ଖଇରା, ୧୫।୬(ଡି.ଏନ୍.ଏ.)-ରାତି ପାହିଲେ ଖାଦ୍ୟ ଚିନ୍ତା। ଯେଉଁ ବୟସରେ ମା’ ବାପାଙ୍କ ସ୍ନେହ ଶ୍ରଦ୍ଧା ମଧ୍ୟରେ ରହି ହସିଖେଳି ଦିନ କାଟିବା କଥା, ସେଠାରେ ସେମାନଙ୍କୁ ପରିବାରର ବୋଝ ସମ୍ଭାଳିବାକୁ ପଡୁଛି। କେବଳ ଅଭାବ ମଧ୍ୟରେ ସବୁ କିଛି ଅନ୍ଧାର ଦେଖାଯାଉଛି। ଏତେ ବଡ଼ ସଂସାରରେ ଆଗକୁ ରାହା ଦେବାକୁ କେହିନାହିଁ। ଅନ୍ୟ ପରିବାରରେ ପିଲାମାନେ ଭୋଗବିଳାସରେ ରହି ସ୍ବପ୍ନ ଦେଖୁଥିବା ବେଳେ ବାଲେଶ୍ୱର ଜିଲା ଖଇରା ବ୍ଲକ ଗରସଙ୍ଗ ପଞ୍ଚାୟତ ବଉଳାଣି ପାଟଣା ଗ୍ରାମର ଦୁଇ ଭଉଣୀ ଝାଟିମାଟି ଘରେ ୨ ଓଳି ଖାଦ୍ୟ ଯୋଗାଡ଼ ପାଇଁ ସଂଘର୍ଷ କରୁଛନ୍ତି। ଏହି ଦୁଇ ଭଉଣୀ ହେଲେ ନମିତା(୨୨) ଓ ଲକ୍ଷ୍ମୀପ୍ରିୟା(୧୮)। ତାଙ୍କ ମା’ ସୁମତି ସେଠୀ ୬ମାସ ପୂର୍ବେ ହୃଦ୍ରୋଗରେ ପ୍ରାଣ ହରାଇଥିଲେ। ମାନସିକ ଭାରସାମ୍ୟ ହରାଇଥିବା ବାପାଙ୍କୁ ନେଇ ତାଙ୍କ ସଂସାର। ବାପା ଶ୍ରୀକାନ୍ତ ସେଠୀ ଜଣେ ପରିଶ୍ରମୀ ମଣିଷ ଥିଲେ। ୨ଝିଅ ଓ ସ୍ତ୍ରୀଙ୍କୁ ନେଇ ପରିବାର ଠିକଠାକ୍ ଚାଲୁଥିଲା। ୧୦ବର୍ଷ ତଳେ ଶ୍ରୀକାନ୍ତ ମାନସିକ ଭାରସାମ୍ୟ ହରାଇବା ପରେ ସ୍ତ୍ରୀ ସୁମତି କାମଧନ୍ଦା କରି ଘର ଚଳାଉଥିଲେ। ହେଲେ ସୁମତି ହୃଦ୍ରୋଗରେ ଶିକାର ହେବା ପରେ ଚିକିତ୍ସା ପାଇଁ ଅର୍ଥ ଯୋଗାଡ଼ ହୋଇ ନ ପାରିବାରୁ ଶେଷରେ ସ୍ବାମୀ ଓ ୨ଝିଅଙ୍କୁ ଛାଡି ସେ ସବୁଦିନ ପାଇଁ ଆଖିବୁଜିଲେ। ଏବେ ସରପଞ୍ଚଙ୍କ ଉଦ୍ୟମରେ ସେମାନଙ୍କ ପରିବାର ଅନ୍ତ୍ୟୋଦୟ ଯୋଜନାରେ ସାମିଲ ହୋଇଛି ା ଗାଁ ଲୋକେ ମଧ୍ୟ କେବେ କେମିତି କିଛି କିଛି ଅର୍ଥ ଆଦାୟ କରିଦେଇଥାନ୍ତି। ଏବେ ଝିଅମାନଙ୍କର ବିବାହ ବୟସ ହୋଇଯାଇଥିବାରୁ ସେମାନଙ୍କ କଥା କିଏ ବୁଝିବ। ବହୁ ସଙ୍ଗଠନ ଅସହାୟ ପରିବାରକୁ ସହାୟତା ଯୋଗାଇ ଆସୁଥିବା ବେଳେ ଏ ପର୍ଯ୍ୟନ୍ତ ଏହି ନିରାଶ୍ରୟ ପରିବାର ପାଇଁ କେହି ଆଗେଇ ନ ଆସିବା ପରିତାପର ବିଷୟ ବୋଲି ସାଧାରଣରେ ଆଲୋଚନା ହେଉଛି।