ଅନୁଗୋଳ ଅଫିସ, ୧୨।୧୦ – ଦିନକ ପରେ ଅନୁଗୋଳରେ ଆରମ୍ଭ ହେବ ମା’ ଲକ୍ଷ୍ମୀଙ୍କ ପୂଜା। ଏ ନେଇ ସହର ଚଳଚଞ୍ଚଳ ହୋଇଉଠିଥିବା ବେଳେ ଆଇନଶୃଙ୍ଖଳା ରକ୍ଷା ପାଇଁ ଏଥର ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ସହରରେ ଟ୍ରାଫିକ ନିୟନ୍ତ୍ରଣ ପାଇଁ ସମୟ ନିର୍ଦ୍ଧାରଣ କରାଯାଇଥିବା ବେଳେ ଶାନ୍ତିଶୃଙ୍ଖଳା ରକ୍ଷା ପାଇଁ ୧୫ ପ୍ଲାଟୁନ ଫୋର୍ସ ମୁତୟନ କରାଯିବ ବୋଲି ସୂଚନା ମିଳିଛି।
ଅନୁଗୋଳ ଲକ୍ଷ୍ମୀପୂଜା ପାଇଁ କେତେକ ସ୍ଥାନରେ ତୋରଣ ପ୍ରସ୍ତୁତ ସରିଥିବାବେଳେ ମଣ୍ଡପ ସଜ୍ଜା ଜାରି ରହିଛି। କେତୋଟି ମଣ୍ଡପରେ ସିସିଟିଭି କ୍ୟାମେରାର ବ୍ୟବସ୍ଥା କରାଯାଇଛି। ପ୍ଲାଷ୍ଟିକ ଫ୍ରି ବ୍ୟାନର ମଧ୍ୟ ଲଗାଯିବ ବୋଲି ସେଣ୍ଟ୍ରାଲ ପୂଜା କମିଟି ପକ୍ଷରୁ କୁହାଯାଇଛି। ଚଳିତ ଥର ଆଧ୍ୟାତ୍ମିକ ବିଷୟ ବସ୍ତୁକୁ ନେଇ ମଣ୍ଡପଗୁଡ଼ିକ ସାଜସଜ୍ଜା କରାଯିବାକୁ ଥିବାବେଳେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମର ବ୍ୟବସ୍ଥା ମଧ୍ୟ କରାଯାଇଛି। ଅନ୍ୟପକ୍ଷରେ ପୂଜାକୁ ଶାନ୍ତି ଶୃଙ୍ଖଳାରେ ଶେଷ କରିବାକୁ ଅନୁଗୋଳ ପୋଲିସ ପକ୍ଷରୁ ମଧ୍ୟ ବ୍ୟାପକ ପଦକ୍ଷେପ ନିଆଯାଇଛି। ମୋଟ୍ ୬ ଜଣ ଡିଏସ୍ପିଙ୍କୁ ନିୟୋଜିତ କରାଯାଇଥିବାବେଳେ ୧୦ ଜଣ ଇନ୍ସପେକ୍ଟର, ୮୫ ଏସ୍ଆଇ ଓ ଏଏସ୍ଆଇ, ୨୦ ହାବିଲଦାର, ୯୦ କନଷ୍ଟେବଳ, ୧୫ ଟ୍ରାଫିକ କନଷ୍ଟେବଳ, ୧୮୦ ହୋମଗାର୍ଡ, ୪୫ ସେକ୍ସନ ଫୋର୍ସ ଓ ୪୩ ଏପିଆରଙ୍କୁ ନିୟୋଜିତ କରାଯିବ ବୋଲି ଏସ୍ପି ଜଗମୋହନ ମୀନା ସୂଚନା ଦେଇଛନ୍ତି। ବାହାରୁ ୧୨ ପ୍ଲାଟୁନ ଫୋର୍ସ ଆସୁଥିବାବେଳେ ଜିଲା ପୋଲିସକୁ ମିଶାଇ ମୋଟ୍ ୧୫ ପ୍ଲାଟୁନ୍ ମୁତୟନ କରାଯିବ। ଟ୍ରାଫିକ କଟକଣା ଅପରାହ୍ନ ୨ଟାରୁ ଆରମ୍ଭ ହୋଇ ରାତି ୧୨ଟା ପର୍ଯ୍ୟନ୍ତ ରହିବ ବୋଲି ସେ ସୂଚନା ଦେଇଛନ୍ତି। ଗାଡ଼ିଗୁଡ଼ିକ ଅଗ୍ନିଶମ ବିଭାଗ ଛକ ଦେଇ ଡିଆଇସି ଛକ ଓ ଗାନ୍ଧୀମାର୍ଗ ଦେଇ ହୁଲୁରିସିଂହାରେ ବାହାରିବ। ଏଥିସହ ସାଦା ପୋଷକଧାରୀ ପୋଲିସ ମଧ୍ୟ ପୂଜା ସମୟରେ ବିଭିନ୍ନ ସ୍ଥାନରେ ମୁତୟନ ରହିବେ। ସେହିପରି ସହରରେ ଲାଗିଥିବା ସିସିଟିଭିରେ ଲୋକଙ୍କ ଗତିବିଧି ଉପରେ କଣ୍ଟ୍ରୋଲ ରୁମ୍ରେ ନଜର ରଖାଯିବ ବୋଲି ଏସ୍ପି ମୀନା କହିଛନ୍ତି।