ଓ୍ବାଶିଂଟନ,୨।୩: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିକଟରେ ପରିବାର ସହ ଦୁଇ ଦିନିଆ ଭାରତ ଗସ୍ତରେ ଆସିଥିଲେ। ତାଙ୍କ ସହ ଥିଲେ ଆମେରିକାର ଫାଷ୍ଟ ଲେଡି ମେଲାନିଆ ଟ୍ରମ୍ପ, ଡୋନାଲ୍ଡଙ୍କ ଝିଅ ଇଭାଙ୍କା ଓ ଜ୍ୱାଇଁ ଜେରେଡ। ଏମାନେ ଭାରତ ଗସ୍ତ ସମୟରେ ତାଜମହଲ ଭ୍ରମଣରେ ଯାଇଥିଲେ। ସେଠାରେ ଇଭାଙ୍କା ତାଙ୍କ ସ୍ବାମୀ ଜେରେଡଙ୍କ ସହ ଯଉଁସବୁ ଫଟୋ ଉଠାଇଥିଲେ ଆମେରିକା ଫେରିବା ପରେ ସେସବୁକୁ ସୋସିଆଲ ମିଡିଆରେ ଅପଲୋଡ କରିଥିଲେ। ଆଉ ଏହାପରେ ଫଟୋ ସବୁ ଭାଇରାଲ ହେବାରେ ଲାଗିଥିଲା। ଏବେ ଏହି ଫଟୋକୁ ନେଇ ମିମ୍ସ କରାଯାଉଥିବା ବେଳେ ଏଥିରେ ପଞ୍ଜାବୀ ଗାୟକ ଦିଲ୍ଜିତ ଦୋସାଂଝ ଓ ବଲିଉଡ୍ କଳାକାର ମନୋଜ ବାଜପେୟୀଙ୍କ ନାଁ ବି ସାମିଲ ହୋଇଥିବା ଦେଖାଯାଇଛି। ଦିଲଜିତ୍ ଏବେ ଏକ ଫଟୋ ଶେୟାର କରିଛନ୍ତି ଯେଉଁଥିରେ ସେ ଇଭାଙ୍କାଙ୍କ ସହ ତାଜମହଲ ପରିସରରେ ବସିଥିବା ଦେଖାଯାଇଛି। ଏହି ଫଟୋ ଶେୟାର କରି ଦିଲଜିତ୍ ଲେଖିଛନ୍ତି ଇଭାଙ୍କା କୁଆଡେ ତାଙ୍କୁ ତାଜମହଲ ବୁଲାଇବାକୁ ନେବାକୁ କହିବାରୁ ଦୁହେଁ ମିଶି ତାଜମହଲ ବୁଲିବାକୁ ଯାଇଥିଲେ। ଦିଲଜିତଙ୍କ ଏହି ଟୁଇଟ୍ର ଉତ୍ତରରେ ଇଭାଙ୍କା କହିଛନ୍ତି, ତାଜମହଲ ବୁଲାଇଥିବାରୁ ଧନ୍ୟବାଦ। ଏହି ମୁହୂର୍ତ୍ତକୁ କେବେ ଭୁଲି ହେବନାହିଁ। ଆଉ ଏହାକୁ ଦେଖିବା ପରେ ଦିଲଜିତ କହିଛନ୍ତି, ଓ ମାଇ ଗଡ୍… ଅତିଥି ଦେବୋ ଭବଃ। କେବଳ ଦିଲ୍ଜିତ ନୁହେଁ ଏବେ ଫଟୋଶପ୍ ମାଧ୍ୟମରେ କେତେଜଣ ଇଭାଙ୍କାଙ୍କ ଫଟୋସହ ନିଜ ଫଟୋସହ ଯୋଡି ସୋସିଆଲ ମିଡିଆରେ ଶେୟାର କରିଥିବା ଦେଖାଯାଇଛି।