କଟକ ଅଫିସ, ୯ା୧୨: ଖ୍ରୀଷ୍ଟ ମହାବିଦ୍ୟାଳୟ ଓ ବକ୍ସିବଜାର ଅଞ୍ଚଳରେ ଆତଙ୍କରାଜ ଚଳାଇବା ଏବଂ ଦାଦାବଟି ଆଦାୟ କରିବା ଅଭିଯୋଗରେ କ୍ୟାଣ୍ଟନମେଣ୍ଟ ଥାନା ପୋଲିସ ଯୁବ କଂଗ୍ରେସ ନେତା ସେକ୍ ଗୁଲଜାର(୩୪)ଙ୍କୁ ଗିରଫ କରି ରବିବାର କୋର୍ଟଚାଲାଣ କରିଛି। ଏହାସହ ତାଙ୍କ ୪ ସହଯୋଗୀଙ୍କୁ ମଧ୍ୟ ଗିରଫ କରାଯାଇଛି। ଗୁଲଜାରଙ୍କ ନିକଟରୁ ପୋଲିସ ଗୋଟିଏ ଦେଶୀ ବନ୍ଧୁକ, ଗୋଟିଏ ୬.୭ ଏମ୍ଏମ୍ ଗୁଳି ଜବତ କରିଛି। ଗୁଲ୍ଜାର କଟକ ଲୋକ ସଭା ଯୁବ ନିର୍ବାଚନୀମଣ୍ଡଳୀର ସମ୍ପାଦକ ଦାୟିତ୍ୱ ତୁଲାଉଥିଲେ। କିନ୍ତୁ ସେ ଏବେ କଂଗ୍ରେସର କୌଣସି ପଦପଦବୀରେ ନ ଥିବା ନଗର କଂଗ୍ରେସ ସଭାପତି ତଥା ବିଧାୟକ ମହମ୍ମଦ ମୋକିମ କହିଛନ୍ତି।
ପୋଲିସ ସୂଚନା ଅନୁଯାୟୀ ଗୁଲଜାର ଖ୍ରୀଷ୍ଟ ମହାବିଦ୍ୟାଳୟ ଛାତ୍ରମାନଙ୍କୁ ଭୟଭୀତ କରି ସେମାନଙ୍କଠାରୁ ଦାଦାବଟି ଆଦାୟ କରୁଥିଲେ। ଶନିବାର ସେଲଟର ଛକ ଅଞ୍ଚଳର ଛାତ୍ର ଅଭିଜିତ ଦାସ ଗୁଲଜାରଙ୍କ ବିରୋଧରେ କ୍ୟାଣ୍ଟନମେଣ୍ଟ ଥାନାରେ ଅଭିଯୋଗ କରିବା ପରେ ପୋଲିସ ତାଙ୍କୁ ଗିରଫ କରିଥିଲା। ଅଭିଜିତ୍ଙ୍କ ଅଭିଯୋଗ ମୁତାବକ ଗୁଲଜାର ଓ ତାଙ୍କ ସହଯୋଗୀମାନେ ଆସନ୍ତା ନୂଆବର୍ଷ ପାଳନ ପାଇଁ ତାଙ୍କୁ ଦାଦାବଟି ମାଗିଥିଲେ। ଦାଦାବଟି ଦେବାକୁ ମନା କରିବାରୁ ଗୁଲଜାର ଓ ତାଙ୍କ ସାଥୀ ଅଭିଜିତଙ୍କୁ ଆକ୍ରମଣ କରିବା ସହ ବନ୍ଧୁକ ଦେଖାଇ ବକ୍ସିବଜାର ଅଞ୍ଚଳରେ ଭୟର ବାତାବରଣ ସୃଷ୍ଟି କରିଥିଲେ। ଫଳରେ ସ୍ଥାନୀୟ ଦୋକାନବଜାର ବନ୍ଦ ହୋଇଯାଇଥିଲା। ଅଭିଜିତଙ୍କ ଅଭିଯୋଗ ପରେ ପୋଲିସ ଗୁଲଜାରଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। କିନ୍ତୁ ଜଣେ ମହିଳା ଡିସିପିଙ୍କ ଅଫିସକୁ ଫୋନ କରି ନିଜକୁ କଟକର ଜଣେ ପୂର୍ବତନ ଏମ୍ପିଙ୍କ ବୋହୂ ବୋଲି ପରିଚୟ ଦେଇ ଗୁଲଜାରଙ୍କୁ ନ ଧରିବା ପାଇଁ ନାନା ଧମକଚମକ ଦେଇଥିଲେ। ଏ ନେଇ ଡିସିପିଙ୍କ କାର୍ଯ୍ୟାଳୟର କନଷ୍ଟେବଳ ଜ୍ୟୋତିର୍ମୟୀ ପଣ୍ଡାଙ୍କ ଅଭିଯୋଗ କ୍ରମେ ପୋଲିସ ପୁରୀଘାଟ ଥାନା ପୋଲିସ କାଠଗଡ଼ାସାହିର ଗୀତାଞ୍ଜଳି ପଣ୍ଡା(୪୦)ଙ୍କୁ ମଧ୍ୟ ଗିରଫ କରି କୋର୍ଟ ଚାଲାଣ କରିଛି। ଗୁଲଜାରଙ୍କ ଅନ୍ୟ ୩ଜଣ ସହଯୋଗୀ ଅଭିଜିତଙ୍କ ଭାଇଙ୍କୁ ଧମକ ଦେବା ଅଭିଯୋଗରେ ପୋଲିସ ସେମାନଙ୍କୁ ଗିରଫ କରିଛି। ଅଭିଜିତ ଏତଲା ପ୍ରତ୍ୟାହାର କରିବା ଓ ଆପୋସ ସମାଧାନ ପାଇଁ ସେମାନେ ତାଙ୍କ ଭାଇଙ୍କୁ ଧମକ ଦେଇଥିଲେ। ଏ ନେଇ ଅଭିଜିତଙ୍କ ଭାଇ ପ୍ରସନ୍ନଜିତ ବିଡ଼ାନାସୀ ଥାନାରେ ଅଭିଯୋଗ କରିବା ପରେ ପୋଲିସ ଫିରିଙ୍ଗି ବଜାର ଅଞ୍ଚଳର ସାହିଲ ପରଭେଜ, ବକ୍ସିବଜାର ଅଞ୍ଚଳର ସେକ୍ ଇମ୍ରାନ ଅହମ୍ମଦ ଏବଂ ଖୋର୍ଦ୍ଧା ଟାଙ୍ଗୀ ଅଞ୍ଚଳର ଅମରଜିତ୍ ବେହେରାଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗୁଲଜାରଙ୍କ ବିରୋଧରେ କଟକ ସହରର ବିଭିନ୍ନ ଥାନାରେ ୧୭ଟି ଆପରାଧିକ ମାମଲା ରହିଥିବା ପୋଲିସ ସୂଚନା ଦେଇଛି।