ନୂଆଦିଲ୍ଲୀ,୨୩।୧୦: ଯଦି ଆପଣ ଚକୋଲେଟ୍ର ବହୁତ ବଡ଼ ଫ୍ୟାନ୍, ତେବେ ଏହା ଆପଣଙ୍କୁ ପ୍ରଲୋଭିତ କରିବ। କାରଣ ଦେଶର ଅନ୍ୟତମ ଅଗ୍ରଣୀ କମ୍ପାନୀ ଆଇଟିସି ଦୁନିଆର ସବୁଠାରୁ ମହଙ୍ଗା ଚକୋଲେଟ୍ର ଲଞ୍ଚ୍ କରିଛି। ଏହି ଚକୋଲେଟ୍ର ନାଁ ହେଉଛି ଟ୍ରିନିଟି ଟ୍ରଫଲ୍ସ ଏକ୍ସଟ୍ରାଅର୍ଡିନାରି, ଯାହାର ଦାମ୍ ଶୁଣିଲେ ହୋସ୍ ଉଡ଼ିଯିବ। ଏହି ଚକୋଲେଟ୍ର ଦାମ୍ ହେଉଛି ପ୍ରତି କିଲୋ ୪.୩ଲକ୍ଷ ଟଙ୍କା। ଦୁନିଆର ସବୁଠାରୁ ଏହା ମହଙ୍ଗା ଚକୋଲେଟ୍ ହୋଇଥିବାରୁ ଏହାକୁ ଗିନିଜ୍ ଓ୍ବାଲର୍ଡ ରେକଡର୍ସରେ ସାମିଲ କରାଯାଇଛି।
ଏହାକୁ ଫ୍ରାନ୍ସର ଜଣାଶୁଣା ସେଫ୍ (ପୁରୁଷ ରୋଷେୟା) ଫିଲିଫ କଣ୍ଟିସିନି ଓ ଫେବଲରର ମାଷ୍ଟର ଚକଲେଟିୟର ମିଳିତ ଭାବେ ତିଆରି କରିଛନ୍ତି। ଚକୋଲେଟଗୁଡିକୁ ହାତତିଆରି କାଠ ବାକ୍ସରେ ଭର୍ତ୍ତି କରି ବିକ୍ରି କରାଯିବ। ଏଥିରେ ୧୫ ଗ୍ରାମ ଓଜନର ୧୫ଟି ଚକୋଲେଟ ରଖାଯାଇପାରିବ। ଏହି ବାକ୍ସର ଦାମ ୧ ଲକ୍ଷ ଟଙ୍କା ରଖାଯିବ ବୋଲି ସ୍ଥିର କରାଯାଇଛି। ଅର୍ଥାତ୍ ଗୋଟିଏ କ୍ୟାଣ୍ଡିର ଦାମ୍ ପ୍ରାୟ ୬୬୬୭ ଟଙ୍କା ହେବ। ଭାରତୀୟ କମ୍ପାନୀ ଚକୋଲେଟ୍ ଲଞ୍ଚ୍ କରିବା ପରେ ଏହା ଇତିହାସ ରଚିଛି। ଏହାକୁ ଦୀପାବଳି ଅବସରରେ ସ୍ବତନ୍ତ୍ର ଲୋକଙ୍କୁ ମହଙ୍ଗା ଉପହାର ସଦୃଶ ଭେଟି ମଧ୍ୟ ଦିଆଯାଇପାରିବ ବୋଲି କମ୍ପାନୀ ପକ୍ଷରୁ କୁହାଯାଇଛି।