ନୂଆଦିଲ୍ଲୀ,୧ା୬:ମହାମାରୀ କରୋନା ଯୋଗୁ ସାରା ବିଶ୍ୱରେ ଘୋର ଆର୍ଥିକ ଅବନତି ଘଟିଛି। ଏହାର ପ୍ରଭାବରେ ୨୦୨୦ ଶେଷ ସୁଦ୍ଧା ସ୍ବଳ୍ପ ଏବଂ ମଧ୍ୟମ ଆୟକାରୀ ଦେଶଗୁଡ଼ିକର ଗରିବ ପରିବାରରେ ରହୁଥିବା ପିଲାଙ୍କ ସଂଖ୍ୟା ୮.୬ କୋଟି (୧୫%) ବୃଦ୍ଧି ହୋଇ ୬୭.୨ କୋଟିରେ ପହଞ୍ଚିପାରେ ବୋଲି ଏକ ଅଧ୍ୟୟନରୁ ଜଣାପଡ଼ିଛି।
ୟୁନିସେଫ୍ ଏବଂ ମାନବିକ ସଂଗଠନ ‘ସେଭ ଦି ଚିଲ୍ଡ୍ରେନ୍’ ପକ୍ଷରୁ ମିଳିତ ଭାବେ କରାଯାଇଥିବା ଏହି ଅଧ୍ୟୟନରେ କୁହାଯାଇଛି ଯେ, କୋଭିଡ୍-୧୯ ଜନିତ ଆର୍ଥିକ ଦୁର୍ଦ୍ଦଶା ୮.୬ କୋଟି ଅଧିକ ପିଲାଙ୍କୁ ଚଳିତବର୍ଷ ଶେଷ ସୁଦ୍ଧା ପାରିବାରିକ ଦରିଦ୍ର ଅବସ୍ଥା ମଧ୍ୟକୁ ଠେଲିଦେବ। ମହାମାରୀ ଯୋଗୁ ଘୋର ଆର୍ଥିକ ସଙ୍କଟରେ ପଡ଼ିଥିବା ପରିବାରଗୁଡ଼ିକୁ ରକ୍ଷା କରିବା ପାଇଁ ତୁରନ୍ତ ପଦକ୍ଷେପ ନିଆଯିବା ଜରୁରୀ। ନଚେତ୍ ସ୍ବଳ୍ପ ଏବଂ ମଧ୍ୟମ ଆୟକାରୀ ଦେଶରେ ଜାତୀୟ ଦାରିଦ୍ର୍ୟ ସୀମାରେଖା ତଳେ ରହୁଥିବା ମୋଟ ପିଲାଙ୍କ ସଂଖ୍ୟା ବର୍ଷ ଶେଷ ସୁଦ୍ଧା ୬୭.୨ କୋଟିରେ ପହଞ୍ଚିପାରେ। ଏହି ପିଲାମାନଙ୍କ ମଧ୍ୟରୁ ପ୍ରାୟ ଦୁଇ-ତୃତୀୟାଂଶ ଉପ ସାହାରୀୟ ଆଫ୍ରିକା ଏବଂ ଦକ୍ଷିଣ ଏସିଆରେ ବାସ କରନ୍ତି। ଦାରିଦ୍ର୍ୟ ମଧ୍ୟକୁ ଠେଲି ହେଉଥିବା ପିଲାଙ୍କ ସଂଖ୍ୟା ୟୁରୋପ ଏବଂ ମଧ୍ୟ ଏସିଆର ଦେଶଗୁଡିକରେ ସର୍ବାଧିକ ୪୪% ଏବଂ ଲାଟିନ ଆମେରିକା ଓ କାରିବିଆନ ଅଞ୍ଚଳରେ ୨୨% ବୃଦ୍ଧି ଘଟିପାରେ।
ୟୁନିସେଫର କାର୍ଯ୍ୟନିର୍ବାହୀ ନିର୍ଦ୍ଦେଶକ ହେନେରେଟା ଫୋର୍ କହିଛନ୍ତି, କରୋନା ମହାମାରୀ ଅଭୂତପୂର୍ବ ସାମାଜିକ-ଅର୍ଥନୈତିକ ସଙ୍କଟ ସୃଷ୍ଟି କରିଛି, ଯାହା ସମଗ୍ର ବିଶ୍ୱରେ ପରିବାରଗୁଡ଼ିକର ସମ୍ବଳ ଖାଲି କରିବାରେ ଲାଗିଛି। ପିଲାମାନେ ଯେଭଳି ଅତ୍ୟାବଶ୍ୟକ ସେବାରୁ ବଞ୍ଚତ୍ତ ନ ହେବେ ଏବଂ ଶିଶୁ ଦାରିଦ୍ର୍ୟ ହ୍ରାସ ପାଇବ ସେନେଇ ବର୍ଷ ବର୍ଷ ଧରି ଚାଲିଥିବା ଉଦ୍ୟମକୁ ଯେଉଁ ସଫଳତା ମିଳିଛି ତାହା ଏବେ ହାତଛଡ଼ା ହୋଇପାରେ। ପରିବାରରେ ଆର୍ଥିକ ସଙ୍କଟର ପରିମାଣ ବୃଦ୍ଧି ପାଇବା ଯୋଗୁ ଏଭଳି ଆଶଙ୍କା ଦେଖାଦେଇଛି। ମିଳିତ ପଦକ୍ଷେପ ବିନା ପରିବାରଗୁଡିକ ଅଧିକରୁ ଅଧିକ ଦାରିଦ୍ର୍ୟକୁ ଠେଲି ହୋଇପାରନ୍ତି। ଗରିବ ପରିବାରଗୁଡ଼ିକ ଏଭଳି ଅଭାବର ସମ୍ମୁଖୀନ ହୋଇପାରନ୍ତି, ଯାହା କେତେକ ଦଶନ୍ଧି ମଧ୍ୟରେ ଦେଖାଯାଇନାହିଁ ବୋଲି ହେନେରେଟା କହିଛନ୍ତି। ଲକ୍ଡାଉନ୍ ଯୋଗୁ ହଠାତ୍ ନିଯୁକ୍ତି ହରାଇବା ଫଳରେ ବହୁ ପରିବାର ସେମାନଙ୍କ ପିଲାମାନଙ୍କୁ ଖାଦ୍ୟ ଓ ପାଣି ଭଳି ମୌଳିକ ଆବଶ୍ୟକତା ଯୋଗାଇବାରେ ପ୍ରାୟତଃ ସକ୍ଷମ ହେଉନାହାନ୍ତି। ସେହିପରି ସେମାନଙ୍କୁ ସ୍ବାସ୍ଥ୍ୟସେବା ଓ ଶିକ୍ଷା ମିଳିବା ସମ୍ଭାବନା କମ୍ ଥିବାବେଳେ ବାଲ୍ୟବିବାହ ସମେତ ଶିଶୁଙ୍କ ପ୍ରତି ହିିଂସା, ଶୋଷଣ ଏବଂ ଅତ୍ୟାଚାରର ବିପଦ ରହିଛି। ସେଭ ଦି ଚିଲ୍ଡ୍ରେନ୍ ଇଣ୍ଟରନ୍ୟାଶନାଲ ସିଇଓ ଇଙ୍ଗର ଆଶିଙ୍ଗ କହିଛନ୍ତି ଯେ, କ୍ଷୁଧା ଏବଂ ପୁଷ୍ଟିହୀନତା ସ୍ବଳ୍ପ ସମୟ ପାଇଁ ହେଲେ ମଧ୍ୟ ପିଲାମାନେ ଅତ୍ୟଧିକ ଅସୁରକ୍ଷିତ ହୋଇପଡ଼ିନ୍ତି, ଯାହା ଜୀବନସାରା ସେମାନଙ୍କୁ ପ୍ରଭାବିତ କରିଥାଏ। ଏବେ ଯଦି ଆମେ ଦୃଢ଼ ନିଷ୍ପତ୍ତି ନେଇ କାର୍ଯ୍ୟ କରିବା ତା’ହେଲେ ମହାମାରୀ ବିପଦରୁ ଗରିବ ଦେଶର ଏବଂ ଅତ୍ୟନ୍ତ ଅସୁରକ୍ଷିତ ହୋଇପଡ଼ିଥିବା ପିଲାମାନଙ୍କୁ ରକ୍ଷା କରିପାରିବା। ଏହି ରିପୋର୍ଟ ବିଶ୍ୱ ପାଇଁ ଆହ୍ବାନ ସୃଷ୍ଟି କରିଛି। ପିଲାମାନଙ୍କ ପାଇଁ ଦାରିଦ୍ର୍ୟ ଅନିବାର୍ଯ୍ୟ ନୁହେଁ ବୋଲି ଆଶିଙ୍ଗ କହିଛନ୍ତି।