କୋଲକାତା,୧୩।୪ (ପି.ଟି.): ଭାରତୀୟ ଫୁଟବଲର ତଥା ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଦଳ ମୁମ୍ବାଇ ସିଟି ଲେଫ୍ଟ ବ୍ୟାକ୍ ଶୁଭାଶିଷ ବୋଷ କୋଭିଡ୍-୧୯ ମହାମାରୀ ମୁକାବିଲାରେ ସାମିଲ ହୋଇଛନ୍ତି। ଦକ୍ଷିଣ ୨୪ ପ୍ରଗଣାସ୍ଥିତ ତାଙ୍କ ଘରୋଇ ସହର ସୁଭାଷଗ୍ରାମ୍ରେ ସେ ଗୃହହୀନ ଓ ରୋଜଗାର ହରାଇଥିବା ଲୋକଙ୍କୁ ଖାଦ୍ୟ ପ୍ରଦାନ କରିଛନ୍ତି। କରୋନା ଭାଇରସ କାରଣରୁ ସାରା ଦେଶରେ ଲକ୍ଡାଉନ ଜାରି ରହିଥିବା ବେଳେ ବହୁ ଲୋକ ରୋଜଗାର ହରାଇ ଖାଦ୍ୟ ପାଇଁ ସଂଘର୍ଷ କରୁଛନ୍ତି। ଦିନମଜୁରିଆ, ରିକ୍ସାବାଲା ଲାଇନ୍ରେ ଠିଆ ହୋଇ ଖାଦ୍ୟ ସଂଗ୍ରହ କରୁଛନ୍ତି। ଶୁଭାଶିଷ ନିଜେ ଠିଆ ହୋଇ ସମସ୍ତଙ୍କୁ ଖାଦ୍ୟ ବା ରାଶନ ପୁଡିଆ ପ୍ରଦାନ କରୁଛନ୍ତି। ଖାଦ୍ୟ ସାମଗ୍ରୀ ଯୋଗାଇବାରେ ନିଜକୁ ଆତ୍ମସନ୍ତୋଷ ମିଳୁଛି ଓ ନିଜର ଘରୋଇ ସହରର ଏହି ଲୋକମାନଙ୍କୁ ବ୍ୟକ୍ତିଗତ ଭାବେ ଜାଣେ ବୋଲି ସେ କହିଛନ୍ତି। କରୋନା ଭାଇରସର ସଫଳ ମୁକାବିଲା କରିବାକୁ ହେଲେ ସମସ୍ତଙ୍କୁ ଘରେ ରହିବାକୁ ହେବ। ଏହି ଲଢେଇରେ ଡାକ୍ତର, ନର୍ସ, କ୍ଲିନର୍ସ, ପୋଲିସ ଓ ଖବରଦାତାଙ୍କ ଭୂମିକା ଗୁରୁତ୍ୱପୂର୍ଣ୍ଣ ଓ ଏମାନଙ୍କୁ କୃତଜ୍ଞତା ଜଣାଇବା ଉଚିତ ବୋଲି ସେ କହିଛନ୍ତି। ଅନ୍ୟମାନଙ୍କୁ ସାହାଯ୍ୟ କରିବାକୁ ସକ୍ଷମ ହୋଇଥିବାରୁ ଭଗବାନଙ୍କୁ କୃତଜ୍ଞତା ଜଣାଉଛି। ସାମାଜିକ ଦୂରତା ରକ୍ଷା କରିବାକୁ ସେ ସମସ୍ତଙ୍କୁ ନିବେଦନ କରିଛନ୍ତି। ମଣିଷର ଜୀବନ ହେଉଛି ସବୁଠାରୁ ବଡ଼ କଥା। ଖୁବ୍ଶୀଘ୍ର ସ୍ଥିତି ସ୍ବାଭାବିକ ହେବ ବୋଲି ସେ ଆଶା ପ୍ରକାଶ କରିଛନ୍ତି।