ଖପ୍ରାଖୋଲ, ୩୧ା୧(ଡି.ଏନ୍.ଏ.)-ରାଏଜ୍ ସରକାର ଦାଦନ ସମସିଆର ସଂଗେ ଯୁଝ୍ବାର ଲାଗି ଅନେକ ଯୋଜନା କାଯ୍କାରୀ କରି କୋଟି କୋଟି ଟଁକା ଖରଚ୍ କରୁଛନ୍। ହେଲେ ପଶ୍ଚିମ ଓଡ଼ିଶାରେ ଦାଦନ ସମସିଆ ଥମ୍ବାର ନଁା ନାଇଁଧରବାର। କେତେବେଲେ ଗଁାକେ ଦାଦନ ଶ୍ରମିକ ଶବ ହେଇ ଫିରୁଛେ ତ ଆର କେତେବେଲେ ହାତ୍ଗୋଡ଼ ହରେଇ ଅକରମା ହେଇ ଫିରୁଛେ। ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଦାଦନ ପରବନ ଅଂଚଲ ହିସାବେ ଜନାଶୁନା। ଫିବଛର ବ୍ଲକରୁ ହଜାର ହଜାର ଲୋକ ପେଟ୍ପାଟନାର ଲାଗି କୁଟୁମବସିଆ ଦାଦନ ଖଟିଯାଉଛନ୍। ଇ ହିସାବେ ଖପ୍ରାଖୋଲ ବ୍ଲକ ଲୁହାସିଂହା ପଁଚେତ୍ ଗଉଡ଼ପାଲି ଗଁାର ଝନେ ଶ୍ରମିକ ଦାଦନ ଯାଇ ବଛ୍ରେ ହେଲା ଲାପତା ହେଇଯାଇଥିବାର ପରିବାର ଲୋକ ଅଭିଯୋଗ କରିଛନ୍।
ସୂଚନା ଅନ୍ସାରେ ଲୁହାସିଂହା ପଁଚେତ୍ ଗଉଡ଼ପାଲିର ସୁନାଧର ହାତୀ(୫୨)। ପରିବାର କହେଲେ ମାଏକିନା ଚଏଁତୁଲା, ପୁଓ କୁଲମଣି, ବହ ମାଳତୀ ଆର ୮ ମାସର ଗୁଟେ ନାତି ରହିଛନ୍। ପରିବାରଟା ନିହାତି ଗରିବ୍। ଏନ୍ତା ଅଭାବିଆ ପରିସ୍ଥିତିରେ ପୁଓ କୁଲମଣି ରୋଗ୍ଥି ଶଢ଼ୁଥିଲାବେଲେ ୮ ମାସିଆ ନାତି ହୁରୁଦ୍ ରୋଗ୍ ସଂଗେ ଯୁଝୁଛନ୍। ଅଭାବ ଅନାଟନ ଲାଗି ଗଲା ବଛର ଜାନୁୟାରୀ ମାସେ ଗଉଡ଼ପାଲି ଆର ସାନଉଡେନ ଗଁାର ଶ୍ରମିକମାନକର ସଂଗେ ମିଶି ସୁନାଧର ଦାଦନ ଖଟିଯାଇଥିଲେ। ଇମାନେ ସଭେ ବେଲପଡ଼ା ଥାନା ରେଙ୍ଗାଲି ଗଁାର ଦାଦନ ସରଦାର କ୍ଷମାନିଧି ମେହେରକଁର ଜରିଆରେ ତେଲେଙ୍ଗାନା ରାଏଜ୍ ଗୋଦାବରୀ କାନି ଅଂଚଲ ଗଞ୍ଜାପାଡ଼ୁର ଗୁଟେ ଇଟା ଭାଟିରେ କାମ୍ କରୁଥିଲେ। ସୁନାଧର ସେଠାନେ ଦେଢ଼ମାସ ତକ୍ କାମ କଲାଉତାରୁ ହଠାତ୍ ଦିନେ ନିଖୋଜ ହେଇଯାଇଥିବାର କଥା ସାଥି ଶ୍ରମିକମାନେ ତାକର ପରିବାର ଲୁକ୍କୁ କହିଛନ୍। ଏହେଦେ ବାକି ଶ୍ରମିକମାନେ ଘରକେ ଫିରିଥିଲାବେଲେ ବଛ୍ରେ ହେଲା ସୁନାଧର ଘରକେ ନାଇଁଫିରି। ଇ ବାବ୍ଦେ ପରିବାର ଲୋକ୍ ଦାଦନ ସରଦାରକୁଁ କହିଲାରୁ ସେ ସୁନାଧରକୁଁ ଖୁଜିଆନବାକେ କଥା ଦେଇଥିଲେ। ହେଲେ ପଛେ ସେ ପରିବାର ଲୁକ୍କୁ ଧମକ୍ ଚମକ୍ ଦେଉଥିବାର ସୁନାଧରକଁର ମାଏକିନା କହିଛନ୍। ଇ ବାବ୍ଦେ ପରିବାର ଲୋକ୍ ପୁଲିସକେ ଜନେଇଛନ୍। ହେଲେ ଘଟନାଟା ବାହାର ରାଏଜେ ଘଟିଥିବାର ଲାଗି ପୁଲିସ ମାମଲା ରୁଜୁ କରବାକେ ମନା କରିଥିବାର ପରିବାର ଲୋକ୍ ଅଭିଯୋଗ କରିଛନ୍। ଏନ୍ତାଥି ଉପେ ଶୂଇନ୍ ପରିବାର ଲୋକ୍ ଗଲା ୨୦ ତାରିଖ ଜିଲାପାଳକଁର ଅଭିଯୋଗ ଶୁନାନିରେ ଲିଖିତ ଅଭିଯୋଗ କରିଥିବାର ଜନାଯାଇଛେ। ଇଆଡ଼େ ଘରର ରୁଜ୍ଗାରିଆ ଲୋକ୍ ଦାଦନ ଯାଇ ଘରକେ ନାଇଁ ଫିରିଥିଲାବେଲେ ପୁଓ ଆର ନାତିର ଚିକିଛା ସଂଗେ ପରିବାର ଚଲାବାରଟା ଚଏଁତୁଲାକଁର ଲାଗି ଭିଡ଼ ହେଇଯାଉଛେ। ଜିଲା ପରଶାସନ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ସୁନାଧରକଁର ପତା ଲଗେଇ ଫିରେଇ ଆନ୍ବାକେ ଗଁାବାସୀ ଦାବି କରିଛନ୍।