ବ୍ରହ୍ମପୁର ଅଫିସ,୨୯ା୨ – ବରିଷ୍ଠ ନାଗରିକ ତୀର୍ଥଯାତ୍ରା ଲାଗି ସ୍ବତନ୍ତ୍ର ଟ୍ରେନ ଶୁକ୍ରବାର ବ୍ରହ୍ମପୁର ରେଳ ଷ୍ଟେଶନରୁ ଯାତ୍ରା ଆରମ୍ଭ କରିଛି। ଏହି ଟ୍ରେନକୁ ପର୍ଯ୍ୟଟନ ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ପତାକା ଦେଖାଇ ଶୁଭାରମ୍ଭ କରିଥିଲେ। ମାତ୍ର ପର୍ଯ୍ୟଟନ ବିଭାଗ ଓ ବିଏମସି କର୍ତ୍ତୃପକ୍ଷଙ୍କ ମଧ୍ୟରେ ସମନ୍ବୟ ଅଭାବରୁ ତୀର୍ଥଯାତ୍ରୀଙ୍କ ତାଲିକାରେ ତ୍ରୁଟି ଥିବା ଦେଖିବାକୁ ମିଳିଥିଲା। ଫଳରେ ଟ୍ରେନ ଛାଡିବାରେ ବିଳମ୍ବ ହୋଇଥିଲା।
ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ ପଣ୍ଡାଙ୍କ ଦୃଷ୍ଟିଗୋଚର ପରେ ଜିଲାପାଳ ବିଜୟ ଅମୃତା କୁଲାଙ୍ଗେ, ଉପଜିଲାପାଳ ସିନ୍ଧେ ଦତ୍ତାତ୍ରେୟ ଭାଉସାହେବଙ୍କ ଉପସ୍ଥିତିରେ ତ୍ରୁଟି ସମାଧାନ ପରେ ଟ୍ରେନଟି ୨ ଘଣ୍ଟା ବିଳମ୍ବରେ ବ୍ରହ୍ମପୁର ଷ୍ଟେଶନ ଛାଡିଥିଲା।
ତୀର୍ଥଯାତ୍ରା ପାଇଁ ଯିବାକୁ ବ୍ରହ୍ମପୁର ରେଳଷ୍ଟେଶନରେ ବରିଷ୍ଠ ନାଗରିକମାନେ ଆସି ପହଞ୍ଚିଥିଲେ। ତେବେ ବ୍ରହ୍ମପୁର ମହାନଗର ନିଗମ (ବିଏମସି) ଅଞ୍ଚଳର କେତେଜଣଙ୍କ ନାମ ତାଲିକାରେ ନ ଥିବା ସେଠାରେ ଅଭିଯୋଗ ହୋଇଥିଲା। ଏ ନେଇ ବିଏମସି ଅଞ୍ଚଳର କେତେଜଣ ପୂର୍ବତନ କର୍ପୋରେଟର ଓ ଜନପ୍ରତିନିଧି ଏମ୍ପି ଓ ଜିଲାପାଳଙ୍କୁ ଜଣାଇଥିଲେ। ପୁଣି ଯାଞ୍ଚ ହେବାରୁ ପର୍ଯ୍ୟଟନ ବିଭାଗ ଓ ବିଏମସି କର୍ତ୍ତୃପକ୍ଷଙ୍କ ସମନ୍ବୟ ଅଭାବରୁ କିଛି ଯାତ୍ରୀଙ୍କ ନାମ ତାଲିକାରେ ନ ଥିବା ଜଣାପଡିଥିଲା। ଜିଲା ପର୍ଯ୍ୟଟନ ଅଧିକାରୀ ଅମିୟ କୁମାର ସେଠୀ କହିଛନ୍ତି, ପୂର୍ବରୁ ୬୫ ଜଣଙ୍କ ନାମ ତାଲିକାରେ ସାମିଲ କରାଯାଇଥିଲା। ସିଟ ଖାଲି ରହିଥିବାରୁ ପରବର୍ତ୍ତୀ ସମୟରେ ବିଏମସି ଅଞ୍ଚଳର ଆଉ ୧୧୧ ଜଣଙ୍କୁ ତାଲିକାଭୁକ୍ତ କରାଯିବାକୁ ନିଷ୍ପତ୍ତି ନିଆଯାଇଥିଲା।
ଅନ୍ତିମ ପର୍ଯ୍ୟାୟରେ କେତେଜଣଙ୍କ ନାଁ ତାଲିକାରେ ନ ଥିବା ଦେଖିବାକୁ ମିଳିଥିଲା। ଜିଲାପାଳ, ଉପଜିଲାପାଳ, ଏମପି, ବିଧାୟକଙ୍କ ସହଯୋଗକ୍ରମେ ବିଏମସିର ମୋଟ ୧୭୬ ତୀର୍ଥଯାତ୍ରୀଙ୍କୁ ଟିକେଟ ଦିଆଗଲା। ଏଥିପାଇଁ ଟ୍ରେନଟି ୨ ଘଣ୍ଟା ବିଳମ୍ବରେ ବ୍ରହ୍ମପୁର ଷ୍ଟେଶନରୁ ଛାଡିଥିବା ପର୍ଯ୍ୟଟନ ଅଧିକାରୀ କହିଛନ୍ତି।