କୋଲକାତା,୨୪।୬: ପଶ୍ଚିମବଙ୍ଗରେ ଗତ ଲୋକ ସଭା ନିର୍ବାଚନରେ ଭଲ ପ୍ରଦର୍ଶନ କରିଥିବା ଭାରତୀୟ ଜନତା ପାର୍ଟି(ଭାଜପା) ଏବେ ଖୁବ୍ ଉତ୍ସାହିତ ଥିବା ଦେଖାଯାଇଛି। କାରଣ ଏଥର ଦୁର୍ଗାପୂଜାରେ ଭାଜପା ରାଜ୍ୟର ସବୁ ସ୍ଥାନରେ ଭାଗ ନେବାକୁ ଆଗଭର ହୋଇଥିବା ଲକ୍ଷ୍ୟ କରାଯାଇଛି। ଏଥିପାଇଁ ସେ ପୂଜାର ଆୟୋଜକ ଓ ସମିତିମାନଙ୍କ ସହ ସମ୍ପର୍କରେ ରହୁଥିବା ଆଲୋଚନା ହେଉଛି। ଏମିତି ଭାବେ ଭାଜପା ତ୍ରୁଣମୂଳ କଂଗ୍ରେସ(ଟିଏମ୍ସି)ଠାରୁ ଦୂର୍ଗାପୂଜାକୁ ଛଡାଇ ନେବାକୁ ଚାହୁଁଥିବା କୁହାଯାଉଛି। ନେତାମାନେ ଦୂର୍ଗାପୂଜା ପେଣ୍ଡାଲର ଉଦ୍ଘାଟନ କରିବାକୁ ଉତ୍ସୁକତା ଦେଖାଉଥିବା ଦେଖାଯାଇଛି। ଏହା ମାଧ୍ୟମରେ ଭାଜପା ଟିଏମ୍ସିର ଛବି ବିଗାଡିବାକୁ ଚେଷ୍ଟା କରୁଥିବା କୁହାଯାଉଛି। ଗୋଟିଏ ପଟେ ପଶ୍ଚିମବଙ୍ଗରେ ମୁଖ୍ୟମନ୍ତ୍ରୀ ତଥା ଟିଏମ୍ସି ନେତ୍ରୀ ମମତା ବାନାର୍ଜୀ ଓ ଭାଜପା ମଧ୍ୟରେ ତୁତୁ ମେମେ ଚାଲିଥିବା ବେଳେ ଅନ୍ୟପଟେ ଭାଜପାର ଏପରି ପ୍ରୟାସ ଦିଦିଙ୍କ ଛବି ବିଗାଡିବାର ଆଉ ଏକ ବାଟ ବୋଲି ରାଜନୈତିକ ମହଲରେ ଆଲୋଚନା ହେଉଛି।