ନୂଆଦିଲ୍ଲୀ,୮।୩(ପି.ଟି.)- ମହିଳା ଟି୨୦ ବିଶ୍ୱକପ୍ ଫାଇନାଲ ମ୍ୟାଚ୍ ଖେଳିବା ପୂର୍ବରୁ ଭାରତ ଓ ଅଷ୍ଟ୍ରେଲିଆର ପ୍ରଧାନମନ୍ତ୍ରୀଙ୍କ ମଧ୍ୟରେ ଟୁଇଟରରେ ଯୁଦ୍ଧ ତଥା କଥା କଟାକଟି ଦେଖିବାକୁ ମିଳିଛି। ଦୁଇ ଦଳକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁଭେଚ୍ଛା ଜଣାଇଛନ୍ତି। ଭାରତ ଯେତେବେଳେ ଫାଇନାଲ ଖେଳିବାକୁ ମେଲବୋର୍ନ କ୍ରିକେଟ ଗ୍ରାଉଣ୍ଡ (ଏମ୍ସିଜି)କୁ ଓହ୍ଲାଇବ ସେତେବେଳେ ସାରା ଷ୍ଟାଡିୟମ କେବଳ ନୀଳ (ଭାରତୀୟ ଜର୍ସିର ରଙ୍ଗ) ସମୁଦ୍ରରେ ପରିଣତ ହେବ ବୋଲି ମୋଦି ଆଶା ପ୍ରକାଶ କରିଛନ୍ତି। ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନଙ୍କ ଏକ ଟୁଇଟ୍ର ଜବାବ ରଖି ପ୍ରଧାନମନ୍ତ୍ରୀ ମୋଦି ଏହି କଥା କହିଛନ୍ତି। ପୂର୍ବରୁ ମୋଦିଙ୍କୁ ଟ୍ୟାଗ କରି ମୋରିସନ ଉଲ୍ଲେଖ କରିଛନ୍ତି ଯେ, ଷ୍ଟାଡିୟମରେ ବହୁସଂଖ୍ୟାରେ ଦର୍ଶକ ଉପସ୍ଥିତ ରହିବେ ଓ ଦୁଇ ଶ୍ରେଷ୍ଠ ଦଳ ମୁକାବିଲାରେ ଅବତୀର୍ଣ୍ଣ ହେବେ। ଏହା ଏକ ସୁନ୍ଦର ତଥା ରୋମାଞ୍ଚକ ମ୍ୟାଚ୍ ହେବାକୁ ଯାଉଛି। ସବୁଆଡେ ଅଷ୍ଟ୍ରେଲିଆର ଚମକ ଦେଖିବାକୁ ମିଳୁଛି ବୋଲି ସେ ଟୁଇଟ କରିଛନ୍ତି। ମୋଦି ମଧ୍ୟ ଟୁଇଟ୍ କରି ଏହାର ଜବାବ ରଖିଛନ୍ତି। ଭାରତ ଓ ଅଷ୍ଟ୍ରେଲିଆ ଫାଇନାଲ ଖେଳିବାକୁ ଯାଉଛନ୍ତି, ଏହାଠାରୁ କୌଣସି ବଡ଼ କଥା ନାହିଁ। ଦୁଇ ଦଳକୁ ମୋର ଶୁଭେଚ୍ଛା ଓ ବିଶ୍ୱ ମହିଳା ଦିବସ ପାଇଁ ଅଭିନନ୍ଦନ। ଯେଉଁ ଦଳ ଭଲ ଖେଳିବ ସେହି ଦଳ ଚାମ୍ପିୟନ ହେବ ବୋଲି ମୋଦି ଟୁଇଟ୍ କରି ଉଲ୍ଲେଖ କରିଛନ୍ତି। ନୀଳ ପାହାଡ଼ ଭଳି ଏମ୍ସିଜି ପୂରା ନୀଳ ରଙ୍ଗରେ ଝଲସିବ ବୋଲି ସେ ଟୁଇଟ୍ କରି ଜବାବ ରଖିଛନ୍ତି।