ଧମା, ୬।୧୨ (ଡି.ଏନ.ଏ.)-
ଉଭଏ କେନ୍ଦ୍ର ଆର ରାଏଜ୍ ସରକାର ଦିବ୍ୟାଙ୍ଗମାନକର ଲାଗି ଅନେକ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ହକ୍ଦାର ହିତାଧିକାରୀ ଇଥିର ଲାଭ ନାଇଁ ପାଏବାର। ଏନ୍ତାଥି ନିଜର ଦିବ୍ୟାଙ୍ଗ ଛୁଆପିଲାକର ଚିକିଛା, ସରକାରୀ ସୁବିଧା ସୁଯୋଗ ଲାଗି ଗରିବ୍ ମା’ବାପ୍ମାନେ ହଇରାନ ହରକତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ସମ୍ବଲପୁର ଜିଲା ଯୁଯୁମୁରା ବ୍ଲକ ଲିପିଣ୍ଡା ପଁଚେତ୍ ୬ ନମ୍ବର ୱାର୍ଡରେ।
ସୂଚନା ଅନ୍ସାରେ ଲିପିଣ୍ଡା ପଁଚେତ୍ ୬ ନମ୍ବର ଓ୍ବାର୍ଡର ରବୀନ୍ଦ୍ର ପଧାନ(୪୦)କଁର ପରିବାର କହେଲେ ମାଏକିନା କୁମୁଦିନୀ(୩୫) ଆର ଦୁଇ ପୁଓ ଆୟୁଷ(୭), ଅଭିଷେକ(୪)କୁଁ ନେଇ ସଁସାର। ପରିବାରଟା ନିହାତି ଗରିବ୍, ଜମିବାଡ଼ି ବଲି କଛି ନାଇଁ। ରବୀନ୍ଦ୍ର କୁଲିମଜୁରି କରି ନିଜର କୁଟୁମ ପୁଷୁଛନ୍। ଅଭାବ ଅନାଟନ ଲାଗି ନିଜର ବଡ଼ପୁଓ ଆୟୁଷକେ ତାକର ମାମୁ ଘରେ ଛାଡ଼ିଦେଇଛନ୍। ସେନ୍ତା ସାନପୁଓ ଅଭିଷେକ ଜନ୍ମୁ ଦିବ୍ୟାଙ୍ଗ। ସେ ଚାଲବୁଲ, କଥା କହି ନାଇଁ ପାରବାର। ସେ ୪ ବଛ୍ରର ହେଲା ଉତାରୁ ବି ତାକର ହାତ ବେଭାର କରି ନାଇଁ ପାରବାର। ଗରିବ୍ ମା’ବାପ୍ ପୁଓକେ ସମ୍ବଲପୁର ସଦର ଡାକ୍ତରଖାନାରେ ଅନେକ ଥର ଚିକିଛା କରେଇଛନ୍। ସବୁଥର ଡାକ୍ତର କେତେ ବ୍ୟାୟାମ ଶିଖେଇ ଦେଇ ଘରେ ଅଭିଆସ କରାବାକେ କହି ଛାଡ଼ି ଦେଉଛନ୍। ହେଲେ ସେଥ୍ରେ କିଛି ଲାଭ୍ ନାଇଁ ହେବାର ବଲି ଅଭିଷେକକଁର ମା’ କୁମୁଦିନୀ କହିଛନ୍। ଇଆଡ଼େ ଅଭାବ ଅନାଟନ ଲାଗି ଗରିବ୍ ମା’ବାପ୍ ପୁଓର ଉଚ ଚିକିଛା କରେଇ ନାଇଁପାରବାର। ରବୀନ୍ଦ୍ର ପୁଓର ଚିକିଛା ସାହାଯ୍ ଆର ଦିବ୍ୟାଙ୍ଗ ପରମାନପତର ଲାଗି ବ୍ଲକରେ ଅନେକ ଥର ଆବେଦନ କରି ନିରାଶ ହେଇଥିବାର ଅଭିଯୋଗ କରିଛନ୍। ସେନ୍ତା ଅଭିଶେଷକୁଁ କୁମୁଦିନୀ ଘରେ ଏକଲା ଛାଡ଼ି କାହିଁ କାମ୍ବୁତା କରିଯାଇ ନାଇଁପାରବାର। ଏନ୍ତାଥି ରବୀନ୍ଦ୍ର କୁଲିମଜୁରି କରି ଯାହା କମଉଛନ୍ ସେଟା ପେଟ୍କେ ଅଁଟ୍ଲେ ଦିହିକେ ନାଇଁ। ଅଭାବ ଅନାଟନ, ସରକାରୀ ସାହାଯ୍ ଅଭାବୁ ଆଏଜ୍ ବି କୁଟୁମଟା ଗୁଟେ ଭଂଗା ଦଦ୍ରା କୁରିଆରେ ମୁଡ଼ ଗୁଁଜିଛନ୍। ଜିଲା ଆର ବ୍ଲକ ପରଶାସନ ଇ ଗରିବ୍ ପରିବାର ଉପରେ ଦୁରୁଷ୍ଟି ଦେଇ ଅଭିଷେକକୁଁ ଚିକିଛା ସାହାଯ୍ ଆର ପରିବାରକେ ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ବୁଧିଜୀବୀ ମହଲରେ ଦାବି ହେଉଛେ।