ଖୋର୍ଦ୍ଧା ଅଫିସ/ଟାଙ୍ଗୀ,୫ା୧୨(ଡି.ଏନ୍.ଏ.): ଖୋର୍ଦ୍ଧା ପୋଲିସ ଜିଲା ଟାଙ୍ଗୀ ଥାନା ଉଗ୍ରତାର ଛକଠାରୁ ଲୁଟ୍ ହୋଇଥିବା ୧.୨ କୋଟି ଟଙ୍କାର ସିଗାରେଟ୍ ଦିଲ୍ଲୀରୁ ଜବତ ହୋଇଛି। ତେବେ ଦୁର୍ବୃତ୍ତମାନେ ଧରା ପଡି ନ ଥିବାବେଳେ ଚୋରି ଉପକରଣ ରଖି ଦିଲ୍ଲୀର ୨ଜଣ ବ୍ୟବସାୟୀ ଫସିଛନ୍ତି। ଖୋର୍ଦ୍ଧାର ୩ ଜଣିଆ ସ୍କ୍ବାଡ ଏହି ଦୁଇ ବ୍ୟବସାୟୀଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ପରେ ମଧ୍ୟପ୍ରଦେଶ ଇନ୍ଦୋର ଜିଲା ଚନ୍ଦନନଗର ଥାନା ସେକ୍ଟର ବି ଘର ନଂ. ୧୭୩୨ର ଅମିତ୍ ଚୋପ୍ରା(୩୭) ଓ ଭାବରକୁଅଁା ଥାନା କୌଶଲ୍ୟାପୁରୀ ନେମାମ୍ବର ରୋଡର ଅମିତ ଚୌଧୁରୀ(୪୦)ଙ୍କୁ ଖୋର୍ଦ୍ଧା ସବ୍ଜେଲକୁ ପଠାଇ ଦିଆଯାଇଛି। ଖୋର୍ଦ୍ଧା ପୋଲିସ ମୁଖ୍ୟାଳୟରେ ବୁଧବାର ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ଅଜେୟ ପ୍ରସାଦ ସ୍ବାଇଁ ଏହି ସୂଚନା ଦେଇଛନ୍ତି।
ନଭେମ୍ବର ୪ ସନ୍ଧ୍ୟାରେ ଟାଙ୍ଗୀ ଥାନା ୧୬ ନଂ. ଜାତୀୟ ରାଜପଥର ଉଗ୍ରତାରା ଛକରୁ କଣ୍ଟେନର ସହ ୩୨୦ କାର୍ଟୁନ ସିଗାରେଟ୍ ଲୁଟ୍ ହୋଇଥିଲା। ଏହାର ଦାମ ୧ କୋଟି ୪୭ ଲକ୍ଷ ୪୦ ହଜାର ୧୩୦ ଟଙ୍କା ହେବ। ଯାହାକି ହାଇଦ୍ରାବାଦରୁ କଲିକତା ଯାଉଥିଲା। ୮ ଲୁଟେରା ୧୦ ଚକିଆ ଟ୍ରକକୁ ସିଗାରେଟ୍ ବୋଝେଇ ଟ୍ରକ ସମ୍ମୁଖରେ ରଖି ଅଟକାଇଥିଲେ। ପରେ ଡ୍ରାଇଭର ସହ ସିଗାରେଟ୍ ବୋଝେଇ କଣ୍ଟେନରକୁ ହାଇଯାକ୍ କରିଥିଲେ। କିଛି ବାଟ ଯିବା ପରେ ଉଗ୍ରତାର ଜଙ୍ଗଲର ଏକ ଗଛରେ ଡ୍ରାଇଭରଙ୍କୁୁ ବାନ୍ଧି ଦେଇଥିଲେ। କଣ୍ଟେନରରୁ ୩୨୦ କାର୍ଟୁନ ସିଗାରେଟ୍ କାଢ଼ି ନିଜେ ଆଣିଥିବା ୧୦ ଚକିଆ ଟ୍ରକରେ ଲୋଡ ପରି ଚାଲି ଯାଇଥିଲେ। ଘଟଣାସ୍ଥଳରୁ ଡ୍ରାଇଭର ଆସି ପୋଲିସକୁ ଜଣାଇଥିଲେ। ଲୁଟ୍ ପରେ ଜିଓ ଫାଷ୍ଟ ଟ୍ରାନ୍ସପୋର୍ଟ କମ୍ପାନୀର ମ୍ୟାନେଜର ସନ୍ଦୀପ କସେରାଙ୍କ ଅଭିଯୋଗକ୍ରମେ ପୋଲିସ ଦଫା ୩୯୫ ଆଇପିସିରେ ନଂ. ୩୨୫/୧୯ରେ ମାମଲା ରୁଜୁ କରି ତଦନ୍ତ କରିଥିଲା। ଲୁଟ୍ର ପର୍ଦ୍ଦାଫାଶ ଓ ଦୁର୍ବୃତ୍ତଙ୍କୁ ଧରିବାକୁ ପୋଲିସ ପକ୍ଷରୁ ଏକ ୩ ଜଣିଆ ଟିମ୍ ଗଠନ କରାଯାଇଥିଲା। ଏଥିରେ ବାଲୁଗଁା ଏସ୍ଡିପିଓ, ଆଇଆଇସି ଟାଙ୍ଗୀ ଓ ସାଇବର କନଷ୍ଟେବଳ ଗହୁରୁଦ୍ଦିନ ଖାନ ସାମିଲ ହୋଇ ଲୁଟ୍ର ଧରପଗଡ କାର୍ଯ୍ୟରେ ଲାଗି ପଡିଥିଲେ। ଟିମ୍ ଇନ୍ଦୋରସ୍ଥିତ ପୀତାମ୍ବର ରାମ ରତନ ପଟେଲ କଲୋନୀରୁ ଅମିତ୍ ଚୋପ୍ରା ଓ ଅମିତ୍ ଚୌଧୁରୀ ଭଡାରେ ନେଇଥିବା ଗୋଦାମରୁ ୧୦ ଲକ୍ଷ ଟଙ୍କା ସହ ଚୋରି ଯାଇଥିବା ୨୩୮ କାଟୁନ ସିଗାରେଟ୍ ଜବତ କରିଥିଲେ। ତଦନ୍ତରୁ ସିଗାରେଟ୍ ବିକ୍ରି ଅର୍ଥ ୧୦ ଲକ୍ଷ ଟଙ୍କା ସହ ସିଗାରେଟ୍ ମିଶି ଦୁଇ ବ୍ୟବସାୟୀଙ୍କଠାରୁ ୧ କୋଟି ୨ ଲକ୍ଷ ୮ ହଜାର ୧୭୫ ଟଙ୍କା ଜବତ କରାଯାଇଥିଲା।