ସୋନପୁର,୪।୪(ନି.ପ୍ର.)-ସୁବର୍ଣ୍ଣପୁର ଜିଲା ବୀରମହରାଜପୁର ସହର ଉପକଣ୍ଠରେ ଥିବା ସଂଖ୍ୟାଲଘୁ ସମ୍ପ୍ରଦାୟର ଜଣେ ବ୍ୟକ୍ତିଙ୍କ ଘରେ ୧୦ଜଣ ଅପରିଚିତ ଲୋକ ଗତ କିଛିଦିନ ହେଲା ରହି ଆସୁଥିଲେ । ଦିଲ୍ଲୀ ନିଜାମୁଦ୍ଦିନ ଘଟଣା ପରେ ସ୍ଥାନୀୟ ଲୋକେ ସନ୍ଦେହ କରି ଏ ସମ୍ପର୍କରେ ପୋଲିସକୁ ଜଣାଇଥିଲେ । ଘର ତଲାସୀ ପରେ ଦିଲ୍ଲୀ ଅଶୋକ ନଗର ଅଞ୍ଚଳର ୯ ଜଣ ଓ ଉତ୍ତର ପ୍ରଦେଶ ମିରଟ ଲୋହିଆ ନଗର ଅଞ୍ଚଳର ଜଣଙ୍କୁ ଠାବ କରା ଯାଇଥିଲା । ସେମାନେ କାହାକୁ କିଛି ନ ଜଣାଇ ଗତ ୧୯ ଦିନ ଧରି ସମ୍ପୃକ୍ତ ବ୍ୟକ୍ତିଙ୍କ ଘରେ ରହୁଥିଲେ । ପୋଲିସ ସହାୟତାରେ ସମସ୍ତଙ୍କୁ ବୀରମହରାଜପୁର ସରକାରୀ ଉଚ୍ଚ ବିଦ୍ୟାଳୟ(ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର)ରେ କ୍ୱାରେଣ୍ଟାଇନରେ ରଖାଯାଇଛି । ଶନିବାର ସ୍ୱାସ୍ଥ୍ୟ ବିଭାଗ ପକ୍ଷରୁ ସମ୍ପୃକ୍ତଙ୍କ ରକ୍ତ, ସ୍ବାବ ସଂଗ୍ରହ ହୋଇ ସନ୍ଧ୍ୟାରେ ପରୀକ୍ଷଣ ପାଇଁ ଭୁବନେଶ୍ୱର ପଠାଯାଇଛି । ଜନସାଧାରଣ ଆତଙ୍କିତ ନହେବା ପାଇଁ ଜିଲା ପ୍ରଶାସନ ପକ୍ଷରୁ ଅନୁରୋଧ କରାଯାଇଛି ।