ଭୁବନେଶ୍ୱର,୧୦।୧(ବ୍ୟୁରୋ): ବାରମ୍ବାର ଆଲୋଚନା, ବୈଠକ ହେବା ସତ୍ତ୍ୱେ ଦାରୁଠେଙ୍ଗ ଡମ୍ପିଂୟାର୍ଡ ସମସ୍ୟାର ସମାଧାନ ହୋଇପାରୁନି। ବିଏମ୍ସି ମୁଖ୍ୟାଳୟରେ ଗତ ୬ତାରିଖର ବୈଠକ ପରେ ଗୁରୁବାର ଆୟୋଜିତ ବୈଠକର ମଧ୍ୟ କିଛି ନିଷ୍କର୍ଷ ବାହାରିପାରି ନାହିଁ। ଆସନ୍ତା ୩ଦିନ ପରେ ପୁଣି ଆଲୋଚନା ହେବ ବୋଲି ଜଣାପଡ଼ିଛି। ବୈଠକରେ ଲିଖିତ ପ୍ରତିଶ୍ରୁତି ପରେ ହିଁ ଡମ୍ପିଂୟାର୍ଡ ଖୋଲିବ ବୋଲି ଦାରୁଠେଙ୍ଗ ଗ୍ରାମବାସୀ କହିଛନ୍ତି।
ଗୁରୁବାର ବିଏମ୍ଓଇ ମୁଖ୍ୟାଳୟରେ ପୁନର୍ବାର ବିଏମ୍ସି କମିଶନର ପ୍ରେମଚନ୍ଦ୍ର ଚୌଧାରୀଙ୍କ ଅଧ୍ୟକ୍ଷତାରେ ଦାରୁଠେଙ୍ଗ ଗ୍ରାମବାସୀ, ବିଧାୟକ ସୁରେଶ ରାଉତରାୟ ଓ ଅନ୍ୟ ବିଶିଷ୍ଟ ଅଧିକାରୀଙ୍କୁ ନେଇ ଏକ ବୈଠକ ବସିଥିଲା। ଗ୍ରାମବାସୀ ବିଏମ୍ସିଠାରୁ ଲିଖିତ ପ୍ରତିଶ୍ରୁତି ଦାବି କରିବା ସହ କେବେଠାରୁ ଡମ୍ଫିଂ ହେବ ନାହିଁ ବୋଲି ପ୍ରଶ୍ନ କରିଥିଲେ। କମିଶନର ଚୌଧାରୀ ଖୁବ୍ଶୀଘ୍ର ସେମାନଙ୍କଉ ଲିଖିତ ପ୍ରତିଶ୍ରୁତି ଦିଆଯିବା ସହ ଆଗାମୀ ଗୋଟିଏ ବର୍ଷ ମଧ୍ୟରେ ଡମ୍ଫିଂ ବନ୍ଦ କରିବା ସହ ସେଠାରେ ବାଇଓ ମାଇନିଂ ପ୍ଲାଣ୍ଟ ନିର୍ମାଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ହେଲେ ଗ୍ରାମବାସୀ ତାଙ୍କ କଥାରେ ପୁନର୍ବାର ସହମତି ପ୍ରକାଶ ନ କରିବାରୁ ଆଲୋଚନା ବିଫଳ ହୋଇଥିଲା। କମିଶନର ଚୌଧାରୀ କହିଛନ୍ତି, ଏମ୍ସିସି କାର୍ଯ୍ୟ ନ ସରିବା ଯାଏ ଡମ୍ପିଂ ହେବ। ସେଠାରେ ଡମ୍ପିଂ ନ ହେଲେ ଆଉ କେଉଁଠି ହେବ। ସୈନିକ ସ୍କୁଲ ନିକଟରେ ଥିବା ଟିଟିଏସ୍ରେ ଏବେ ଅଳିଆ ଭର୍ତ୍ତି ହୋଇସାରିଲାଣି। ତେଣୁ ସେମାନଙ୍କୁ ଆମେ ଯଥାଶୀଘ୍ର ଲିଖିତ ପ୍ରତିଶ୍ରୁତି ଦେବାକୁ ଚେଷ୍ଟା କରୁଛୁ। ସେହିପରି ଏମ୍ସିସି ଓ ଏମ୍ଆରଏଫ କାର୍ଯ୍ୟ ସରିବା ସହ ଦାରୁଠେଙ୍ଗରେ ଡମ୍ପିଂ ବନ୍ଦ ହେବାକୁ ସର୍ବନିମ୍ନ ମାସେ ସମୟ ଲାଗିବ।
ଉଲ୍ଲେଖଯୋଗ୍ୟ, ଜାନୁୟାରୀରୁ ଦାରୁଠେଙ୍ଗ ଡମ୍ଫିଂୟାର୍ଡରେ ଅଳିଆ ପଡ଼ିବନି ବୋଲି ଗତ ୪ମାସ ତଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିଲେ। ଏବେ ଜାନୁୟାରୀ ମାସ ଚାଲିଥିବାବେଳେ ଘୋଷଣାର କିଛି ସୁପ୍ରଭାବ ଦେଖିବାକୁ ମିଳିନାହିଁ। ପୂର୍ବପରି ଡମ୍ପିଂୟାର୍ଡରେ ଅଳିଆପଡ଼ୁଥିତ୍ବାରୁ ଦାରୁଠେଙ୍ଗ ଗ୍ରାମବାସୀ ଅସନ୍ତୋଷ ପ୍ରକାଶ କରିବା ସହ ଅଳିଆ ଭର୍ତ୍ତି ଟ୍ରକ୍କୁ ଡମ୍ଫିଂ ୟାଡକୁ ଛାଡ଼ୁ ନାହାନ୍ତି। ସେଥିପାଇଁ ବିଏମ୍ସି କମିଶନର ଗ୍ରାମବାସୀଙ୍କୁ ଆଲୋଚନା ପାଇଁ ଡାକିଥିଲେ। ଗ୍ରାମବାସୀଙ୍କ ସର୍ତ୍ତ ମୁତାବକ କାର୍ଯ୍ୟ ହେଲେ ସେମାନେ ଅଳିଆ ପକାଇବା ପାଇଁ ସମର୍ଥନ ଦେବେ ବୋଲି କହିଛନ୍ତି।