ନୂଆଦିଲ୍ଲୀ,୬।୧: ଦିଲ୍ଲୀ ବିଧାନସଭା ନିର୍ବାଚନ ପାଇଁ ବିଗୁଲ ବାଜିଛି। ସୋମବାର ନିର୍ବାଚନ କମିଶନ ସୁନୀଲ ଅରୋରା ଖବରଦାତା ସମ୍ମିଳନୀ କରି ଆସନ୍ତା ବିଧାନସଭା ନିର୍ବାଚନ ଓ ଫଳାଫଳର ତାରିଖ ଘୋଷଣା କରିଛନ୍ତି। ଫେବୃଆରୀ ୮ରେ ମତଦାନ ହେବାକୁ ଥିବା ବେଳେ ୧୧କୁ ଫଳାଫଳ ଆସିବ। ଚଳିତଥର ବୃଦ୍ଧ ଓ ଦିବ୍ୟାଙ୍ଗମାନଙ୍କ ପାଇଁ ନିର୍ବାଚନ କମିଶନ ସ୍ବତନ୍ତ୍ର ବ୍ୟବସ୍ଥା କରିଛନ୍ତି। ରାଜଧାନୀରେ ରହୁଥିବା ୮୦ବର୍ଷ ବୟସରୁ ଊର୍ଦ୍ଧ୍ୱ ମତଦାତାଙ୍କୁ ଏବେ ମତଦାନ କେନ୍ଦ୍ରକୁ ଆଉ ଯିବାକୁ ପଡ଼ିବ ନାହିଁ। ଘରେ ବସି ସେମାନେ ପୋଷ୍ଟାଲ ବାଲଟ୍ ଜରିଆରେ ମତଦାନ କରିପାରିବେ। ଏହାଦ୍ୱାରା ଦିଲ୍ଲୀବାସୀଙ୍କୁ ଆଉ ଏକ ଲାଭ ମିଳିପାରିବ। ଦିଲ୍ଲୀର ୧.୪୬ କୋଟି ମତଦାତା ନିର୍ବାଚନ ସମୟରେ ଘରେ ବସି ଜାଣିପାରିବେ ଯେ ନିକଟ କେନ୍ଦ୍ରଗୁଡିକରେ କେତେ ଲମ୍ବା ଲାଇନ୍ ଲାଗିଛି ଓ କେତେଜଣ ମତଦାନ କରିସାରିଛନ୍ତି।