କୋଲକାତା,୧୮ା୧୧ (ପି.ଟି.)-ଭାରତର ପ୍ରଥମ ଦିବାରାତ୍ର କ୍ରିକେଟ ଟେଷ୍ଟ ମ୍ୟାଚ ପାଇଁ କାଉଣ୍ଟଡାଉନ୍ ରବିବାରଠାରୁ ଆରମ୍ଭ ହୋଇଛି। ହର୍ଷ ଉଲ୍ଲାସର ସହରକୁ ଗୋଲାପୀ କରାଯାଇଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ବହୁ ପ୍ରତିକ୍ଷୀତ ଇଭେଣ୍ଟର ଅଫିସିଆଲ ମାସ୍କଟ ‘ପିଙ୍କୁ ଟିଙ୍କୁ’ର ଉନ୍ମୋଚନ କରିଛନ୍ତି। ଗାଙ୍ଗୁଲି ମ୍ୟାଚ ଟିକେଟ ସହ ପୋଜ୍ ଦେଇଛନ୍ତି। ବାଂଲାଦେଶ ବିପକ୍ଷ ଏହି ଐତିହାସିକ ଟେଷ୍ଟ ପୂର୍ବରୁ ଇଡେନଗାର୍ଡେନରେ ଏହି ମାସ୍କଟଟି କୁନି କୁନି ପିଲାଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ଷ୍ଟାଡିୟମର ଆକାଶ ମାର୍ଗରେ ଏକ ବୃହତ୍କାୟ ବେଲୁନ ଶୋଭା ପାଉଛି। ଭାରତ-ବାଂଲାଦେଶ ଟେଷ୍ଟ ମ୍ୟାଚ ଶେଷ ହେବା ପର୍ଯ୍ୟନ୍ତ ଏହି ବେଲୁନ୍ଟି ରହିବ। ସହରର ସବୁଠାରୁ ଉଚ୍ଚ ଅଟ୍ଟାଳିକା ଶହିଦ ମିନାର ‘୪୨’ ଏବଂ କୋଲକାତା ମ୍ୟୁନିସିପାଲିଟି କର୍ପୋରେଶନର କେତୋଟି ପାର୍କକୁ ଗୋଲାପୀ ଆଲୋକରେ ସଜ୍ଜା ଯାଇଛି। ହୁଗ୍ଳୀ ନଦୀରେ ଚଳପ୍ରଚଳ କରୁଥିବା ଏକ ଡଙ୍ଗାରେ ଏକ ଆଲୋକିତ ଗୋଲାପୀ ବଲ ଶୋଭା ପାଉଛି। ଏହି ଡଙ୍ଗା ମ୍ୟାଚ ଆରମ୍ଭ ଅର୍ଥାତ ନଭେମ୍ବର ୨୨ ପର୍ଯ୍ୟନ୍ତ ପ୍ରତ୍ୟେକ ସନ୍ଧ୍ୟାରେ ଆଇକନିକ ହାଓ୍ବଡ଼ା ଏବଂ ବିଦ୍ୟାସାଗର ସେତୁ ମଧ୍ୟରେ ଯିବା ଆସିବା କରିବ। ନଭେମ୍ବର ୨୦ରୁ ଟାଟା ଷ୍ଟିଲ ବିଲଡିଂରେ ଥ୍ରିଡି ମ୍ୟାପିଂ ଶୋଭାପାଇବ। ମେଜର୍ସ କ୍ଲବ ଗୋଲାପୀ ଆଲୋକମାଳାରେ ସଜ୍ଜିତ ହୋଇଛି। ଅନ୍ୟ କେତେକ ଏହି ଯୋଜନାରେ ନିଜକୁ ସାମିଲ କରିଛନ୍ତି। ଏହାଛଡ଼ା ସୋମବାରଠାରୁ ସମଗ୍ର ସହରରେ ବିଲ୍ବୋର୍ଡ, ୬ଟି ଏଲ୍ଇଡି ବୋର୍ଡ ଏବଂ କେତେକ ବସ୍ ଜରିଆରେ ଟେଷ୍ଟ କ୍ରିକେଟ ପ୍ରତି ଆଗ୍ରହ ଏବଂ ସଚେତନତା ସୃଷ୍ଟି କରାଯିବ। ଇଡେନଗାର୍ଡେନ ଭିତରପଟ ପାଚେରୀରେ କ୍ରିକେଟ ଖେଳ ସମ୍ପର୍କିତ ଚିତ୍ର ସ୍ଥାନ ପାଇବ। ଏଥିପାଇଁ ବେଙ୍ଗଲ କ୍ରିକେଟ ଆସୋସିଏଶନ (ସିଏବି) ସ୍ଥାନୀୟ କ୍ରେଓକ୍ରାଫ୍ଟ ନାମକ ଏକ ଏଜେନ୍ସିର ସହାୟତା ନେଇଛି। ୨୦ ଜଣ ଚିତ୍ର ଶିଳ୍ପୀ ଦିନରାତି ଲାଗିପଡ଼ିଛନ୍ତି।
