ଲାଠୋର, ୨୬।୨ (ଡି.ଏନ୍.ଏ.)- ସରକାର ଦିବ୍ୟାଙ୍ଗମାନକୁ ସମାଜର ମୁଖିଆ ଧାରରେ ସାମିଲ କରବାର ଲାଗି ଭିନେ ଭିନେ ଯୋଜନାରେ ସାମିଲ କରୁଛନ୍। ହେଲେ ଅନେକ୍ ଜାଗାରେ ଦିବ୍ୟାଙ୍ଗମାନେ ଇ ସରକାରୀ ସୁବିଧା ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ତୁରେକେଲା ବ୍ଲକ କୁଇବାହାଲ ପଁଚେତ୍ ବାଞ୍ଜିପାଲି ଗଁାରେ।
ସୂଚନା ଅନ୍ସାରେ ବାଞ୍ଜିପାଲି ଗଁାର ଗୋପାଲ ମାଝି। ପରିବାର କହେଲେ ମାଏକିନା ଯୋଶୋଦା ଆର ପୁଓ ପର୍ଶୁରାମକୁ ନେଇ ସଁସାର। ଯଶୋଦା ଝନେ ଦିବ୍ୟାଙ୍ଗ ମହିଲା। କେହେନ୍ସି କାରନ୍ରୁ ତାକର ଭୁଜ୍ନି ଫାଲଟା ନାଇଁ ଚଲବାର। ଏନ୍ତାଥି ସେ ବଡ଼ା କଷ୍ଟେ ଘରର କାମ୍କାଯ୍ କରୁଛନ୍। ୨୦୧୬ ସାଲେ ସେ ୫୦ ପରତିଶତ ଭିନ୍ନକ୍ଷମ ପରମାନପତର ବି ପାଇଛନ୍। ସେ ପଁଚେତ୍ରୁ ବ୍ଲକ ତକ୍ ଦରକାରୀ କାଗଜପତର ଦେଇ ଭାତାର ଲାଗି ଆବେଦନ ବି କରିଛନ୍। ହେଲେ କେହି ତାକର କଥା ନାଇଁ ଶୁନୁଥିବାର ସେ ଅଭିଯୋଗ କରିଛନ୍। ଇ ଦିଗେ ବ୍ଲକ ପରଶାସନ ଦୁରୁଷ୍ଟି ଦେଇ ଯଶୋଦାକୁଁ ଭିନ୍ନକ୍ଷମ ଭତା ଯୁଗେଇ ଦେବାକେ ସାଧାରନରେ ଦାବି ହେଉଛେ।