ରୂପ୍ସା, ୨୭।୪(ଡି.ଏନ.ଏ.): ସାରା ଦେଶ ଏବେ କରୋନା ପାଇଁ ଲକ୍ଡାଉନ୍ରେ ରହିଛି। ସମସ୍ତେ ସରକାରଙ୍କ ନିୟମ ମାନି ନିଜ ନିଜ ଘରେ ରହୁଛନ୍ତି। ସହରଠାରୁ ଗ୍ରାମାଞ୍ଚଳ ପର୍ଯ୍ୟନ୍ତ ପୋଲିସ ପ୍ରଶାସନ ପକ୍ଷରୁ ସାମାଜିକ ଦୂରତା ରକ୍ଷା ଦିଗରେ ରାତିଦିନ ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରାଯାଇଛି। ସୁରକ୍ଷା ପାଇଁ ଡାକ୍ତର, ସ୍ବାସ୍ଥ୍ୟକର୍ମୀ, ପ୍ରଶାସନିକ ଅଧିକାରୀ ଓ ସମାଜସେବୀ ପ୍ରମୁଖ ଆଗେଇ ଆସିଛନ୍ତି। ଅସହାୟ, ନିରାଶ୍ରୟ ଓ ବେରୋଜଗାରୀମାନଙ୍କୁ ବିଭିନ୍ନ ଖାଦ୍ୟ ଓ ରାଶନ ସାମଗ୍ରୀ ଯୋଗାଣ ହେଉଛି। ଏଭଳି ବିପତ୍ତି ସମୟରେ ଦିଲ୍ଲୀରେ ଓଡ଼ିଆ ସମାଜ ପକ୍ଷରୁ ବହୁ ଓଡ଼ିଆ ଶ୍ରମିକଙ୍କୁ ରାଶନ ସାମଗ୍ରୀ ବଣ୍ଟନ କରାଯାଇଛି। ହରିୟାଣାର ବାହାଦୂରଗଡ଼ ଜଗନ୍ନାଥ ପରିସରରେ ଶ୍ରୀ ଶ୍ରୀ ଜଗନ୍ନାଥ ସେବା ସଂସ୍ଥାର କର୍ମକର୍ତ୍ତା ଭୂପତି ପରିଡ଼ା, ରମେଶ ଦାସ, ଅମର ବେହୁରିଆ, ଅଜୟ ବେହେରା, ପ୍ରଦୀପ ମଲିକ ଓ କିଶୋର ସାମଲଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଓଡ଼ିଆ ଶ୍ରମିକଙ୍କୁ ୧୬୩ଟି ରାଶନ ସାମଗ୍ରୀ ପ୍ୟାକେଟ୍ ବଣ୍ଟନ କରାଯାଇଛି। ଏହି ଅବସରରେ ପ୍ରବାସୀ ଓଡ଼ିଆମାନେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ଓଡ଼ିଆ ସମାଜର ହିରଣ୍ୟ ମହାନ୍ତି, ସୁନ୍ଦର ଓଡ଼ିଶାର ସଂସ୍ଥାପକ ସଂଗ୍ରାମ ଧର, ଦେବରାଜ ମହାନ୍ତି, ରମେଶ ଲେଙ୍କା ଓ ଶ୍ରୀମନ୍ତ ବିଶ୍ୱାଳଙ୍କୁ ସହଯୋଗ ପାଇଁ କୃତଜ୍ଞତା ଜ୍ଞାପନ କରିଛନ୍ତି।