ଦାରିଙ୍ଗବାଡି,୬।୧୨(ଡି.ଏନ.ଏ.)-କନ୍ଧମାଳ ଜିଲା ଦାରିଙ୍ଗବାଡି ବ୍ଳକ ଅଞ୍ଚଳରେ ଶୁକ୍ରବାର ଶୀତ ବଢିଛି । ସକାଳ ସାଢେ ୮ଟା ସୁଦ୍ଧା ତାପମାତ୍ରା ହ୍ରାସ ପାଇ ୭ଡିଗ୍ରୀରେ ପହଞ୍ଚିଛି । ଚଳିତମାସର ଏହା ସବୁଠାରୁ ସର୍ବନିମ୍ନ ତାପମାତ୍ରା ବୋଲି ଶୀତତାପ ଯନ୍ତ୍ରରୁ ରେକର୍ଡ ସଂଗ୍ରହ କରୁଥିବା ବ୍ଳକ କାର୍ଯ୍ୟାଳୟର କର୍ମଚାରୀ ପୁରୁଷୋତ୍ତମ ସାହୁ କହିଛନ୍ତି। ହଠାତ୍ ଶୀତ ବୃଦ୍ଧି ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ବିଭିନ୍ନ ସ୍ଥାନରେ ଲୋକେ ନିଆଁ ଲଗାଇ ପୁଉଁଛନ୍ତି। ସେହିପରି ଲୋକେ ଶୀତ ପାଇଁ ଘରୁ କୌଣସି କାର୍ଯ୍ୟପାଇଁ ବାହାରିବା ମୁସ୍କିଲ ହୋଇପଡିଛି। ସକାଳୁ ଚା’ଦୋକାନରେ ଭିଡ ସହ ଖରାକୁ ସାହାରା କରିଛନ୍ତି। ଗରିବ ଶ୍ରେଣୀର ଲୋକଙ୍କ ପାଇଁ ଶୀତ କଷ୍ଟ ଦେଇଛି। ବୁଲା ଗୋରୁ ଗାଇଙ୍କ ସମେତ ଅନ୍ୟ ପ୍ରାଣୀମାନଙ୍କ ପାଇଁ ସମସ୍ୟା ଦେଖାଯାଇଛି। ସେହିପରି ପର୍ଯ୍ୟଟକମାନେ ଶୀତର ମଜା ନେବା ପାଇଁ ଦାରିଙ୍ଗବାଡିରେ ପହଞ୍ଚି ବିଭିନ୍ନ ସରକାରୀ ବଙ୍ଗଳା ସହ ଘରୋଇ ହୋଟେଲ, କଟେଜରେ ରାତ୍ରୀଯାପନ କରିଛନ୍ତି। ସୁଚନାଯୋଗ୍ୟ ଯେ, ଚଳିତବର୍ଷ ଶୀତ ବିଳମ୍ବରେ ପହଞ୍ଚିବା ସହ ତାପମାତ୍ରା ୧୨ଡିଗ୍ରୀରୁ ଖସି ଆସି ୯.୫ ଡିଗ୍ରୀରେ ପହଞ୍ଚିଥିଲା। ହଠାତ୍ ଗୁରୁବାର ବିଳମ୍ବିତ ରାତିରୁ ଅସହ୍ୟ ଥଣ୍ଡା ବଢିବା ସହ ଶୁକ୍ରବାର ତାପମାତ୍ରା ହ୍ରାସ ପାଇଛି।