କୋଲକାତା,୧୦।୧୧(ପି.ଟି.)- ଆସନ୍ତା ୨୨ରୁ ୨୬ ତାରିଖ ମଧ୍ୟରେ ସ୍ଥାନୀୟ ଇଡେନ ଗାର୍ଡେନରେ ଭାରତ ଓ ଭ୍ରମଣକାରୀ ବାଂଲାଦେଶ ମଧ୍ୟରେ ଐତିହାସିକ ଦିବାରାତ୍ର ଟେଷ୍ଟ ମ୍ୟାଚ୍ ଖେଳାଯିବ। ପ୍ରଥମଥର ପାଇଁ ଭାରତ ଦିବାରାତ୍ର ଟେଷ୍ଟ ଖେଳିବାକୁ ଯାଉଥିବାରୁ ଏହାକୁ ଦେଖିବା ପାଇଁ ପ୍ରଶଂସକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ପ୍ରଥମ ୩ ଦିନରେ ୫୦,୦୦୦ରୁ ଊର୍ଦ୍ଧ୍ୱ ଦର୍ଶକ ଉପସ୍ଥିତ ରହିବେ ବୋଲି ଆଶା କରାଯାଉଛି। ଟିକେଟର ଚାହିଦା ଆଶାତୀତ ବୃଦ୍ଧି ପାଇଛି ବୋଲି କ୍ରିକେଟ ଆସୋସିଏଶନ ଅଫ୍ ବେଙ୍ଗଲ୍ (ସିଏବି) ଟୁଇଟ୍ କରି ସୂଚନା ଦେଇଛି। ଇତିମଧ୍ୟରେ ୧୭, ୦୦୦ ଟିକେଟ ଅନ୍ଲାଇନ୍ ମାଧ୍ୟମରେ ବିକ୍ରି ହୋଇସାରିଛି । ମୋଟ ଉପରେ ୫୦ ହଜାର ଟିକେଟ ବିକ୍ରି ହୋଇଛି ବୋଲି ସିଏବି ତରଫରୁ କୁହାଯାଇଛି। ବାକି ଟିକେଟଗୁଡିକ ଅନୁବନ୍ଧିତ ୟୁନିଟ୍ ତଥା ଆସୋସିଏଶନଗୁଡିକୁ ଦିଆଯାଇଛି। ପ୍ରଥମ ୩ ଦିନ ପାଇଁ ଟିକେଟ ଚାହିଦା ଅଧିକ ରହିଛି। ନଭେମ୍ବର ୧୪ ତାରିଖରେ ବାକି ୧୬,୦୦୦ ଟିକେଟ କାଉଣ୍ଟରରେ ବିକ୍ରି ହେବ। ଷ୍ଟାଡିୟମ ପୂର୍ଣ୍ଣ ହେବ ବୋଲି ସିଏବିର ଜଣେ ଅଫିସିଆଲ କହିଛନ୍ତି।
ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରଥମ ଦିନରେ ଇଡେନରେ ପାରମ୍ପରିକ ଘଣ୍ଟି ବଜାଇ ମ୍ୟାଚ ଆରମ୍ଭ କରିବେ। ଏହି ଅବସରରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ପଶ୍ଚିମବଙ୍ଗ ଗଭର୍ନର ଜଗଦୀପ ଧନକର ଉପସ୍ଥିତ ରହିବେ। ଏହି ଐତିହାସିକ ମୁହୂର୍ତ୍ତରେ କ୍ରିକେଟ ଆଇକନ ସଚିନ ତେନ୍ଦୁଲକର, ଅଲିମ୍ପିକ ଚାମ୍ପିୟନ ଅଭିନବ ବିନ୍ଦ୍ରା, ଟେନିସ ତାରକା ସାନିଆ ମିର୍ଜା, ବିଶ୍ୱ ବ୍ୟାଡମିଣ୍ଟନ ଚାମ୍ପିୟନ ପି.ଭି. ସିନ୍ଧୁ ଓ ୬ଥର ବିଶ୍ୱ ବକ୍ସିଂ ଚାମ୍ପିୟନଶିପ୍ ଜିତିଥିବା ଏମ୍ସି ମେରିକମ୍ ଉପସ୍ଥିତ ରହିବେ। ଏହି ତାରକା ଖେଳାଳିମାନଙ୍କୁ ମଧ୍ୟ ସିଏବି ତରଫରୁ ସମ୍ବର୍ଦ୍ଧିତ କରାଯିବ। ସ୍ବତନ୍ତ୍ର ଭାବେ ଡିଜାଇନ ହୋଇଥିବା ଫଳକ ଅତିଥିମାନଙ୍କୁ ପ୍ରଦାନ କରାଯିବ। ଗଲ୍ଫ କାର୍ଟରେ ଏମାନେ ଷ୍ଟାଡିୟମ ପରିକ୍ରମା କରିବେ। ଏହି ଅବସରରେ ୨୦୦୦ରେ ଭାରତ ଓ ବାଂଲାଦେଶ ମଧ୍ୟରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ର ସଦସ୍ୟମାନଙ୍କୁ ମଧ୍ୟ ସମ୍ବର୍ଦ୍ଧିତ କରାଯିବ। ଉଲ୍ଲେଖଥାଉ କି, ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ନବନିଯୁକ୍ତ ସଭାପତି ସୌରଭ ଗାଙ୍ଗୁଲି ଏହି ମ୍ୟାଚ୍ରେ ଅଧିନାୟକ ଭାବେ ପଦାର୍ପଣ କରିଥିଲେ।