କବିସୂର୍ଯ୍ୟନଗର,୨୭ା୧୨- ଗଞ୍ଜାମ ଜିଲା କବିସୂର୍ଯ୍ୟନଗର ଥାନା ଅଞ୍ଚଳରେ ମଦ ବିରୋଧୀ ଆନ୍ଦୋଳନ ତେଜିବାରେ ଲାଗିଛି। ବୁଧବାର ଓ ଗୁରୁବାର ଉତ୍ତ୍ୟକ୍ତ ଲୋକେ ଏ.ବରିଡ଼ା, କୁଶପଲ୍ଲୀରେ ମଦଭାଟି ଓ ମଦ ବ୍ୟବସାୟୀଙ୍କ ୪ ଘର ଜାଳି ଦେଇଛନ୍ତି। ଗୁରୁବାର ଉତ୍ତ୍ୟକ୍ତ ଲୋକେ ଫାଣ୍ଡି ଅଧିକାରୀଙ୍କୁ ମାଡ଼ ମାରି ଦୀର୍ଘ ସମୟ ଧରି ଗଁାରେ ଅଟକ ରଖି ପରେ ଛାଡ଼ିଦେଇଥିଲେ।
ସୂଚନାଯୋଗ୍ୟ, ବୁଧବାର ଏ. ବରିଡ଼ା ଗ୍ରାମରେ ସାମାଜିକକର୍ମୀ ଏ. ବ୍ରହ୍ମାନନ୍ଦ ଆଚାରୀ ଗ୍ରାମବାସୀଙ୍କ ସହଯୋଗରେ ମଦ ବିରୋଧୀ ସଚେତନତା କରୁଥିଲେ। ଏନେଇ ଅପରାହ୍ନରେ ତାଙ୍କୁ ମଦ ଦୋକାନୀ ମାଡ଼ ମାରିଥିବା ସେ ଅଭିଯୋଗ କରିଥିଲେ। ଏଥିରେ ଉତ୍ତ୍ୟକ୍ତ ହୋଇ ଶତାଧିକ ମହିଳା ଗ୍ରାମରେ ଥିବା ବିଦେଶୀ ମଦ ଦୋକାନକୁ ରାତିରେ ଜାଳି ଦେଇଥିଲେ। କବିସୂର୍ଯ୍ୟନଗର ଥାନା ଅଧିକାରୀ ପ୍ରଭାତ କୁମାର ସାହୁ, ଅଗ୍ନିଶମ ବାହିନୀ ଓ ବାଲିଛାଇ ଫାଣ୍ଡି ଅଧିକାରୀ ଉମାଚରଣ ପ୍ରହରାଜ ପହଞ୍ଚତ୍ ମହିଳାମାନଙ୍କୁ ବୁଝାଶୁଝା କରିଥିଲେ ମଧ୍ୟ ସେମାନେ ବୁଝି ନ ଥିଲେ। ଗୁରୁବାର ଘଟଣା ପ୍ରଚାରିତ ହେବାପରେ ଭାଟପଡ଼ା ଗ୍ରାମବାସୀ ମଧ୍ୟ ମଦ ବିରୋଧୀ ଆନ୍ଦୋଳନକୁ ଓହ୍ଲାଇଥିଲେ। ଗ୍ରାମର ଶତାଧିକ ମହିଳା ଓ ଯୁବକ ଏ.ବରିଡ଼ା ଗ୍ରାମ ରାସ୍ତାରେ ଥିବା ମହୁଲି ଦେଶୀମଦ ଦୋକାନ ତାଲାଭାଙ୍ଗି ବିଭିନ୍ନ ସରଞ୍ଜାମ ଜାଳି ଦେଇଥିଲେ। ବାଲିଛାଇ ଫାଣ୍ଡି ଅଧିକାରୀ ଓ ୨ ପୋଲିସ କର୍ମଚାରୀ ପହଞ୍ଚତ୍ଥିଲେ ମଧ୍ୟ ଉତ୍ତ୍ୟକ୍ତ ଲୋକଙ୍କୁ ବୁଝାଇ ପାରି ନ ଥିଲେ। ଫଳରେ ଉତ୍ତେଜନା ଲାଗି ରହିଥିଲା। ପରେ ଉତ୍ତେଜିତ ଲୋକେ କୁଶପଲ୍ଲୀ ନିକଟରେ ଥିବା ବେଆଇନ ଦେଶୀ ମଦ ଦୋକାନ ହୋଇଥିବା ମରାଠି ବସାକୁ ଯାଇଥିଲେ। ସେଠାରେ ଏ.ବରିଡ଼ା, କୁଶପଲ୍ଲୀ ଓ ଭାଟପଡ଼ାର ବହୁ ସଂଖ୍ୟକ ମହିଳା, ଯୁବକ ଏକାଠି ହୋଇ ମଦ ବିରୋଧୀ ନାରା ଦେଇଥିଲେ। ପରେ ଦୋକାନ ସହ ୪ ବାସଗୃହରେ ନିଅଁା ଲଗାଇ ଦେଇଥିଲେ।
କବିସୂର୍ଯ୍ୟନଗର ଏସ୍ଆଇ ଅର୍ଜୁନ କଅଁର, ବାଲିଛାଇ ଫାଣ୍ଡି ଅଧିକାରୀ ଉମା ଚରଣ ପ୍ରହରାଜ ପହଞ୍ଚତ୍ଥିଲେ ସୁଦ୍ଧା ଲୋକଙ୍କୁ ଶାନ୍ତ କରିପାରି ନ ଥିଲେ। କବିସୂର୍ଯ୍ୟନଗର ଅଞ୍ଚଳରେ ମଦ ବିକ୍ରିକୁ ନେଇ ଗଁାକୁ ଗଁା ଅସନ୍ତୋଷର ନିଅଁା ବ୍ୟାପୁଛି। ପୁଣି ମଦ ବିକ୍ରିକଲେ ଆନ୍ଦୋଳନକୁ ତୀବ୍ର କରାଯିବ ଓ ଜେସିବି ଲଗାଇ ସମସ୍ତ ମଦ ଦୋକାନ ଭାଙ୍ଗିଦେବୁ ବୋଲି ଉତ୍ତ୍ୟକ୍ତ ଲୋକେ ଚେତାବନୀ ଦେଇଛନ୍ତି। ଘଟଣାସ୍ଥଳରେ କୋଦଳା, ଆସିକା, ପୋଲସରା ଓ ବୁଗୁଡ଼ା ଥାନା କର୍ମଚାରୀ ପହଞ୍ଚତ୍ ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଥିବା ଜଣାପଡିଛି।