ପଟ୍ଟାମୁଣ୍ଡାଇ, ୩।୭(ସ୍ବ.ପ୍ର): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ସହରର କପଡ଼ା ବ୍ୟବସାୟୀ ଉମେଶ ଚନ୍ଦ୍ର ସାହୁଙ୍କୁ ଫୋନରେ ଦାଦା ବଟି ମାଗିବା ସହ ଧମକ ଦେବା ଅଭିଯୋଗରେ ବୁଧବାର ପଟ୍ଟାମୁଣ୍ଡାଇ ପୋଲିସ ଜଣଙ୍କୁ ଗିରଫ କରିଛି। ସେ ହେଲେ ଭରତ ଚୁଲି। ତାଙ୍କ ଘର କେନ୍ଦ୍ରାପଡ଼ା ସଦରଥାନା ତିଳୋତ୍ତମାଦେଇପୁର ଖଣ୍ଡାସାହି ଗ୍ରାମରେ।
ପ୍ରକାଶ ଯେ, ଜୁନ୍ ୨୫ ଓ ୨୬ ତାରିଖରେ ଉମେଶଙ୍କ ମୋବାଇଲକୁ ଏକ ଅଜଣା ନମ୍ବରରୁ କଲ ଆସିଥିଲା। ତାଙ୍କୁ ବଟିମାଗିବା ସହ ଧମକ ଦେଇଥିଲେ। ଏ ନେଇ ଉମେଶ ପଟ୍ଟାମୁଣ୍ଡାଇ ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତିକରି ପୋଲିସ ନଂ. ୨୨୩/୧୯ରେ ମାମଲା ରୁଜୁକରିବା ସହ କେନ୍ଦ୍ରାପଡା କାକଟ ନସଡିପୁର ପୁରୁଣା ଗୋବରିକେନାଲ ନିକଟରୁ ମଙ୍ଗଳବାର ରାତିରେ ଭରତଙ୍କୁ ଗିରଫ କରିଛି। ତାଙ୍କ ନିକଟରୁ ପୋଲିସ ନଗଦ ୩୫୦୦ ଟଙ୍କା, ୨ଟି ଏଟିଏମ୍ କାର୍ଡ, ବାଇକ, ୧୧ଟି କମ୍ପାନୀର ସିମ୍କାର୍ଡ ସହ ୩ଟି ମୋବାଇଲ ଓ ଏକ ଲାପ୍ଟପ୍ ଜବତ କରିଛି ଜିଲା ଏସ୍ପି ନିତିଶେଖର ବୁଧବାର ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଗିରଫ ଭରତଙ୍କୁ ପଟ୍ଟାମୁଣ୍ଡାଇ କୋର୍ଟ ଚାଲାଣ କରାଯାଇଛି।