ନୂଆଦିଲ୍ଲୀ,୩୧।୧: ଦିଲ୍ଲୀ ବିଧାନସଭା ନିର୍ବାଚନକୁ ନେଇ ଏବେ ରାଜନୀତି ରହିଛି ଗରମ। ତେବେ ଏହି ସମୟରେ ଦିଲ୍ଲୀ ନିର୍ବାଚନରେ ପାକିସ୍ତାନର ପ୍ରବେଶକୁ ନେଇ ଚର୍ଚ୍ଚା ଯୋର ଧରିଛି। ପାକିସ୍ତାନ କହିଛି ଏହି ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଭାରତୀୟ ଜନତା ପାର୍ଟି(ଭାଜପା)କୁ ହରାଇବା ଦରକାର। ଅବଶ୍ୟ ଏହା କୌଣସି ସାଧାରଣ ନାଗରିକ କହି ନାହାନ୍ତି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ସରକାରରେ ବିଜ୍ଞାନ ଓ ପ୍ରଯୁକ୍ତିବିଦ୍ୟା ମନ୍ତ୍ରୀ ଥିବା ଫୟାଦ ଚୌଧୁରୀ ଏହା କହିଛନ୍ତି। ଗୁରୁବାର ସେ ଏହା ଟୁଇଟ୍ କରି କହିଛନ୍ତି। ସେ ତାଙ୍କ ଟୁଇଟ୍ରେ ଲେଖିଛନ୍ତି ଭାରତୀୟମାନେ ମୋଦିଙ୍କୁ ହରାଇବା ଦରକାର। କିଛି ରାଜ୍ୟରେ ଭାଜପା ହାରିବା ପରେ ମୋଦି ଚିନ୍ତାରେ ଅଛନ୍ତି ବୋଲି ସେ କହିଛନ୍ତି। ସେହିପରି ସିଏଏ ଓ ଏନ୍ଆର୍ସିକୁ ନେଇ ମଧ୍ୟ ସେ ମୋଦିଙ୍କୁ ଟାର୍ଗେଟ କରିଛନ୍ତି। ମୋଦିଙ୍କର ଏକ ଭାଷଣ ପରେ ପାକିସ୍ତାନ ମନ୍ତ୍ରୀ ଏଭଳି ଟୁଇଟ୍ କରିଥିବା ସୂଚନା ମିଳିଛି। ଏହା ଫୟାଦଙ୍କ ପ୍ରଥମ ବିବାଦୀୟ ବୟାନ ନୁହେଁ। ଏହାପୂର୍ବରୁ ସେ ଏମିତି କିଛି ବୟାନ ଦେଇ ଆସିଛନ୍ତି ଚର୍ଚ୍ଚାକୁ। ଏଥରର ବୟାନକୁ ନେଇ କେଜରିଓ୍ବାଲ ଏହାର କଡା ଜବାବ ଦେଇଛନ୍ତି। କେଜରିଓ୍ବାଲ କହିଛନ୍ତି ନରେନ୍ଦ୍ର ମୋଦି ଭାରତର ପ୍ରଧାନମନ୍ତ୍ରୀ, ମୋର ପ୍ରଧାନମନ୍ତ୍ରୀ ଦିଲ୍ଲୀର ନିର୍ବାଚନ ଭାରତର ଆଭ୍ୟନ୍ତରୀଣ ମାମଲା। ତେଣୁ ଆତଙ୍କବାଦର ସବୁଠାରୁ ବଡ ପ୍ରାୟୋଜକ ଦେଶର ସାହାଯ୍ୟ ନେବା ଆମର ଆବଶ୍ୟକ ନାହିଁ ବୋଲି ସେ କହିଛନ୍ତି। ପାକିସ୍ତାନ ଯେତେ ଚାହିଁଲେ ବି ଆମ ଏକତାକୁ ଭାଙ୍ଗି ପାରିବ ନାହିଁ ବୋଲି କେଜରିଓ୍ବାଲ କହିଛନ୍ତି।