କୋଲକାତା, ୮।୧୧(ପି.ଟି.)- ଆସନ୍ତା ୨୨ରୁ ୨୬ ତାରିଖ ମଧ୍ୟରେ ଇଡେନ ଗାର୍ଡେନ ଷ୍ଟାଡିୟମରେ ଭାରତ ଓ ବାଂଲାଦେଶ ମଧ୍ୟରେ ଦିବାରରାତ୍ର ଟେଷ୍ଟ ମ୍ୟାଚ୍ ଖେଳାଳିବ। ଭାରତ ପ୍ରଥମଥର ପାଇଁ ଦିବାରାତ୍ର ଟେଷ୍ଟ ଖେଳିବାକୁ ଯାଉଥିବା ବେଳେ ଏହି ଐତିହାସିକ ମୁହୂର୍ତ୍ତରେ ଦୁଇ ଚେସ୍ ସୁପରଷ୍ଟାର ବିଶ୍ୱନାଥନ ଆନନ୍ଦ ଓ ନରଓ୍ବେର ମାଗ୍ନସ କାର୍ଲସେନ ଇଡେନ ଗାର୍ଡନର ଘଣ୍ଟି ବଜାଇବେ। ପରମ୍ପରା ଦୃଷ୍ଟିକୋଣରୁ ପୂର୍ବତନ ବିଶ୍ୱ ଚାମ୍ପିୟନ ଆନନ୍ଦ ଓ ଏବେକାର ବିଶ୍ୱ ଚାମ୍ପିୟନ କାର୍ଲସେନ ମ୍ୟାଚ୍ର ୫ ଦିନ ମଧ୍ୟରେ ଗୋଟିଏ ଦିନରେ ଘଣ୍ଟି ବଜାଇବେ। ନବନିର୍ବାଚିତ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲିଙ୍କ ଇଚ୍ଛା ଅନୁଯାୟୀ ଏହି କାର୍ଯ୍ୟସମ୍ପନ୍ନ ହେବ। ତେବେ କାର୍ଲସେନ ଖୁବଶୀଘ୍ର ଏ ନେଇ ସମ୍ମତି ଜଣାଇବେ ବୋଲି ଆଶା କରାଯାଉଛି। ଗ୍ରାଣ୍ଡ ଚେସ୍ ଟୁରର ଅଂଶସ୍ବରୂପ ଟାଟା ଷ୍ଟିଲ୍ ଚେସ ଇଣ୍ଡିଆ- ରାପିଡ ଓ ବ୍ଲିଜ ୨୦୧୯ ପ୍ରତିଯୋଗିତାରେ ଏହି ତାରକା ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି।
ଇଡେନ ଘଣ୍ଟି ବଜାଇବାକୁ ବିସିସିଆଇ କାର୍ଲସେନଙ୍କୁ ନିମନ୍ତ୍ରଣ କରିଛି। ଯଦି ସମୟ ମିଳେ ତା’ହେଲେ ଆନନ୍ଦ ଓ କାର୍ଲସେନ କୌଣସି ଗୋଟିଏ ଦିନରେ ଉପସ୍ଥିତ ରହିବେ ଗୁରୁବାର ଏହି ଗସ୍ତର ବ୍ରାଣ୍ଡିଂ ପାର୍ଟନର ଓ ଅଫିସିଆଲ ସ୍ପୋନସର ଓ ଗେମ୍ପ୍ଲାନ ସ୍ପୋଟର୍ସ ନିର୍ଦ୍ଦେଶକ ଜିତ୍ ବାନାର୍ଜୀ କହିଛନ୍ତି। ଆନନ୍ଦ ନିମନ୍ତ୍ରଣ ସ୍ବୀକାର କରି ସାରିଛନ୍ତି ବୋଲି କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ତରଫରୁ କୁହାଯାଇଛି। ତେବେ କାର୍ଲସେନଙ୍କ ସମ୍ମତିକୁ ଅପେକ୍ଷା କରାଯାଇଛି। ମ୍ୟାଚ୍ ଅପରାହ୍ନ ୧ଟାରେ ଆରମ୍ଭ ହେବ। ପ୍ରଥମ ଦିବସରେ ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନା ଇଡେନ ଘଣ୍ଟି ବଜାଇବା ପରେ ମ୍ୟାଚ ଆରମ୍ଭ ହେବ। ଏହି ଅବସରରେ ଏକାଧିକ ଭାରତୀୟ କ୍ରୀଡ଼ା ତାରକା ଉପସ୍ଥିତ ରହିବେ। ସେମାନଙ୍କ ମଧ୍ୟରେ ସାନିଆ ମିର୍ଜା, ମହିଳା ବ୍ୟାଡମିଣ୍ଟନ ତାରକା ପି.ଭି. ସିନ୍ଧୁ ଓ ବକ୍ସିଂ ସୁପରଷ୍ଟାର ଏମ୍.ସି. ମେରୀକମ ସାମିଲ ରହିଛନ୍ତି।
ଏହି ଅବସରରେ ୨୦୦୦ରେ ଭାରତ ଓ ବାଂଲାଦେଶ ମଧ୍ୟ ଅନୁଷ୍ଠିତ ପ୍ରଥମ ଟେଷ୍ଟ ମ୍ୟାଚ ଖେଳିଥିବା କ୍ରିକେଟରଙ୍କୁ ସମ୍ବର୍ଦ୍ଧିତ କରାଯିବ। ଏହି ମ୍ୟାଚ୍ରେ ଗାଙ୍ଗୁଲି ଅଧିନାୟକ ହିସାବରେ ପଦାର୍ପଣ କରିଥିଲେ।