ଯାଜପୁର ଅଫିସ,୨୮ା୩: ଯାଜପୁର ସହରର ବିରଜାହାଟ ନିକଟରେ ଥିବା ଦୁଇ ହୋଲ୍ସେଲରଙ୍କ ନାମରେ ଜିଲାପାଳଙ୍କ ନିର୍ଦ୍ଦେଶକ୍ରମେ ଜିଲାପାଳଙ୍କ କୋର୍ଟରେ ମାମଲା ରୁଜୁ ହୋଇଛି। ହୋଲ୍ସେଲର ଦୁଇଜଣ ହେଲେ ସଞ୍ଜୟ ସାହୁ ଓ ଧନେଶ୍ୱର ସାହୁ। ଏସମ୍ପର୍କରେ ଅତିରିକ୍ତ ଜିଲା ଯୋଗାଣ ଅଧିକାରୀ ପ୍ରହଲ୍ଲାଦ ସେଠୀ ସୂଚନା ଦେଇ କହିଛନ୍ତି ଯେ, ଉପରୋକ୍ତ ହୋଲସେଲର ଦ୍ୱୟ ଆଳୁ, ପିଆଜ, ଡାଲି ଆଦି ଗ୍ରସେରି ସାମଗ୍ରୀର କଳାବଜାର କରିବାକୁ ଉଦ୍ୟମ କରିଥିଲେ। ତାଙ୍କ ଗୋଦାମରେ ସାମଗ୍ରୀ ମହଜୁଦ ରହିଥିଲେ ହେଁ ଦୋକାନୀମାନଙ୍କୁ ଷ୍ଟକ ନାହିଁ ବୋଲି କହିଥିଲେ। ତେଣୁ ଯୋଗାଣ ବିଭାଗରେ ଅଭିଯୋଗ ହେବାପରେ ଗୁରୁବାର ଅତିରିକ୍ତ ଜିଲାଯୋଗାଣ ଅଧିକାରୀ ସେଠୀ ତଦନ୍ତ କରି ଜିଲାପାଳଙ୍କ କୋର୍ଟରେ ଓଡ଼ିଶା ଅତ୍ୟାବଶ୍ୟକ ସେବା ଆଇନ ୧୯୭୩ର ଧାରା ୩ ଓ ୪ରେ ମାମଲା ରୁଜୁ କରିଛନ୍ତି। ପୂର୍ବରୁ ଏନେଇ ‘ଧରିତ୍ରୀ’ରେ ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି ସମ୍ପର୍କରେ ଖବର ପ୍ରକାଶ ପାଇବାରେ ଯୋଗାଣ ବିଭାଗ ତପତ୍ରତା ପ୍ରକାଶ କରି ଏଭଳି ପଦକ୍ଷେପ ଗ୍ରହଣ କରିଥିବା ଜଣାପଡିଛି। ବର୍ତ୍ତମାନ କୋରେନା ସଂକ୍ରମଣ ନିୟନ୍ତ୍ରଣ ପାଇଁ ଜିଲାରେ ଲକଡାଉନ ଚାଲିଥିବାବେଳେ କେତେଜଣ ଅସାଧୁ ବ୍ୟବସାୟୀ ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି କରୁଛନ୍ତି। ତେଣୁ ଆବଶ୍ୟକ ତଦନ୍ତ କରି ଅସାଧୁ ବ୍ୟବସାୟୀଙ୍କ ନାମରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେଠୀ ପ୍ରକାଶ କରିଛନ୍ତି।