ନୂଆଦିଲ୍ଲୀ,୮।୨: ଦିଲ୍ଲୀ ବିଧାନସଭା ନିର୍ବାଚନ ପାଇଁ ମତଦାନ ଆରମ୍ଭ ହୋଇଥିଲେ ମଧ୍ୟ ନେତାଙ୍କ ମଧ୍ୟରେ ଟଣା ଭିଡା ଶେଷ ହୋଇନାହିଁ। ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି(ଏଏପି)ମୁଖ୍ୟ ଅରବିନ୍ଦ କେଜରିଓ୍ବାଲଙ୍କ ‘ହନୁମାନ ଚାଳିଶାପାଠ’କୁ ନେଇ ବିବାଦ ଥମୁନାହିଁ। ଦିଲ୍ଲୀର ଭାରତୀୟ ଜନତା ପାର୍ଟି(ଭାଜପା) ମୁଖ୍ୟ ମନୋଜ ତିଓ୍ବାରୀ ମତଦାନ କରି ସାରିବା ପରେ ପୁଣିଥରେ କେଜରିଓ୍ବାଲଙ୍କୁ ଟାର୍ଗେଟ କରିଛନ୍ତି। ଶୁକ୍ରବାର କେଜରିଓ୍ବାଲ ହନୁମାନ ମନ୍ଦିରରେ ପୂଜାର୍ଚ୍ଚନା କରିବାକୁ ନେଇ ମନୋଜ କହିଛନ୍ତି କେଜରିଓ୍ବାଲ ହନୁମାନ ମନ୍ଦିର ପୂଜା କରିବାକୁ ଯାଇଥିଲେ ନା ହନୁମାନଙ୍କୁ ଅଶୁଦ୍ଧ କରିବାକୁ ଯାଇଥିଲେ। ସେ କହିଛନ୍ତି କେଜରିଓ୍ବାଲ ଯେଉଁ ହାତରେ ଜୋତା ଖୋଲିଲେ ସେହି ହାତରେ ଫୁଲମାଳ ନେଇ ମନ୍ଦିରକୁ ଗଲେ। ତେଣୁ ଯେତେବେଳେ ନକଲି ଭକ୍ତ ଆସନ୍ତି ସେତେବେଳେ ଏମିତି ହୋଇଥାଏ ବୋଲି ମନୋଜ କହିଛନ୍ତି। ଏହାକୁ ନେଇ କେଜରିଓ୍ବାଲ ଟୁଇଟ୍ କରି କହିଛନ୍ତି, ଭାଜପା ମୋର ହନୁମାନ ଚାଳିଶାପାଠ ଓ ମନ୍ଦିର ଦର୍ଶନକୁ ନେଇ ପରିହାସ କରୁଛି। ହେଲେ ଭଗବାନ ତ ସମସ୍ତଙ୍କର। ସେ ସମସ୍ତଙ୍କୁ ଆଶୀର୍ବାଦ ଦିଅନ୍ତୁ। ଭାଜପା ନେତାଙ୍କୁ ବି ଆଶୀର୍ବାଦ ଦିଅନ୍ତୁ ସମସ୍ତେ ଭଲରେ ରୁହନ୍ତୁ ବୋଲି କେଜରିଓ୍ବାଲ ତାଙ୍କ ଟୁଇଟରେ ଲେଖିଛନ୍ତି।