ସିରିଏଲ ଅଭିନେତା ରାକେଶ ଧଳ, ଯିଏକି ବହୁତ କମ ଦିନ ମଧ୍ୟରେ ଟେଲିଭିଜନ ଜଗତରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ଫିଟ୍ ରହିବା ସହ ଅଭିନୟରେ ନିଜର ନିପୁଣତା ଦେଖାଇ ଦର୍ଶକଙ୍କ ଭଲପାଇବା ପାଇ ପାରିଛନ୍ତି। ତରଙ୍ଗ, ସାର୍ଥକ ଓ କଲର୍ସ ଓଡ଼ିଆ ପରି ଟିଭି ଚ୍ୟାନେଲର ବିଭିନ୍ନ ସିରିଏଲରେ ସେ ନିଜର ପାରଦର୍ଶିତା ଦେଖାଇ ସେ ‘ନେଇଯାରେ ମେଘ ମତେ’, ‘ଏସିପି ନିକିତା’, ‘ରାନି’, ‘ଆମ ଘର ଲକ୍ଷ୍ମୀ’, ‘ତୋ ଆଖି ମୋ ଆଇନା’, ‘ଟୁପୁର ଟାପୁର’, ‘ସିନ୍ଦୂର ବିନ୍ଦୁ’ ସିରିଏଲରେ କାମ କରିଥିବା ବେଳେ ଏବେ ସେ ତରଙ୍ଗ ଟିଭିର ‘କୁଆଁରୀ ବୋହୂ’ ସିରିଏଲରେ ମୁଖ୍ୟ ଅଭିନେତା ଭାବେ କାମ କରୁଛନ୍ତି। ନିଜ ଫିଟନେସକୁ ରାକେଶ ବହୁତ ଗୁରୁତ୍ୱ ଦିଅନ୍ତି। ସେ ନିୟମିତ ଭାବେ ବ୍ୟାୟାମ୍, କସରତ, ଖେଳକୁଦ, ଦୌଡ଼ କିମ୍ବା ଯୋଗ କରନ୍ତି। ଦିନକୁ ଗୋଟିଏ ଘଣ୍ଟା ନିଜ ଶରୀରକୁ ଦେଲେ ଜଣେ ପୂରା ଫିଟ ରହିବ ବୋଲି ସେ ମତ ରଖନ୍ତି। ମୁଖ୍ୟତଃ ସେ ଫିଟ୍ ରହିବା ପାଇଁ ଜିମ୍ ଯାଆନ୍ତି। ନଚେତ୍ ଶୁଟିଂ ପରେ ପାର୍କକୁ ଓ୍ବାକ କରିବା ଓ ସାଇକେଲିଂ କରନ୍ତି। ସକାଳୁ ଉଠିବା ପରେ ଚଣା ଖାଇବା ସହ ଜିମ୍କୁ ଓ୍ବାର୍କଆଉଟ କରିବାକୁ ଯାଆନ୍ତି। ଅଧିକ ଶୁୁଟିଂ ରହୁଥିବାରୁ ସେ ସପ୍ତାହରେ ୪ଦିନ ଜିମ୍ ଯାଆନ୍ତି। ଅନ୍ୟ ଦିନମାନଙ୍କରେ ସାଇକେଲିଂ ଓ ପାର୍କରେ ଓ୍ବାକ୍ କରନ୍ତି। ଫିଟ ରହିବା ଲାଗି ସେ ଡାଏଟ ପ୍ଲାନ କରନ୍ତି। ସିରିଏଲରେ କରୁଥିବା କ୍ୟାରେକ୍ଟର ଓ ନିଜ ଓ୍ବାର୍କଆଉଟକୁ ମ୍ୟାଚ୍ କରିବା ଭଳି ଡାଏଟ ପ୍ଲାନ କରନ୍ତି। କ୍ୟାରେକ୍ଟର ଯଦି ଟିକେ ହେଲ୍ଦି ହୁଏ, ତା’ହେଲେ ସେ ହେଲ୍ଦି ଖାଦ୍ୟ ଖାଆନ୍ତି ନଚେତ୍ ଅଧିକାଂଶ ସମୟରେ ସାଧାରଣ ଖାଦ୍ୟଗୁଡ଼ିକୁ ସୀମିତ ଭାବେ ଖାଇବାକୁ ପସନ୍ଦ କରନ୍ତି। ଦିନକୁ ୩ଥର ଖାଇବା ସହ ୪ରୁ ୫ଲିଟର ପାଣି ପିଅନ୍ତି। ସପ୍ତାହକୁ ୪ଥର ଭାତ ଖାଇବାକୁ ପସନ୍ଦ କରନ୍ତି ଅଥବା ରୁଟି ନହେଲେ ବ୍ରେଡ ଖାଆନ୍ତି। ପ୍ରୋଟିନ୍ ନୁହେଁ ବରଂ ପ୍ରୋଟିନ୍ଯୁକ୍ତ ଖାଦ୍ୟ ଖାଇବା ଲାଗି ପସନ୍ଦ କରନ୍ତି। ପ୍ରତ୍ୟେକ ଦିନ ଅଣ୍ଡା ଖାଆନ୍ତି। ଜିମ୍ ଯିବା ପୂର୍ବରୁ ସେ ମାତ୍ର ୨ଟି କଦଳୀ ଖାଆନ୍ତି। ଜିମ୍ରୁ ଆସିବା ପରେ ଜୁସ୍ ପିଅନ୍ତି ଓ ବ୍ରେକଫାଷ୍ଟ କରନ୍ତି। ଲଞ୍ଚ ଓ ଡିନରରେ ସେ କୌଣସି ପ୍ରକାରର ବି ଖାଦ୍ୟ ଖାଇବାକୁ ଭଲପାଆନ୍ତି। କିନ୍ତୁ ନିଜ ଡାଏଟ ଅନୁସାରେ ହିଁ ସେ ଖାଦ୍ୟ ଖାଇଥାନ୍ତି ଓ ଠିକ୍ ସମୟରେ ଖାଇଥାନ୍ତି। ଫିଟ୍ ରହିବାକୁ ହେଲେ ଖାଦ୍ୟଠାରୁ ଆରମ୍ଭ କରି କସରତ୍ କରିବା ଉପରେ ବିଶେଷ ଧ୍ୟାନ ଦେଲେ ସମସ୍ତେ ଫିଟ୍ ରହିବେ ବୋଲି ସେ କହିଛନ୍ତି।