କାଶୀନଗର,୨୭ା୧୦(ଡି.ଏନ୍.ଏ.): ଲଘୁଚାପ ପ୍ରଭାବରେ ଗତ ୩ ଦିନର ଲଗାଣ ବର୍ଷା ଚାଷୀଙ୍କ ବର୍ଷକର ଶ୍ରମ ଉପରେ ଦାଉ ସାଧିଛି। ଉଜାଡ଼ିଦେଇଛି ଏକର ଏକର ଫସଲ। ଅମଳ ବେଳ ସମୟରେ କାଶୀନଗର ବ୍ଲକ୍ ଓ ଏନ୍ଏସିର ପ୍ରାୟ ୨୫୦ ଏକର ଜମିରେ ଧାନଚାଷ ଜଳମଗ୍ନ ହୋଇଛି। କୃଷି ବିଭାଗର ଅଧିକାରୀ ଶ୍ରୀନିବାସ ରାଓ ଚାଷଜମି ବୁଲି ଦେଖିବା ପରେ ଏହି ଆକଳନକୁ ପ୍ରାୟ ଠିକ୍ ବୋଲି ମଧ୍ୟ ଦର୍ଶାଇଛନ୍ତି। ସେହିପରି ରଇତ ସଂଘର ଏକ ତିନିଜଣିଆ ଦଳ ମଧ୍ୟ କାଶୀନଗର ବ୍ଲକ୍ ଓ ଏନଏସିର ବିଭିନ୍ନ ପ୍ରଭାବିତ ଅଞ୍ଚଳ ବୁଲି ଦେଖିଛନ୍ତି। କୃଷି ବିଭାଗ ଓ ରଣତ ସଂଘ ପକ୍ଷରୁ ରିପୋର୍ଟ ପ୍ରସ୍ତୁତ କରାଯାଇ ଉଚ୍ଚ କର୍ତ୍ତୃପକ୍ଷ ଓ ଜିଲା ପ୍ରଶାସନକୁ ଦିଆଯିବ। ବ୍ଲକ୍ର ବିଭିନ୍ନ ପଞ୍ଚାୟତରେ କ୍ଷୟକ୍ଷତି ଘଟିଥିବାବେଳେ ଏନ୍ଏସି ଅଧୀନ ରେଲଓ୍ବେ ଷ୍ଟେଶନ୍ ନିକଟରୁ ଗୋରିବନ୍ଧା ପଞ୍ଚାୟତର ରାଜପୁର ପର୍ଯ୍ୟନ୍ତ ପ୍ରାୟ ସମସ୍ତ ଚାଷଜମି ବର୍ଷାଜଳରେ ବୁଡ଼ି ରହିଛି। ରବିବର୍ମା ନାଳରେ ବର୍ଷାଜଳ କୂଳ ଲଂଘି ଚାଷଜମିରେ ପଶିଯିବା ଯୋଗୁ ଅଧିକ କ୍ଷତି ହୋଇଛି। ଆଲୋକର ପର୍ବ ଦୀପାବଳୀ ପାଳିବା ପାଇଁ ସେ ଖୁସି ଆଉ ଚାଷୀଙ୍କ ପାଖରେ ନାହିଁ। ଅଦିନିଆ ବର୍ଷା ଉତ୍ସବକୁ ଫିକା କରିଦେଇଛି।
