ଅନେକ ଦିନ୍ ଉତାରୁ ବି ନିରାକାର ନାଇଁ ଫିରଲାରୁ ପରିବାର ଲୋକ୍ ଉପେ ଶୂଇନ୍ ହେଇ ଶ୍ରମ ବିଭାଗରେ ପୁଓକେ ଫିରେଇ ଆନ୍ବାକେ ଗୁହାରି କରିଛନ୍। ଇ ବାବ୍ଦେ ଜିଲା ଶ୍ରମ ଅଧ୍କାରୀ ଶରତ ଚନ୍ଦ୍ର ପାଣିଗ୍ରାହୀକୁଁ ପଚ୍ରାଲାରୁ ଅଭିଯୋଗ ପାଏଲା ଉତାରୁ ପଦକ୍ଷେପ ନିଆଯିବା ବଲି ସେ କହିଥିଲେ।